—Tupana, kaphí weká israelítana pechu iꞌimakare chojé, kemari: “Júpimi aꞌajuta michú Térah iꞌimakeri juni Éufrates cha iꞌimajika. Riyani iꞌimaño iyamá achiñana: Abraham, Nahor waꞌaté. Najwaꞌaté riꞌimaké rewá. Riwakajé napechu iꞌimaké mapeja ajopana nakú: ‘Wachiꞌinárikana neká’, ke. Ilé ke aꞌajútaya michuna pechu iꞌimajika”. 3 Marí ke Tupana kemaká wanaku: “Nuká Tupana jáchoꞌotari Éufrates turenaya aꞌajuta michú Abraham iꞌimaká, riꞌijnakáloje majó Canaán teꞌeré nakojó pitá penaje. Noꞌó kaja riñathé, kajrú wani rijwaꞌatéjena iꞌimakáloje penaje. Paineko noꞌó riñathé, riꞌirí Isaac iꞌimakáloje penaje. 4 Noꞌó kaja riꞌirí ñathé iꞌimaká, riyani iꞌimakáloje iyamá: Jacob, Esaú waꞌaté. Riká Esaujlo noꞌó Seír teꞌeré, riká piyuke ipuré eꞌiyowá iꞌimakare. Eyá Jacob, riyani, rilakena waꞌaté, iꞌijñano Egipto ejo iꞌimaká. 5 Rewá neꞌemaké. Nóchoꞌotakaloje neꞌemaká reyá penaje nuwakáraꞌa Moisés, Aarón waꞌaté, iꞌijnaká rejo iꞌimaká. Nukapichata Egipto eyájena liyá piyukeja nayani, paineko mothoꞌokaño iꞌimaká, raú nayurí aꞌajútaya jáchoꞌoko reyá iꞌimaká. 6 Náchoꞌoko reyá iꞌimaká wakajé, suráana Egipto eyájena jechoꞌótaño neꞌemaká peꞌiyowa jaꞌapaka, kawaruna chíraꞌakare chu. Eyá nakawarútena nakú nechoꞌota neꞌemaká, ají ke juni jalomi Kerálani ejé. 7 Riwakajé nemá nojló, nuꞌumatákaloje neꞌemaká naliyá penaje, raú nóchoꞌota kalajeruni nachá iꞌimaká. Riká tamákaꞌatari neꞌemaká paliyáaka. Rejomi nuwakáraꞌa juni apáraꞌataka piyukeja Egipto eyájena, raú nakapichó rakojé.

“Rejomi júpija ichiraꞌakó desierto chuwá iꞌimaká. 8 Kaja ewaja nuwaꞌa iꞌimaká amorréona teꞌeré ejo, Jordán paꞌanojo pitá, kamú jeñoꞌoká ejo pitá nakojó. Neká nókaño ijwaꞌaté iꞌimaká. Nupalamane icháꞌata neꞌemaká, nateꞌeremi yuríkoloje ijló penaje. 9 Rejomi Moab teꞌeré eyájena iꞌimakana Balac iphari kaja rileꞌejena suráana waꞌaté, nenókakoloje ijwaꞌaté penaje. Paineko Balac wakáraꞌari ajopana rijwaꞌatéjena Balaam kulaje, riyerúkaꞌakaloje ichaje penaje. 10 Eꞌiyonaja unká nuyurila riyerúkaꞌaka ichaje. Ñakele ripuraꞌó inaku nujwaꞌaté, nulaꞌakáloje iká palá penaje. Ilé ke nuꞌumataka iꞌimaká. 11-12 Rejomi ikuwaꞌa juni Jordán, majó pitá nakojó iꞌimaká. Kaja ewaja iphá pajimila Jericó ejo. Keꞌiyapejena iꞌimakeño rewá: amorréona, ferezéona, cananéona, hitítana, gergeséona, hevéona, jebuséona, kajena. Iphaka aú rejo, nenoko ijwaꞌaté iꞌimaká. Ñakele nulaꞌá nakaje, nakeroꞌokóloje íkiꞌija wani ipiyá penaje. Nupalamane aú icháꞌata neꞌemaká. 13 Nuká aꞌarí ijló naménami, unká na ejátalare eꞌiyá iꞌimaká; noꞌó kaja ijló pajimila, unká ikoja kalé ilaꞌakare iꞌimaká. Chuwa kaja manaꞌija iká nanánemi waꞌaté; nañakajélami eꞌiyowá iká meꞌetení manaꞌija. Kajrú kaja nakaje yuriko ijló naménami eꞌiyowá, kajmú kaje. Riká ajmaꞌakana nakú iká meꞌetení. Manaꞌija iká nakaje, unká ikoja kalé ejátakare iꞌimaká, icha ajñakana nakú. Apíroꞌo kaja punama kaje, kaja ejátakejami waja nakaje yuriko ijló iꞌimaká”, ke Tupana kemaká wanaku —ke Josué kemaká najló.

