—Kaja pamá palani wani ñakareji chu nuká meꞌetení, palá nojé wani aꞌawaná nakiyá laꞌakanami riká. Eyá ilé kaichama, Tupana purákaꞌalo lanaꞌakéjami iꞌimakare chu, yáꞌaro mapéjari ñakareji chu. Pirájina ímami nakiyá laꞌakanami jaꞌapí riká, ñakele nuwata chuwa Tupana ñakaré laꞌakana.

3 Natán kemari rijló:

—Pilaꞌá piwátaka ke, pijwákeꞌewe Tupana iꞌimakale.

4 Eꞌiyonaja riwakajé lapija Tupana kemari Natanjlo: 5 “Piꞌijná nujwaꞌateje David chaje, pimicha rijló mékeka nuká kemaká rinaku: ‘Unká riká kalé laꞌajeri nojló pají, nuꞌumakáloje richu penaje. 6 Nóchoꞌotaka aꞌajútaya Egipto teꞌeré eyájena liyá iꞌimaká wakajé eyá, maárejecha, unká joꞌó nuꞌumalá pají chu. Pirájina ímami nakiyá laꞌakanami pají kaje chuja nuꞌumaké ijwaꞌaté. 7 Ilé keja nuꞌumajika aꞌajútaya waꞌaté iꞌimajika, eꞌiyonaja unká numaké nawakáraꞌajeño nakiyánajlo, nalaꞌakáloje nojló pají aꞌawaná palá nojé nakiyá laꞌakanami’. 8 Ñakele pimá nujwaꞌateje Davidjlo mékeka nuká Tupana, piyukeja wani weꞌepika nakaje laꞌakana, kemaká rinaku: ‘Nuká jáchoꞌotari piꞌimaká ovéjana amájeri iꞌimakana chiyá, noꞌokáloje piká piyukeja Israel lakénami wakáraꞌajeri penaje. 9 Paꞌapájika ewá nuꞌumaké pijwaꞌaté, noꞌoké kaja piñathé chapú inaku péchuruna cháꞌatakana aú. Nupalamane chuwa kajrú inaꞌukena jemaꞌaká palá pilaꞌakare yukuna. Inaꞌuké, ajopana chaje iꞌimakaño, yukuna jemaꞌakó apú ewá, apú ewá ke, ke kaja piyukuna jemaꞌakó nupalamane.

10-11 ‘Chuwa kaja nulamáꞌata marí teꞌerí nuleꞌejena inaꞌukénajlo, riꞌimakáloje nateꞌeré penaje. Unká na kalé kawílaꞌaje inaku re, nakawílaꞌajika ichiꞌinami nakú iꞌimajika ke. 12 Pitakaꞌajika ejomi, apú piꞌirí yurejo piño papumí chojé neꞌemakana penaje. 13 Riká wakáraꞌajeri nuñakaré penaje laꞌakana nojló, nupalamane aú palá kaja riwakáraꞌajika. Ñakeja kaja riyanimínami wakáraꞌajika papumíchojekaka ke rejomi. 14 Raraꞌapá ke nuꞌumajika rijló, eyá riká iꞌimajeri nuꞌurí ke nojló. Rilaꞌajika ee puꞌuwaré, nuwajaje riká. Iná jaraꞌapá wajaka iná, ke kaja nuwajájika riká. 15 Unká nuyurílaje íkiꞌija riwátakana iꞌimajika, nuyurika Saúl wátakana iꞌimaká ke. Riká penájemi nóchoꞌota iꞌimakana kaje chiyá iꞌimaká, noꞌokáloje piká rapumí chojé penaje. 16 Ñakeja pilakénami iꞌimajika neꞌemakana kaje chu. Palá numejñátajika neká, najwaꞌatéjena iꞌimajíkaño waꞌaté. Ilé ke iꞌimajika najló palá ñakeja’ ”, ke Tupana kemaká Natanjlo, raꞌapátakaloje riyukuna Davidjlo penaje.

