3 JUÃO
Juão umpinima musapirisawa
Umpinima kuekatu Gaiu supe
1
Ixe serakuenawaa kuekatu inde arama inde hagustariwaa Gaiu, kua hagustariwaa supiwa. 2 Hagustariwaa, haputari kirimbawa puranga arama reiku, puranga arama inde nepira upe yuiri, kuaye purangawaa yawe uiku kua nepia. 3 Nyãse suuri ixe turusu aintauri rame kuaita yepeyepe uruyariwaita, asui aintaumbeu neresewara mayetaa reiku supiwa, nyãse reiku sese kua nyenga supiwa. 4 Nyãse timaa nungara upuderi umusuuri ixe isui kua hasenduwaa setainaita resewara aintauiku sese kua nyenga supiwa.Gaiu umunya puranga aintaumaa
5 Hagustariwaa, remunya puranga reajudari rame kuaita uruyariwaita, reajudari aintayuiri kuaita apekatu suiwaraita. 6 Aintaumbeuwana neresewara ingreja upe maye regustari ainta. Remunya kuri puranga remundu arama ainta aintausu arama puranga kuaye upurakiwaa yawe Deus supe. 7 Nyãse sesewara kua Sera aintausemuana, asui timaa nungara aintauyuka aintairumu kuaita tiwaita judeu. 8 Ape yarikute yawajudari kuaita apigawaita, yapuraki arama yepewasu aintairumu sese kua nyenga supiwa.
Diutrefe Demetriu yuiri
9 Hampinimana ainta supe kuaira kuaita ingreja puraita, maa kua Diutrefe ugustariwaa uiku aintaara kiti ae aintapiterupi, tiuputari usuanti yande. 10 Asui hasu rame kuri haxari kuri umanduari kua umunyawaa, kua yuiri kua umbeuwaa yanerese puxi. Asui tiusika ixupe kua umunyawaa, uputari piri tiusuanti kuaita yanerumuaraita, asui usaisu aintausuanti ainta kuaita uputariwaita, asui umburi ainta ingreja sui. 11 Hagustariwaa, teremaa nerangawa kua puxuwerawa, maa remaa nerangawa kua purangawaa. Deus suiwara kua umunyawaa puranga; kua umunya puxi timaa umaa Deus. 12 Asui panye ainta aintaumbeu sesewara puranga kua Demetriu, ae yuiri kua supiwa umbeu yuiri puranga sesewara, asui yande yuiri yambeu puranga sesewara, asui rekuawate supiwa kua yambeuwaa. 13 Harikute turusu hampinima arama inde arama, maa tihaputari hampinima tinta sawa yuiri irumu ae, 14 Nyãse kutara kuri hamanduari hamaa inde, ape kuri yakuntari puranga. 15 Haputari timaarese inde. Kuaita yanerumuaraita aintaumundu inde arama kuekatu; kuekatu ainta supe kuaita yaneanamaita aintayaweyawe.