14 Rejomi rimá piño najló:

—Ilé ke Tupana laꞌakale weká palá wani aú, nuwata iphaka íkiꞌija wani raꞌapiya. Ilaꞌá riwátaka ke; iyuríniña iliyá riwátaka ke laꞌakana; ipechu iꞌimaniña kaja apú nakaje jenami nakú: “Huachiꞌinárikana”, ke, aꞌajútaya michuna pechu iꞌimajika nanaku, juni Éufrates cha neꞌemajika wakajé, eyá Egipto e neꞌemajika wakajé, ke kaja. 15 Apala unká iwátalaje Tupana jaꞌapiyá jemaꞌakana. Ñakele nuwata iꞌijnataka chuwajá ipéchuwa palá naka palani ijló: Tupana wakáraꞌaka ke laꞌakana kaꞌajná; iwata kaꞌajná ipechu iꞌimaká aꞌajútaya michuna pechu iꞌimajika ke kaja, juni Éufrates cha neꞌemajika wakajé. Riwakajé napechu iꞌimaké ajopana nakú: “Wachiꞌinárikana japi neká”, ke. Iwata kaꞌajná ipechu iꞌimaká amorréona pechu iꞌimaká nachiꞌinárikana nakú ke kaja. Maárowa ñakajélaruna neká. Ñakele iꞌijnatá chuwa ipéchuwa palá naka iwata iꞌimaká ichiꞌinárikana. Nuká kalé, nuyani jaló, nuyani, nulakena, kele waꞌaté laꞌajeño nakaje Tupana wátaka ke —ke Josué kemaká najló.

16 Raú rijwaꞌatéjena kemaño:

—Unká wani wayurílaje waliyó Tupana wátaka ke laꞌakana, wapechu iꞌimakáloje ajopana nakú: “Wachiꞌinárikana japi neká”, ke. 17 Riká Tupana, jáchoꞌotari wachiꞌiná michuna Egipto eyá iꞌimaká, rewá neꞌemaké mapeja najwaꞌaté jápajeño. Riká joꞌó laꞌarí kajrú nakaje wamákare. Rimejñata weká weꞌejnaká ewá. 18 Rikaꞌá wajló maare eyá piyukeja amorréona, maárowa iꞌimakaño, nateꞌeré nakú. Ilé ke rilaꞌakale weká palá, walaꞌajé riwátaka ke. Riká, wachiꞌinárikana wapechu iꞌimakare chojé kaphí, riká —ke nemaká Josuejlo.

19 Eyá Josué kemari piño najló:

—Apala unká méñoꞌojo ilaꞌalaje Tupana wátaka ke, unká wani rilaꞌalá puꞌuwaré. Keraꞌakachi riká, riwata ipechu iꞌimaká rinákuja kalé. Ilaꞌajika ee ipechu keja puꞌuwaré, unká rijñaꞌalaje iká panaku, unká kaja ramálajo ichaje. 20 Iyuríjika ee raꞌapiyá jemaꞌakana iliyó, ipechu iꞌimakáloje ajopana nakú: “Wachiꞌinárikana japi neká”, ke, Tupana laꞌajé iká chapú. Rikapichátaje iká, rilaꞌaká iká palá iꞌimaká eꞌiyonaja.

21 Raú Josué waꞌatéjena kemaño:

—Unká walaꞌalaje ñaké. Walaꞌajé palá Tupana wátaka ke.

22 E rimá najló:

—Ñaké riká. Kaja imicha inakuwá, Tupana wátaka ke ilaꞌajika. Kaja jemiꞌichá mékeka imíchaka inakuwá.

—Aꞌa, kaja wemiꞌichá —ke nemaká rijló.

23 Rejomi rimá najló:

—Ñakele nakaje jenami iꞌimajika ee ikapi, iphákare jaꞌapí, ikaꞌá piyukeja iliyó riká, ipajnoꞌotákaloje ipéchuwa Tupana ejo, ilaꞌakáloje ipechu lokópaꞌala nakaje riwátakare laꞌakana kaje.

24 E nemá piño:

—Walaꞌajé Tupana wakáraꞌaka weká ke. Wapechu iꞌimakare chojé kaphí riká.

29 E kaja meke kala iꞌimajemi Josué takaꞌarí iꞌimaká. Ciento diez jarechí cha riꞌimaká riwakajé. 30 Riñakaré iꞌimaká ejé najaꞌá ritami. 31 Josué iꞌimaká nawakáraꞌajeri ketana, israelítana jemaꞌajika palá Tupana jaꞌapiyá. Ritakaꞌaká ejomi, ñakeja kaja nemaꞌajika raꞌapiyá. Nawakáraꞌajeño iꞌimakaño amaño palá piyuke nakaje Tupana laꞌajíkare israelítana chaya iꞌimajika. Neká penájemina iꞌimaká ketana, nemaꞌajika palá Tupana jaꞌapiyá.

32 Riwakajé najaꞌá kaja Siquem ejé José michú aphinami, najñaꞌakare Egipto eyá iꞌimaká. Teꞌerí, raraꞌapá Jacob michú warúwaꞌakare iꞌimaká, ejé najaꞌá raphinami.