3 Riwakajé kaja Samuel michú takaꞌarí iꞌimaká. Kajrú israelítana iyaka riꞌimaká michú, rejomi najaꞌá ritami riñakajélami, pajimila Ramá e iꞌimakare ejé. Riká pajimila nakú kaja rimothoꞌó iꞌimaká. Saúl wakáraꞌari piyukeja mariꞌichuna, mariꞌichólona waꞌaté, jáchoꞌoko riteꞌeré nakiyá iꞌimaká. Neꞌiyajena puraꞌakeño kaja takaꞌakaño michuna péchumi waꞌaté, nakejáꞌakaloje nakaje yukuna naliyá penaje. Neká kajena riwakáraꞌa jáchoꞌoko nateꞌeré eyá piyukeja.

4 Kajrú filistéona leꞌejena suráana awakako piño pajimila Sunem awaꞌajé. Eyá Saúl awakátari kaja rileꞌejena suráana pajimila Guilboa awaꞌajé. 5 Eꞌiyonaja Saúl amaka aú íkiꞌiruna wani filistéona iꞌimaká, kajrú wani rikeroꞌokó. Kaja unká rinapona tejmú iꞌimalá rejéchami rijló. 6 E ripuraꞌojla Tupana waꞌaté, riweꞌepíkaloje mékeka riwátaka nalaꞌaká penaje, eꞌiyonaja unká raꞌajipalá rijló. Manumarú keja Tupana iꞌimaká rijwaꞌaté; unká kaja ripuraꞌaló rijwaꞌaté ritapú; unká kaja ripuraꞌaló Ripurákaꞌalo jaꞌapátajeño waꞌaté, naꞌapátakaloje riyukuna rijló penaje. 7 Manumarú keja Tupana iꞌimakale Saúl waꞌaté, raú rimá raꞌapiyatéjenajlo:

—Ikulá nojló pajluwájaru mariꞌicholo, puraꞌayó palá kaja takaꞌakaño michuna péchumi waꞌaté, nuꞌujnakáloje ruchaje rujwaꞌaté puraꞌajó.

Nemá rijló:

—Re pajluwájaru pajimila Endor e, puraꞌayó palá kaja takaꞌakaño michuna péchumi waꞌaté.

8 E Saúl aꞌarí rinakuwá aꞌarumakaji apoꞌojó kaja, inaꞌuké weꞌepika piyá riká. E lapí riꞌijná ruchaje, iyamá rijwaꞌatéjena waꞌaté. Runaku riphá, rajalaka ruká, rimá rojló:

—Numá pijló, pilaꞌá nojló nakaje: piphata majó nojló numajíkare nakú pijló péchumi.

9 Rumá rijló:

—Kaja piweꞌepí mékeka Saúl laꞌaká iꞌimaká. Kaja riwakáraꞌa piyukeja mariꞌichuna, mariꞌichólona, eyá kaja takaꞌakaño michuna péchumi waꞌaté puraꞌajeño, jáchoꞌoko piyuke rijwaꞌatéjena eꞌiyayá, riteꞌeré nakiyá iꞌimaká. ¿Eta naje chi piwakáraꞌa ta nulaꞌaká piño ñaké? Pipachá ta kaꞌajná Saúl wakáraꞌajla nonókana. Ilé kaje penaje kaꞌajná pijiꞌichá majó —ke rumaká rijló, unkale ruweꞌepila Saúl ka riꞌimaká.

10 Eꞌiyonaja Saúl kemari rojló:

—Tupana ií aꞌakana aú numá pijló: Unká riꞌimalaje ñaké pijló, unká na laꞌalaje piká chapú.

11 Raú rumá rijló:

—¿Mékaje inaꞌuké michú péchumi chi piwata nuphátaka majó pijló?

—Samuel michú péchumi.

12 —Je —ke.

E manaꞌí chiyó romá Samuel michú péchumi iphaka rujlú chojé, raú rowíyoꞌo kaphí. E rumá Saúljlo:

—¿Naje chi pipajlicha ta nujwaꞌaté? ¡Weꞌemakana Saúl ta piká!

