1 Kaja Israel lakénami jayaꞌó Moisés wátakana nakú. Unká riphala kiñaja, rimaláraꞌakole júpija rewá, raú nawakó piyuke reꞌewé Aarón nakojé, nemá rijló:

—Ilé Moisés jáchoꞌotari weꞌemaká Egipto teꞌeré eyá iꞌimaká, unká waweꞌepila naka rilaꞌakó. Ñakele chuwa pilaꞌá wajló nakaje jenami, riꞌimakáloje wachiꞌinárikana ke wajló, riwakáraꞌakaloje weká penaje.

2 Raú Aarón kemari najló:

—Imá ilúnajlo, ñaké kaja iyánijlo, nakaꞌakáloje nanakiyó neꞌejwí chiyá kúwaꞌatajona, riká oro nakiyá laꞌakanami. Kéchami neꞌejnatájika nojló riká majó.

3 Raú nakaꞌatá riká piyuke nanakiyó, kéchami neꞌejnataka riká Aaronjlo. 4 Riká yáꞌatari kerápela chaje riká, rejéchami piyuke oro wichoꞌotako. Rejéchami kajrú rijápaka rinaku, kaja ewaja rilaꞌá jema pirakana iꞌirí jenami raú. Ilé ke rilaꞌaká najló jema pirakana iꞌirí jenami nachiꞌinárikanawa penaje. Riñapátaka riká ejomi, Israel lakénami kemaño Aaronjlo:

—Marí iꞌimajeri piyukeja weká Israel lakénami chiꞌinárikana ke; riká jáchoꞌotari weꞌemaká Egipto teꞌeré eyá majó iꞌimaká.

5 Ilé ke nemaká aú, Aarón laꞌarí altar jema pirakana jenami awaꞌá, rejomi rawíyoꞌoko rimaká najló:

—¡Muní wakajmoꞌojiko, wephákaloje Tupana jaꞌapí raú!

6 E muní ke lapiyami napoka. Rejéchami nenoka napirana nakiyana Tupánajlo, ripechu palaꞌakóloje puꞌuwaré nalaꞌakare liyá penaje; ripechu, inaꞌuké pechu waꞌaté iꞌimakáloje palá panakuwáaka raú penaje. Rejomi nayaꞌo riꞌimi ajñakana nakú, neꞌerá kaja nakaje jalá. Rejomi keyajupa neꞌemaká pajwaꞌatéchaka.

7 Rejéchami Tupana kemaká Moisesjlo:

—Chuwa piwitúkaꞌa pijwaꞌatéjena, páchoꞌotakarena Egipto teꞌeré eyá iꞌimaká ejo, kaja piyuke nakapichájiko chuwa. 8 Kiñaja wani nayurika naliyó Nupurákaꞌalo noꞌokare najló iꞌimaká. Nalaꞌá najluwa jema pirakana iꞌirí jenami, oro nakiyá laꞌakanami. Rikajlo nalaꞌá puꞌují napéchuwa, rinaku kaja nemá: “Marí wachiꞌinárikana jáchoꞌotari weꞌemaká Egipto teꞌeré eyá iꞌimaká”, ke. 9 Kaja nuweꞌepí mékajenaka inaꞌuké neká. ¡Unká wani wátalaño noꞌopiyá jemaꞌakana neká! 10 Ñakele piwata meꞌetení, nuꞌujnatachi nupéchuwa. Kaja wani nuyúchiꞌicho chuwa nachá, nukapichátaje piyuke neká. Eyá piká nulaꞌajé palá, pilakénami iꞌimakáloje kajrú penaje, raú íkiꞌiruna neꞌemajika piño nujwaꞌatéjena penájena —ke Tupana kemaká Moisesjlo.

