—Chuwa piꞌijná maáreya, panúkaꞌakoloje Betel ejo penaje. Piphájikaja rejo ee, pipitaje nojló jipa altar penaje. Re nuyaꞌató pijló iꞌimaká, piñaakó wakajé Esaú liyá.

2 Neꞌejnaká reyá yámona, Jacob kemari piyuke rijwaꞌatéjenajlo:

—Apala re kaꞌajná inakiyana kapi ichiꞌinárikana jenami, ipechu iꞌimakare chojé kaphí mapeja Tupana apumí chojé. Riꞌimajika ee ikapi, ikupá riká inane eꞌiyayá. Rejomi aꞌapitiya, apiyákachi aꞌarumaká. 3 Meketana iꞌimajemi weꞌejnajé maáreya Betel ejo. Re nupitaje jipa, palá nupechu iꞌimakale Tupana nakú. Chapú kaje yajwé nomaka iꞌimaká wakajé, raꞌá nuñathé, noꞌopákaloje richiyá. Nujwákeꞌewe riꞌimaká nuchiraꞌakó ewá.

4 E neꞌematá rijló nachiꞌinárikana jenami, napechu iꞌimajíkare chojé kaphí mapeja Tupana apumí chojé. Neꞌejnatá kaja rijló neꞌejwí chuwá kúwaꞌatajona. Rijñaꞌá naliyá riká, rejomi rijaꞌá riká Siquem awaꞌajé, aꞌawaná jiꞌilaje, rikapichátakaloje riká penaje. Rejomi naꞌapá reyá piyukeja. 5 Rejéchami Tupana keroꞌótaka rewá iꞌimakáñojlo, nakeroꞌokóloje Jacob, rijwaꞌatéjena, kele piyá, nalaꞌaká piyá neká chapú. 6 Naꞌapá reyá ají ke pajimila Luz ejo. Naꞌaké kaja riká pajimila ií Betel, ke, Canaán teꞌeré nakú riꞌimá. 7 Rejé ripitá piño jipa altar penaje, palá ripechu iꞌimakale Tupana nakú. Raꞌá rapukuna ií El-Betel, Tupana yaꞌatakole rijló re, riñaakó reꞌewé liyá iꞌimaká wakajé.

16 Rejomi neꞌejná piño reyá apoꞌojó Efrata ejo. Juká kemachi joꞌó neꞌemaká pajimila liyá ee, ruꞌurí amaro Raqueljlo. Kajrú wani romaka kewini yajwé rijwaꞌaté. 17 Rulakaꞌapheja wani ruwáꞌaka ruꞌurí ejéchami, ruñathé aꞌajeyo kemaká rojló:

—Pikeroꞌoniño, achiñá piꞌirí piwáꞌichaje.

18 Eꞌiyonaja kaja yewíchaja wani rutakaꞌaká. Kaja penaje rutakaꞌaká yámona, roꞌó ruꞌurimi ií Benoni ke. (“Chapú kaje yajwé nomaka eꞌiyá rimothoꞌó iꞌimaká”, ke kemakánaka rií iꞌimaká.) Eꞌiyonaja rejomi raraꞌapá aꞌá rií Benjamín ke. (“Riká nulaꞌajíkare palá”, ke kemakánaka rií.) 19 Ilé ke Raquel micholo takaꞌaká iꞌimaká. Iñeꞌepú Efrata ejo iꞌijnaká turenájeja najaꞌá rutami. Rejomi napiyaka pajimila Efrata ií. Belén, ke rií chuwa.

27 Rewá Jacob iꞌimaké wakajé, riꞌijná ají ke Mamré ejo raraꞌapá amaje. Apú pajimila ií iꞌimari Arbá, eyá Hebrón, re Abraham michú, eyá riꞌirimi Isaac ñakajela iꞌimaké. 28 Ciento ochenta jarechí ketana Isaac iꞌimaká ejaꞌawá chu, e ritakaꞌá. 29 Richiꞌiná michuna ápumichu riꞌijná. Kaja phíyuꞌuke wani riꞌimaká ritakaꞌaká iꞌimaká wakajé. Riyani, Esaú, Jacob waꞌaté, toꞌotaño ritami támijimina toꞌotákelana chojé.