1 JUÃO
Juão uyupiru umpinima
Nyenga upakawaa
1
Kua uikuwaa ara rundere, kua yasenduwaa, kua yamaawaa yaneresa irumu, kua yamaawaa ixupe, kua yapisika yaneipu irumu, sese kua nyenga upakawaa. 2 Asui umuyukuawa kua upakawaa, asui yamaa ae, asui yambeu sesewara, asui yambeu penye arama kua upakawaa tiwa upawa, kua uikuwaa kuera yanepaya irumu, asui umuyukuawa yande arama ae. 3 Asui yambeu penye arama yuiri kua yamaawaa, yasenduwaa yuiri, periku arama kuri yaneirumu kua yepewasuwaa uxari yamanduari, asui kua yepewasuwaa uxari yamanduari yarikuwaa yariku ae yanepaya irumu, taira Jesus Kristu irumu yuiri. 4 Asui yawe yampinima penye arama suuri arama kuri yande puranga.Turi kua Deus
5 Kua nyenga yasenduwaa irumu aete kua nyenga yambeuwaa penye arama:
—Turi kua Deus, tiyamaa pitunawasuwaa sese, nẽ kuaira. 6 Yambeu rame yariku kua yepewasuwaa uxari yamanduari irumu, maa yawata pukusawa pitunawasuwaa upe, yaganani nyãse tiyamunya kua supiwa. 7 Asui yawata rame murutingawaa upe kuaye uikuwaa yawe murutingawaa upe, yariku kua yepewasuwaa uxari yamanduari yanerumuaraita aintairumu, asui suwi kua taira Jesus umuyasuka yanesui panye yanepuxuwerasawa. 8 Yambeu rame tiyariku yanepekadu yayuganani yandepawate, asui tiyamaa nyenga supiwa yanepia upe. 9 Yambeu rame yanepekadu, puranga umunya yande arama kuaye umbeuwaa yawe, asui umburi kuri yanesui yanepekadu, asui umuyasuka yanesui panye yanepekadu. 10 Yambeu rame tiyamunya yanepekadu, yambeu ugananiwaa ae, asui timaa inyenga uiku yanepia upe.