11 Eꞌiyonaja Moisés wátari Tupana yuchá yakátakana, ñakele rimá rijló:

—¿Naje piyúchaꞌo kajrú wani pijwaꞌatéjena inaꞌukena cha? Piká iꞌimatari neꞌemaká Egipto eyájena liyá iꞌimaká. 12 Pikapichátakela neká, Egipto eyájena kemajla kaꞌajná pinaku: “Riwaꞌa neꞌemaká maáreya, rikapichátakaloje neká yaꞌajná ipuré awaꞌajé penaje”. Piyúchaꞌaniño wani nachá. 13 Piweꞌepí mékeka pimájika Abraham michujlo iꞌimajika: “Kajrú pilakénami iꞌimajika, iwijrina ke íkiꞌika”, ke. Ñaké kaja pimájika Isaac michujlo, Jacob michujlo waꞌaté iꞌimajika. Pimaké kaja nanaku iꞌimajika: “Noꞌojé najló teꞌerí nateꞌerewa penaje, neꞌemakáloje waꞌajini wani rinaku penaje”, ke pimájika najló iꞌimajika —ke Moisés kemaká Tupánajlo.

14 Raú Tupana weꞌepiri namuꞌují, ñaké iꞌimakale unká rikapichátala neꞌemaká.

15 E kaja Moisés witúkaꞌari reyá iyamata jipa rikapi ke. Rinaku, iyamá pumitanó, Tupana lanaꞌarí Ripurákaꞌalo nakiyana iꞌimaká. 16 Tupana keñoꞌótari riká jipa iꞌimaká, rikaja kaja lanaꞌarí Ripurákaꞌalo rinakojé iꞌimaká.

17 Yewicha nephaka nanaku ee, jukaya Josué jemaꞌarí Israel lakénami awíyoꞌoka mejé, raú rimá Moisesjlo:

—Nókakajo wakajé nawíyoꞌoka, ke wani namejé napajré iꞌimaká ewá.

18 Raú Moisés kemari rijló:

—Unká iná cháꞌataka wakajé iná jatanika, ke kalé natanika; unká kaja natanila iná kapichako wakajé, iná ataníkare kaje; apú ke wani kele ataníkaje nomaꞌá natanika.

19 E kaja neꞌejná nawaꞌajé kemachi, reyá Moisés amari jema pirakana jenami, oro nakiyá laꞌakanami táraꞌako. Ramá kaja kajrú narápaꞌaka. Ilé kaje aú Moisés yúchaꞌaro íkiꞌija wani nachá, raú rikaꞌá jipa rikapi iꞌimakare rikápiyo teꞌerí eꞌiyajé. Rejé rimajákaꞌato. 20 Rejomi rikapichata naliyá jema pirakana iꞌirí jenami nalaꞌakare iꞌimaká. Rijupéraꞌa riká keꞌejiwí, rejomi rikojloꞌó riká juni jakojé. Kéchami riwakáraꞌaka piyuke Israel lakénami iꞌiraká riká juni. 21 Rejéchami rimaká Aaronjlo:

—¿Meke mariruna inaꞌukena laꞌaká piká ta, pilaꞌakáloje nakaje puꞌuwaré wani najló penaje?

22 Raú Aarón kemari rijló:

—Piyúchaꞌaniño nuchá. Piweꞌepí mékajenaka kajona inaꞌukena, kaja puꞌuwaré laꞌakanaja nawata. 23 Nemá nojló iꞌimaká: “Pilaꞌá wajló nakaje jenami, riꞌimakáloje wajló wachiꞌinárikana ke penaje, riwakáraꞌakaloje weká penaje. Riká Moisés, jáchoꞌotari weꞌemaká Egipto eyá iꞌimaká, kaja unká waweꞌepila mékeka rilaꞌakó ta”, ke nemaká nojló iꞌimaká. 24 Raú numá najló iꞌimaká, nawakátakaloje nojló piyukeja nakaje oro nakiyá laꞌakanami. Riká naꞌá nojló iꞌimaká ejomi, nukaꞌá riká kerápela chojé. Reyá marí jema pirakana iꞌirí jenami jáchoꞌoro nojló iꞌimaká.

