Paulu Barnabe Ikuniu kiti
14
Asui Ikuniu upe aintauwike yepewasute judewita sinaguga upe, Paulu Barnabe yuiri, asui kirimbawa aintaumbue, asui siya miraita aintauruyari, siya judewita siya greguita yuiri. 2 Maa kuaita judewita tiwaita uruyari aintaumpiaiwa kuaita tiwaita judeu puxi arama aintaumaa kuaita yanemuita Kristu rese. 3 Maa aintauiku akiti uikupuku, tiaintautiĩ aintaumbue yaneruixawa rese, asui uxari aintaukuawa supiwa kua nyenga igrasa rese uxari resewara aintaumunya siya milagri. 4 Maa mukuĩ aintaumanduariwaa kuaita miraita tetama upe, amuita uruyari judewita nyenga amuita uruyari apustuluita nyenga. 5 Asui aintaipiaiwa kuaita tiwaita judeu asui judewita yuiri aintairumu kuaita serakuenawaita, aintauputari aintaukasuari ainta asui aintauputari aintauyuká ainta ita irumu.6 Asui aintausendu sesewara asui aintauyawawa Listra kiti Derbe kiti yuiri tetama uikuwaita Likaunia upe, aintausu yuiri panye tetama kuayentuwaita kiti. 7 Akiti aintaumbue nyã nyenga purangawaa.
Paulu umukaturu yepe alejadu
8 Apete Listra upe yepe apigawa tiwa upuderi uwata nyãse unaseri imembeka ae, nẽ yepe viaji uwata. 9 Asui usendu irumu upurungita kua Paulu, asui Paulu umaa ixupe asui ukuawa uruyari puranga ipia upe puranga arama ae. 10 Asui inyenga kirimbawawaa irumu umbeu:
—Repuamu satambika neretima irumu. Asui upuri upuamu aramete uwata. 11 Asui kuaita miraita siyawaita aintaumaa irumu kua Paulu umunyawaa aramete aintausasemu Likaunia nyenga rupi:
—Kuaita yanetupanaita aintauwiyeana yanepiri apigawa ipira yawe. 12 Asui aintaumanduari Jupiteru kua Barnabe, asui aintaumanduari Merkuriu kua Paulu nyãse aete kua upurungitawaa turusu. 13 Asui yepe Jupiteru saserduti usemu templu sui uikuwaa tetama runde sui, ururi bui ukara kiti putira yuiri, uputari uyuká simbawa itupana supe aintairumu kuaita miraita. 14 Maa kuaita apustuluita Barnabe Paulu yuiri aintausendu irumu sesewara aintaumusuruka aintarupa aintauyana aintapitera rupi kuaita miraita aintaumbeu ainta supe kirimbawa: 15 —Penye apigawaita, marantaa pemunya yawe? Apigawaita yande kuaye peyawe, ape yaruri penye arama kua nyenga purangawaa peyereu arama isui kua tenyuntuwara pexari arama pepia sese kua Deus upakawaa kua umunyawaa panye maa iwaka kiti, panye kua mundu upe yuiri, panye parana upewaita yuiri. 16 Kuxima haxarire panye kuaita miraita aintauwata aintayaweyawe aintarapee rupi. 17 Maa uxari umunyawaita umbeu arama sesewara, nyãse umunya penye arama puranga, uxari amana uwari puranga, uxari yuiri iya panye kua iwa umusuuri arama pepia puranga timbiu irumu panye purangawaita irumu yuiri. 18 Asui kuajintu tiaintaupuderi aintaumuapatuka kuaita miraita irumu kua nyenga tiarama aintauyuká ainta supe nimbawa.
Aintauputari aintauyuká Paulu
19 Maa aintauri kuaita yepeyepe judewita Antiukia sui Ikuniu sui yuiri asui aintaumpiaiwa kuaita miraita, asui aintauyuká putari Paulu ita irumu, asui aintausiki ae tetama sui aintaumanduari umanuana ae. 20 Asui kuaita umbuewaita aintauyumuatiri suaki aintaumaa ae, asui upuamu usu uwike tetama kiti. Asui yepe ara rire usu Derbe kiti Barnabe irumu. 21 Asui aintaumbue rire kua nyenga purangawaa aintauxari siya aintaumbuewaita uruyariwaita, asui aintauyuiri mukuĩsawa Listra kiti Ikuniu kiti yuiri Antiukia kiti yuiri. 22 Asui aintaumukirimbawa aintapia kuaita aintaumbuewaita aintaumbeu ainta supe aintauruyari arama kirimbawa, asui aintaumbeu yuiri ainta supe:
—Yarikute yapurara yawike arama yaneruixawa Deus umunduwaa upe. 23 Asui aintauxari serakuenawaita ingreja yaweyawe, asui aintaumbeu rire Deus aintauyukuaku rame aintauiku aintauxari kua aintauruyariwaa yaneruixawa usaru ainta. 24 Asui aintausasawa Pisidia piterupi aintausuwaa upe Panfilia kiti. 25 Asui aintaumbue rire kua nyenga Perje kiti aintausu Atalia kiti. 26 Asui aintausu Antiukia kiti naviu upe akitiwaa aintauxari ainta Deus grasa supe aintaupuraki arama ixupe, kuiri aintaumbauwaa aintaumunya kua aintaumunduwaa aintaumunya. 27 Asui aintausika rire akiti aintauyumuatiri kuaita ingreja puraita asui aintaumbeu ainta supe maye Deus umunya ainta supe, maye yuiri uxari aintauruyari ae Kuaita tiwaita judeu. 28 Asui uikupuku aintauiku aintairumu kuaita umbuewaita.