17 Rejomi Natán iꞌijnari riyukuna iꞌimajé Davidjlo, Tupana kemaká rijló chuwá. 18 Riꞌimaká rijló riyukuna ejomi, David iꞌijnari Tupana waꞌaté puraꞌajó. Rimá rijló: “Tupana, unká na kalé nuká, unká kaja na kalé nojena, paꞌakáloje nuká neꞌemakana penaje. 19 Chuwa richaje wani piwátaka nunaku laꞌakana palá. Piwata kaja nulakena iꞌimaká ñakeja kaja papumí chojéchaka ke, pileꞌejena inaꞌukena wakáraꞌajeño. Unká na apú iꞌimalá inaꞌuké eꞌiyá piká ke. 20 ¿Na nakú chi numajla pijló, Tupana, kaja piweꞌepí palá mékaje inaꞌukeka nuká, pijwaꞌaté jápajeri nuká? 21 Palá waja piyukeja nakaje pilaꞌakare. Kaja pimaká rinaku iꞌimaká chuwá pilaꞌá riꞌimaká. Kaja keja piwátaka riꞌimaká, nomákaloje riká penaje. Tupana, nupechu iꞌimakare chojé kaphí, piyukeja laꞌajeri wani piká. 22 Unká na apú iꞌimalá piká ke kaja, pikaja kalé iꞌimari iná chiꞌinárikana, unká na apú iꞌimalá inaꞌuké chiꞌinárikana. Wemaꞌaká piyukuna iꞌimaká, keja piká. 23 Pileꞌejena inaꞌukena piyukeja Israel michú lakénami, unká ajopana inaꞌukena iꞌimalá marí ejaꞌawá chu weká ke kaja. Kaja pilaꞌá kajrú nakaje wajló, Tupánaja kalé weꞌepíkare laꞌakana kaje. Raú kajrú piyukuna jemaꞌakó piyuke ejaꞌawá chuwá. Piká, Tupana, iꞌimatari waꞌajútaya michuna Egipto eyájena liyá, weꞌemakáloje pileꞌejena inaꞌukena penaje. Waꞌajútaya michuna iphaka majó iꞌimaká wakajé, páchoꞌota najló inaꞌuké maárowa iꞌimakaño nateꞌeré nakiyá, nateꞌeremi yurikoloje najló penaje. Raú pikapichata paminana iꞌimakaño napiyá, piyukeja nachiꞌinárikana ke iꞌimakaño najló waꞌató. 24 Kaja keja pipechu nakú riꞌimaká, Israel michú lakénami iꞌimakáloje pileꞌejena inaꞌukena ñakeja wani penaje. Eyá piká iꞌimajeri ñakeja wani, iná pechu iꞌimajíkare chojé kaphí”, ke David kemaká Tupánajlo.

25 Rimá piño rijló: “Ñakele, Tupana, pilaꞌajé pimaká nunaku ke; ñaké kaja pilaꞌajika nulakénami iꞌimajíkarena nakú, weꞌemakáloje nawakáraꞌajeño, pimaká wanaku iꞌimaká keja penaje. 26 Nuwata kajrú inaꞌukena jemaꞌaká piyukuna, nemakáloje kaja pinaku: ‘Tupana weꞌepiri piyukeja nakaje laꞌakana, riká Israel michú lakénami chiꞌinárikana’, ke. Nuwata pamaka palá nujwaꞌatéjena, pajluwaja chuwá péchuruna waja neꞌemakáloje penaje. 27 Tupana, piyukeja weꞌepika nakaje laꞌakana piká. Piká kemari nunaku, nulakena iꞌimakáloje kaja nawakáraꞌajeño penaje. Ilé ke pimakale nunaku, kaphí nupechu, nupuraꞌakóloje pijwaꞌaté penaje. Mapeja pijwaꞌaté jápajeri nuká. 28 Tupana, piká iná chiꞌinárikana, kewaka nakaje pimakare nakú. Kaja pimá nunaku: ‘Nuká laꞌajeri piká palá’, ke. 29 Numá pijló, pilaꞌakáloje ñaké kaja nulakena iꞌimajíkarena nakú palá, piꞌimakáloje kaja namejñátajeri penaje. Piká, Tupana, nupechu iꞌimakare chojé kaphí, kemari nakaje pilaꞌajíkare nojló nakú. Ñakeja wani pilaꞌajika nulakénami palá”, ke David kemaká Tupánajlo.