25 Moisés amari kaja rileꞌejena inaꞌukena iꞌimaká puꞌuwaré laꞌakaná nakú maparátano ke. Ñaké iꞌimakale chapú nanaku péchuruna laꞌaké namákaja neká. Unkale Aarón weꞌepike nawakáraꞌakana palá, unká rimaké najló nalaꞌaká piyá puꞌuwaré. 26 Ilé ke Moisés amaka aú, ritáraꞌo rijwaꞌatéjena jimaje, e rimá najló:

—Wátaño Tupana jaꞌapiyá jemaꞌakana, iꞌijnajeño majó nowaꞌajé. Raú piyuke Leví michú lakénami awakaño rawaꞌajé.

27 Rejéchami Moisés kemaká piño najló:

—Tupana, iwakáraꞌajeri, kemari marí ke: “Piyukeja iká ñaꞌajeño ijwaꞌató ijajálune, rejomi ipaꞌajó napajré iꞌimaká ejo. Iphájika ee rejo, jaꞌapaje piyuke ikáꞌana ñakaré chuwá, inókaloje pajluwano, pajluwano ke, ejena nakiyana. Piyukeja inójika ikáꞌana nakiyana waꞌató” —ke Moisés kemaká najló.

28 Raú Leví michú lakénami laꞌañó Moisés wakáraꞌaka neꞌemaká ke. Riwakajé nenó tres mil ewá inaꞌukena iꞌimaká. 29 Rejomi Moisés kemari najló:

—Inakiyana nóchaño iyani nakiyana, ejena nakiyana waꞌató, puꞌuwaré laꞌajeñó neꞌemakale. Marí ke iliꞌichákale, palani chuwa iká Tupánajlo, iꞌimakáloje purákaꞌaloji lamáꞌatajeño inaꞌukena chaya rijwaꞌaté penaje. Ñakele chuwa iká iꞌimajeño Tupana palamane.

30 Muní ke Moisés kemaká rileꞌejena inaꞌukénajlo:

—Puꞌuwaré wani ilaꞌaká. Chuwaka nuꞌujrajika piño ipuré jiꞌiwátaje, nupuraꞌakóloje piño Tupana waꞌaté ichaya. Apala ramajo kaꞌajná ichaje puꞌuwaré ilaꞌakare liyá.

31 E muní ke, Moisés paꞌakó piño ipuré jiꞌiwátaje Tupana waꞌaté puraꞌajó. Re ripuraꞌó Tupana waꞌaté rijwaꞌatéjena chaya, rimá rijló:

—Puꞌuwaré wani nujwaꞌatéjena laꞌaká, nalaꞌakale nakaje jenami najluwa oro nakiyá, riꞌimakáloje nachiꞌinárikana ke najló penaje. 32 Eꞌiyonaja numá pijló, pamó nachaje, nalaꞌakale puꞌuwaré. Unkájika ee pamó nachaje, palaka nuí pipapérane chiyá, piyáꞌatakare chojé pijwaꞌatéjena ií iꞌimaká. Nachaya pikaꞌá nuká pijwaꞌateje iꞌimakana chiyá.

33 Eꞌiyonaja Tupana kemari rijló:

—Unká jemaꞌalaño noꞌopiyá, neká ií ja kalé nolákaje nupapérane chiyá. 34 Ñakele chuwa pipaꞌó papumí chuwá. Eko piwaꞌa nuleꞌejena inaꞌukena teꞌerí, numakare nakú pijló iꞌimaká ejo. Nujwaꞌateje, jeꞌechú chiyaje, kemájeri pijló nakaje pilaꞌajíkare nakú. Inaꞌuké wajákana iphájika rená chojé wakajé, nuwajaje puꞌuwaré laꞌajeñó —ke rimaká Moisesjlo.

35 Nephákale nakaje jenami Aarón laꞌakare najló iꞌimaká jaꞌapí, pachá nalaꞌó natámina.