13 —Pikeroꞌoniño —ke rimaká rojló—. ¿Na pamá?

—Inaꞌuké michú péchumi nomá jáchoꞌoko majó teꞌerí eꞌiyayá.

14 —¿Meke ramákana?

—Pajluwa phíyuꞌuke riká, waphereni raꞌarumaká rinaku.

Raú riweꞌepí Samuel michú péchumi riꞌimaká. Raú rijlámaꞌo teꞌerí eꞌiyajé, riphákale raꞌapí. 15 E Samuel michú péchumi kemari rijló:

—¿Na penaje chi pikawílaꞌa nunaku? ¿Naje piwakáraꞌa nupéchumi iphátakana majó?

E Saúl kemari rijló:

—Kajrú wani nowó kaꞌakole, nuwakáriꞌicha pipéchumi iphátakana majó. Kajrú filistéona awakako piño, nenókakoloje wajwaꞌaté penaje. Kaja Tupana yurí nuká, unká raꞌalá rinakojó nuká. Unká kaja ripuraꞌaló nujwaꞌaté nutapú. Unká kaja ripuraꞌaló Ripurákaꞌalo jaꞌapátajeño waꞌaté, naꞌapátakaloje nojló ripurákaꞌalo yukuna. Ñakele nuwakáriꞌicha pipéchumi iphátakana majó, pimakáloje nojló mékeka walaꞌajika chuwaka penaje.

16 Samuel michú péchumi kemari rijló:

—¿Na penaje chi piwata nuliyá riyukuna kejáꞌakana? Kaja Tupana yurí piká, ñakele chapú ramaka piká chuwa. 17 Tupana kemari nojló mékeka nakaje iꞌimajika pijló nakú iꞌimaká. Kaja noꞌopata riyukuna pijló iꞌimaká. Kaja rikaꞌá piká neꞌemakana kaje chiyá, raꞌakáloje David papumí chojé penaje, 18 unkale pemaꞌalá raꞌapiyá iꞌimaká. Rimá pijló iꞌimaká, pikapichátakaloje piyuke wani amalecítana, eꞌiyonaja unká pikapichátala neꞌemaká. Ñakele rilaꞌá pitejena meꞌetení. 19 Raú muní Tupana yuríjika filistéona cháꞌataka iká. Muní piká, piyani waꞌaté, iꞌimajika maare nujwaꞌaté. Piyuke israelítana jaꞌajiko nakápeje —ke rimaká rijló.

20 Ilé kaje aú Saúl pojloꞌoró. Pajimaꞌaló ritami toꞌokó teꞌerí eꞌiyá, kaja takaꞌaká ke. Kaja pajluwa kala, lapí waꞌató, unká rajñala raꞌajnewá. 21 Mariꞌicholo amaka aú keroꞌokajo cháꞌataka riká, ruꞌujná rawaꞌajé, rumá rijló:

—Kaja nuliꞌichá pijló, pimíchaka nojló iꞌimichaka ke. Nonókana iꞌimichárijla, eꞌiyonaja nomiꞌichá paꞌapiyá. 22 Chuwa nuwata kaja pemaꞌaká noꞌopiyá. Noꞌojé pijló wejápaja aꞌajnejí, pajñákaloje penaje, raú pipechu palaꞌakóloje, pipaꞌakóloje penaje.

23 Unká Saúl wátala raꞌajnewá ajñakana, eꞌiyonaja mawó raꞌapiyatéjena, eyá ruká, kele laꞌaká riká rajñákaloje raꞌajnewá penaje. Kaja ewaja ráchoꞌo yáꞌajo. 24 Ñakele ruꞌujná, ronó jema pirakana iꞌirí ñópoꞌojlo, najñákaloje riꞌimi penaje. Romothoꞌó riká, roꞌomá kaja rijló pan. 25 Ruñapátakaja aꞌajnejí laꞌakana ejomi, roꞌopata Saúljlo riká, rijwaꞌaté iꞌimakáñojlo waꞌaté. E kaja najñá naꞌajnewá, rejomi neꞌemá nayukuno. E riká lapí jápija napaꞌó reyá.