Josué takaꞌaká yukuna marí
23
Kaja ewaja israelítana iꞌimaké palá rewá Tupana palamane, unká chapú nanaku péchuruna kawílaꞌake nanaku. Kaja phíyuꞌuke wani Josué iꞌimaká riwakajé. 2 Raú riwakáraꞌa piyukeja israelítana, nawakáraꞌajeño, pheñawilana kajena waꞌató awakako rejé. Nephaka rinaku ee, rimá najló: “Kaja phíyuꞌuke wani nuká chuwa. 3 Kaja amá mékeka Tupana kapichátaka wajló chapú wanaku péchuruna iꞌimaká. Riká nókakero wachaya najwaꞌaté. 4 Kaja numá ijló iꞌimaká mékajenajloka nateꞌeremi yuríjiko. Re kaja joꞌó ajopana teꞌeré nakiyana, ijñaꞌakáloje ijluwa penaje. 5 Tupana kaꞌajeri nateꞌeré naliyá, nateꞌeremi yurikoloje ijló penaje, rimaká inaku iꞌimaká ke.6 “Ilaꞌá ipéchuwa kaphí weꞌechú kaꞌalá keja, jemaꞌakáloje palá piyukeja Tupana purákaꞌalo, Moisés michú yuríkare wajló iꞌimaká jaꞌapiyá. 7 Re kaja joꞌó ajopana inaꞌukena yuriko maárowa. Unká ilaꞌalaje pulaí kaje pajwaꞌatéchaka, unká kaja iphálaje najwaꞌaté, nemakárena nakú: ‘Wachiꞌinárikana neká’, ke jaꞌapí. Unká kaja jemaꞌalaje purákaꞌaloji, nemájikare nakú nachiꞌinárikanajlo jaꞌapiyá. Ipuraꞌaniño kaja nachiꞌinárikana nakú; imaniña kaja nachiꞌinárikana ií aú nakaje ilaꞌajíkare nakú. 8 Tupana jaꞌapiyaja kalé jemaꞌajé, maárejecha jemaꞌaká raꞌapiyá ke. 9 Tupana kaꞌarí ajopana inaꞌukena maare eyá iꞌimaká, íkiꞌiruna neꞌemaká. Palá weꞌepikaño nókakajo neꞌemaká, eꞌiyonaja Tupana palamane unká nacháꞌatala weꞌemaká, kaja unká na kalé cháꞌatajeri iká. 10 Pajluwaja inakiyana jaꞌapárijla mil chapú inaku péchuruna nakú, neñaojla, Tupana nókajikole richaya najwaꞌaté. Iná ñathé aꞌajeri Tupana, rimaká rinaku iꞌimaká ke. 11 Iweꞌepí inakuwá; iwata íkiꞌija Tupana, ipechu iꞌimakare chojé kaphí. 12-13 Jemaꞌá marí: Unkájika ee jemaꞌá Tupana jaꞌapiyá, ilaꞌajé kaja kaꞌajná pulaí kaje yuriño re joꞌó kaja maárowa waꞌaté. Ilé ke ilaꞌajika ee, unká Tupana kaꞌalaje neká maare eyá ijló. Rejéchami Tupana aꞌajika nañathé, jaꞌakóloje nawenare chojé. Kamejérina jaꞌakó napatajona chojé, ke kaja jaꞌajiko najló, nakapichátakaloje iká piyukeja penaje. Pawajleya iná ñaꞌatákana, ke riꞌimajika ijló. Nakaje luweré joꞌoká iná eꞌiyajé, manaꞌí chiyó pejluya, ke riꞌimajika ijló. Kaja ewaja nakapichátaje iká piyukeja marí palani wani teꞌerí, Tupana aꞌakare ijló nakiyá”, ke Josué kemaká najló.
14 Rimá piño najló: “Yewicha nutakaꞌaká, ñakele nutakaꞌaká yámona, nuwata iweꞌepika palá wani Tupana laꞌaká weꞌemaká nakojé. Ñakele rinákuja nuwata iꞌijnataka ipéchuwa. Kaja raꞌá wajló piyukeja nakaje, rimaká wajló rinaku iꞌimaká ke. 15-16 Ilé rilaꞌaká inaku palá iꞌimaká, ke kaja rilaꞌajika iká chapú, iyuríjika wakajé Ripurákaꞌalo iliyó. Riwakajé riwakáraꞌaje amaka piyukeja chapú kaje yajwé, ikapichákoloje raú piyuke wani marí teꞌerí, palani wani raꞌakare ijló iꞌimaká nakiyá. Iphájika ee ajopana jaꞌapí, ichiꞌinárikana ke neꞌemajíkale ijló, wakajé amaje kajrú wani chapú kaje yajwé. Ijlámaꞌajiko wakajé ajopana nakojé, iná lámaꞌako Tupana nakojé ke kaja, wakajé Tupana yúchaꞌajo kajrú wani ichá. Pachá rikaꞌajé iká marí teꞌerí, raꞌakare ijló iꞌimaká nakiyá”, ke Josué kemaká najló.