Jesus mukuĩsawa kuri uri
3
Kuiri mukuĩsawa hampinima penye arama papera penye haputariwaita, asui aintairumu aintayaweyawe hambaka kua pemanduarisawa supiwa irumu kua kuekatu. 2 Pemanduari arama kua aintautitikawaa sese kuaita utitikawaita purangawaita, pemanduari arama yuiri kua yaneruixawa umbeuwaa kua umukaturuwaa yande, kua aintaumbuewaa penye arama kuaita umunduwaita pepiri. 3 Asui panye sui haputari pekuawa anyu aramawaa ara upe aintauri kuaita ukasuariwaita, aintaumunya kuri kuaye aintapira uputariwaa yawe; 4 Aintaumbeu kuri:—Mametaa kua uriwaa umbeuwaa sese? Nyãse aintaumanu rire kuaita yaneramunyaita interure uiku kua ara kuaye uikuwaa yawe uyupirungawa upe. 5 Aintauputari aintauiku timaarese isui kua nyenga supiwa. Kuxima Deus umunya iwaka inyenga irumu, iwi yuiri, asui uxari usemu iwi parana sui parana irumu, 6 Asui aintairumu yuiri usu ipipe kua mundu kuxima parana upe, asui ukanyemu ae. 7 Maa ipupe yuiri kua nyenga umukaturu kua iwaka iwi yuiri kuiriwara tata runde, umukaturu ainta sunde kua mundu anyu aramawaa, aintaukanyemu arama ainta kuaita tiwaita umanduari Deus. 8 Tepeiku maa rese isui kua nyenga, penye haputariwaita: Yaneruixawa umaa yepe ara kuaye umaawaa yawe mili akayu, asui umaa mili akayu kuaye umaawaa yawe yepe ara. 9 Nyãse kua yaneruixawa timaa uikupuku usaru umunya arama kua umbeuwaa, kuaye aintaumanduariwaa yawe kuaita yepeyepe sese kua uiku pukusawa, maa uriku pasiensia peirumu, nyãse tiuputari yepe ukanyemu isui, maa uputari sasiyara aintaumanduari aintapekadu panye ainta. 10 Maa nyã ara upe kuri Yaneruixawa uri kuri kuaye mundawasu uriwaa yawe, asui kua iwaka upawa kuri tiapu, asui kuaita iwaka upewaraita aintautiku kuri tata irumu, asui usapi kuri panye mundu, panye aintaumunyawaita yuiri kua mundu upe. 11 Asui yawe kuri aintaupawa panye, ape maitaa kuri perikute peiku puranga pemanduari arama yuiri Deus. 12 Ape pesaru ae pemuranye kua ara Deus yara, nyãse sesewara kuri umundeka kua iwaka upawa arama, asui kuaita iwaka upewaraita aintautiku kuri tata irumu. 13 Maa kuaye umbeuwaa yawe yande arama yasaru iwaka pisasuwaa, mundu pisasuwaa yuiri, akiti kuri uiku panye kua purangawaa.
Yarikute yasaru yamaa Jesus
14 Ape haputariwaita, pesaru rame pemaa ainta, perikute pesikari kirimbawa uwasemu penye pemanduarisawa ikiaimawaa purangawaa irumu kua timaaresesawa yuiri. 15 Asui perikute pekuawa yaneruixawa umukaturu penye uriku resewara pasiensia, kuaye yanemu Paulu yagustariwaa umpinimawaa yawe yuiri penye arama ipupe kua ukuawasawa Deus uxari ixupe. 16 Umbeu sese kua yawewaa panye ipaperaita upe. Ape aikue yepeyepe inyenga iwasuwaita yakuawa arama mayesawataa ipupe, asui kuaita tiwaita ukuawa, mukuĩwaita umanduarisawa yuiri aintaumuapara ae kuaye aintaumuaparawaa yawe amuita umpinimawaita, asui uxari aintaukanyemu. 17 Ape penye hagustariwaita, pekuawana senundere, pemaa pesui yawaite aintaurasu penye aintairumu puxuwerawa rese kuaita apigawaita puxuwerawaita, yawaite ukanyemu pesui kua uxariwaa peiku santa. 18 Maa peyukiriari sese kua ipurangasawa, sese yuiri kua ukuawasawa yaneruixawa Jesus Kristu rese, kua umukaturuwaa yande. Yamee ixupe arama purangawaa kuiri, kua ara tiwa upawa upe yuiri.