2 TIMUTEU
Paulu umpinima mukuĩsawa Timuteu supe arama
Umee purangawaa Timuteu rese
1
Ixe Paulu, Kristu Jesus umunduwaa ixe Deus uputari resewara yawe, kuaye umbeu yawe ainta supe mundu tiwa upawa uikuwaa Kristu Jesus ipia upe. 2 Inde arama inde Timuteu, inde seraira hagustariwaa, yanepaya Deus, yaneruixawa Kristu Jesus yuiri, aintauxari inde arama aintapurangasawa, pirasua aintaumaa inde, aintauxari timaarese inde. 3 Hamee purangawaa Deus supe, kua hapurakiwaa ixupe hamanduarisawa purangawaa irumu, kuaye seramunyaita umunyawaa yawe; hamee ixupe arama purangawaa hamanduari rame inde yawewarawate hambeu rame Deus. 4 Kirimbawa haputari hamaa inde hamanduari rame neresa yukise, haputari hayumusuuri. 5 Nyãse hakuawa maitaa reruyari supiwa, kuaye aintauruyariwaa yawe aintauyupiru kuaita nearia Luide, kua nemaya yuiri Eunise, asui kuiri inde yuiri.Uruyari arama puranga
6 Ape hambeu inde arama, rembaka kua Deus uxariwaa inde arama nepia upe, haxari resewara seipu nerese. 7 Nyãse timaa Deus uxari yande arama espiritu yasikie arama maa, maa uxari yande arama espiritu uxariwaa yande arama kirimbawasawa, gustarisawa yuiri ukuawasawa yuiri. 8 Ape teretiĩ rembeu yaneruixawa resewara, teretiĩ inde yuiri seresewara ixe prezuwaa sesewara, asui inde yuiri repurara sesewara kua nyenga purangawaa, irumu kua Deus kirimbawasawa. 9 Nyãse umukaturuana yande, asui usenuiwana yande nyenga purangawaa irumu, timaa sesewara kua yamunyawaita, maa uputari resewara, sesewara yuiri kua ipurangasawa uxariwaa kuera yande arama Kristu Jesus resewara. 10 Asui kuiri umukameana ipurangasawa uri resewara kua Kristu Jesus, kua umukaturuwaa yande, kua umukanyemu manusawa, kua uxariwaa yamaa sikuesawa mundu tiwa upawa yuiri irumu kua nyenga purangawaa. 11 Nyãse sesewara kua nyenga purangawaa uxari hambue ae, uxari umunduwaa ixe, uxari umbuesara ixe. 12 Asui sesewara hapurara. Maa timaa hatiĩ ixe nyãse hakuawate kua haxari sepia sese, hakuawate yuiri upuderi umukaturu serunde kua uxariwaa ixe arama ate nyã ara upe kuri. 13 Resikari rembeu nyenga purangawaa yawewarawate kuaye remaawaa yawe nerangawa ixe, irumu kua uruyarisawa, gustarisawa yuiri Kristu Jesus rese. 14 Remukaturu kua nyenga supiwa uxariwaa inde arama, irumu kua Espiritu Santu uikuwaa yanepia upe.
Prezu Paulu, aintauxari ae
15 Rekuawate panye kuaita Azia upewaraita aintauxari ixe, panye kuaita Fijelo, Ermujenes yuiri. 16 Haputari pirasua yaneruixawa umaa Uneziferu ruka puraita, nyãse siya viaji umusuuri ixe, timaa utiĩ ae seresewara prezu resewara ixe. 17 Nyãse usika rame Ruma kiti usikari ixe kirimbawa ate uwasemu ixe. 18 Haputari pirasua yaneruixawa umaa ae nyã ara upe kuri, nyãse rekuawate mayetaa uajudari ixe Efezu upe.