Feni neꞌiau, i dinaa aꞌa ei rafeia, ei na haguaa roꞌou mei Haidaa, mei hia Ama. I dinaa aꞌa ei ina omaꞌaa roꞌou Jesus Christ:

2 Faloloaꞌia, gutafarawania ma hagua i oa fabauanai aꞌa hamuꞌou.

3 Ena tafiu, unamina refufefu ba a neꞌifaꞌarewaia aꞌa hamuꞌou ba batanai fei telaꞌanaa oꞌou, maꞌuaa una nara ba neidoꞌo neꞌi ba hamonei wagiꞌinaa fei narafaweꞌia, fei nadoꞌo dinaa aꞌa minaa ei apunaiaa mei Haidaa mina. 4 Uaa mina, na paꞌi ramaꞌa, ei hefiꞌa na neꞌinaa roꞌou ba roꞌawe to aree roꞌou.^a Ma ei ba roꞌaa to aree roꞌou, rona fawawadidi dupuaa hamuꞌou. Lomi rona paꞌi maumau mei Haidaa ma rona filoginaa fei rawaniꞌaa mei Haidaniaa oꞌou aleꞌei eꞌeaa pinee roꞌou ba ro bigiꞌaa ei hafeloꞌa nunumiaa roꞌou ma ofadugaa Jesus Christ, mei hia ua Hapara ma Fasuu oꞌou.

5 Hamona apaꞌidigaa fei, maꞌuaa unei fanonominaa hamuꞌou ba mei Fasu^b na fabaguanaa ei maroana yei Egypt, maꞌuaa nenee fei, na fapedugaa ei lomi rona narafaweꞌi. 6 Ma ei aloꞌalo, ei lomi rona panarofaa ei gutanaa roꞌou, maꞌuaa rona diꞌininaa fei foraforaa roꞌou i pafea—ina fawiꞌaa roꞌou aꞌa fei roromaa ma roꞌaa roroꞌai aꞌa ei alatai nopaꞌaloo fei dududua wagii fei baua Arewaa. 7 Ana aleꞌei, Sodom ma Gomorrah ma ei gufu nanaꞌaa guapaloei, rona faniꞌuaiaa roꞌou aꞌa fei fitatafipaꞌaia ma fihalehaleia. Roꞌou aleꞌei famaꞌamaꞌaa ei roꞌaa tonaa fei fiꞌiaa fei hafi lomi i peretoo.

8 Ana aleꞌei, ei aꞌafolo ei, rona faloloaa ei hudi unuu roꞌou, fadugeaa ei forafora ma warefafeloaa ei rona guta i haroo pafea. 9 Maꞌuaa mei famamoaa ei aloꞌalo, meni Michael, ei i fiharei aꞌa mei haniꞌu wagii fei hudi unuu Moses, ana lomi na ware ba na bigifatata mei haniꞌu, maꞌuaa ina ware ba, “Mei Fasu i warefawanewaneo!” 10 Maꞌuaa ei ramaꞌa ei, rona warefafeloaa tamanu lomi rona apaꞌia; ma aꞌa tamanu manumanu rona nanamuipaꞌia, roꞌou aleꞌei manulelele lomi apaꞌaa roꞌou ma ana siꞌei ei manumanu na fapaꞌainaa roꞌou.

11 Rona fagiana! Rona tonaa fei maumau Cain; ba ro to manumanu rona ponitobatafanaa fei tataa Balaam; rona fagiana aꞌa fei barafeaa Korah.

12 Ei ramaꞌa ei, aleꞌei nanaa figifigi. Rona waduꞌainaa ei baua hananaa hamuꞌou ma hanafipui aꞌa hamuꞌou ma lomi mamafaa roꞌou—aleꞌei ei omaꞌaa sipsipi ro faguaa ana roꞌou. Roꞌou aleꞌei papalei lomi maunu ma fei lalarena na agisiminaa roꞌou, o ei haihai lomi na fuaa ma na afue—rona maꞌe faguapoai. 13 Roꞌou aleꞌei mamauaa fei agi ma na faꞌagigiaa ei mamafaa roꞌou. Aleꞌei ei piꞌu, ei na taletaleꞌualao ma fei paꞌaa roromaa na ude omaꞌaa roꞌou ba ronei oa wagina ranimai ranimai.

14 Enoch, mei faꞌoloromeaia nenee Adam, inadii wareaa eꞌei ramaꞌa eꞌei: “Maꞌa, mei Fasu fi nofipuimai aꞌa pufabaꞌa pufabaꞌa apunaiana 15 ba i dududuaa minaa ei lomi rona paꞌi maumau mei Haidaa ma uniaa minaa ei ramaꞌaa roromaa ba siꞌei ei hafeloꞌa bigiꞌa rona bigifafelo wagina ma ei warefadugeaa roꞌou hia.” 16 Ei ramaꞌa ei, rona bababauꞌu ma labaginaa tataa hefiꞌa; rona neneraa ei hafeloꞌa nunumiaa roꞌou; poronaa roꞌou pafea ma foraiaa pinee hefiꞌa ba fararawanii ana roꞌou.

17 Maꞌuaa, ena tafiu, nonominaa ei diwareaa ei apostle mei Fasuu oꞌou Jesus Christ. 18 Rona warefanaa hamuꞌou ba, “Laloo ei aꞌapoo arewaa ipowe paꞌi ei warefafeifeia, ei roꞌaa neneraa ei hafeloꞌa nunumiaa roꞌou ma abaa maumau mei Haidaa.” 19 Ei ramaꞌa ei, rona fafiꞌalaginaa hamuꞌou. Rona nenegiꞌuaiaa ei nunumiaa ramaꞌa ua ma lomi rona paꞌi fei Spiriti.

20 Maꞌuaa hamuꞌou, ena tafiu, fagipeaa fei narafaweꞌiaa hamuꞌou fei na apunai ma lafulafu fininaa fei Spiriti Apuna. 21 Hamonei oa aꞌa fei haguaa mei Haidaa ena hamoꞌei omaꞌaa fei faloloaꞌiaa mei Fasuu oꞌou Jesus Christ ba i noduginaa hamuꞌou aꞌa fei harenua lomi i pedutoo.

22 Faloloaꞌinaa ei na hamamagua naranaraa roꞌou; 23 rapuꞌamii hefiꞌadiai aꞌa fei hafi ma fatelaꞌanaa roꞌou. Aꞌa hefiꞌadiai, faloloaꞌinaa roꞌou fininaa maꞌaua—ma fabidinaa unuu hamuꞌou aꞌa ei finefinee ei hafeloꞌa ramaꞌa.

24 I aꞌa mei i wagiꞌinaa hamuꞌou ba hamoneiꞌaa pasi ma neiꞌaa paꞌi hepalo tataa hamuꞌou ma ba i faꞌugaa hamuꞌou inamoaa fei rawaniꞌa hawerana fininaa baua niꞌeniꞌea— 25 i aꞌa mei hia ua Haidaa, mei Fatelaꞌanaa oꞌou, i ude fei hawera, hapara, faufau ma forafora uaa Jesus Christ, mei Fasuu oꞌou, mina mina, eꞌeni ma ranimai! Amen.