TITU
Paulu umpinima Titu supe
Paulu umpinima Titu supe
1
Ixe Paulu upurakiwaa Deus supe, Jesus Kristu umunduwaa ixe haxari arama aintauruyari kuaita Deus uparawakawaita, aintaukuawa yuiri kua nyenga supiwa, kuaye Deus uputariwaa yawe. 2 Aintausaru arama aintauriku arama kuri mundu tiwa upawa, umbeuwaa ainta supe kuximare kua Deus tiwa uganani. 3 Asui sangawa upe uxari yakuawa sese inyenga irumu hambue resewara ae, kuaye umunduwaa yawe ixe kua Deus umukaturuwaa yande. 4 Hampinima inde arama inde Titu, inde seraira sese kua yaruyariwaa. Kuiri yanepaya Deus, Kristu Jesus umukaturuwaa yande yuiri, aintauxari inde arama ipurangasawa, itimaaresesawa yuiri.Serakuenawaita rese
5 Sesewara haxari inde Kreta upe rembawa arama kua remunyawaa kua tiware yamunya. Asui rexari serakuena arama aintarendawa yaweyawe, maye hambeuwaa yawe inde arama. 6 Rexari serakuena kua apigawa tiwa aintaumbeu puxi sese, kua uriku yepenyu ximiriku, kua urikuwaa tairaita aintauruyari, tiwa upurungita puxi aintarese, tiyuiri aintaumutenyuntu aintapaya nyenga. 7 Nyãse kua usaruwaa Deus yaraita timaa upuderi uxari puxi amuita umaa ae, tiupuderi umanduari ukuawapiri aintasui, tiupuderi ipiaiwa ae, tiupuderi uu ukau arama, tiupuderi umaramunya, tiupuderi usikari uyuka imaa arama gananisawa irumu; 8 Suuri urikute usuanti amuita, urikute ugustari panye purangawaa, urikute umundu umanduarisawa, urikute uputari uiku ipekaduimawaa ae, urikute ugustari Deus, urikute ukuawa umundu ipia; 9 Urikute uiku santa sese kua nyenga supiwa yambuewaa, uriku arama kirimbawasawa, umbue arama ainta nyenga supiwa rese, ukuawa arama yuiri umuserana kuaita umuruanyanawaita ae.
Umbuewaita tenyuntuwaa rese
10 Nyãse siya kuaita apigawaita tiwaita uruyari, retentuwaa aintaupurungita, aintauganani, aintate kuaita aintasuiwaraita kuaita usirkunsidariwaita. 11 Yarikute yamukiriri ainta, nyãse aintauwata aintautrukari aintaumanduarisawa kuaita siyawaita uka puraita, aintaumbue resewara sikuyara irumu kua tiwa aintaupuderi aintaumbue. 12 Yepe utitikawaa aintapitera sui umbeu: "Kretawaraita aintauganani yawewarawate, suu nyãruwaa ainta, aintaugustari aintaumbau turusu." 13 Supiwa kua umbeuwaa, ape rembeu ainta supe nyenga kirimbawa irumu, santa arama aintauiku sese kua yaruyariwaa; 14 Tiarama aintaumanduari aintarese kuaita judewita nyenga, tiyuiri kua aintaumunduwaa kuaita apigawaita tiwaita uruyari kua nyenga supiwa. 15 Puranga aintaumaa panye supe kuaita urikuwaita aintaumanduarisawa purangawaa, maa kuaita urikuwaita aintaumanduarisawa puxuwerawa, kuaita tiwaita uruyari yuiri, tiawa aintaumaa purangawaa yawe, nyãse iyukana panye aintaumanduarisawa, panye aintapia yuiri. 16 Aintaumbeu aintaukuawate Deus, maa aintaumunyawaita irumu aintauyumimi sesewara, puxi aintaumaa ainta, tiwaita uruyari ainta, timaa aintaupuderi aintaumunya purangawaa.