Una aloaa feni aꞌa fei losuu, fei na rafeinia mei Haidaa mawe hamuꞌou ena losuia wagina, hamuꞌou ena una haguaa hamuꞌou wagii fei faꞌuaia. Ma abaa unaa yau ua. Minaa ei rona apaꞌaa fei faꞌuaia ana rona haguaa hamuꞌou 2 uaa fei faꞌuaia na oa laloo iaa oꞌou, fei na oafipui aꞌa oꞌou ranimai.

3 Fei rawaniꞌa, faloloaꞌia ma gutafarawania, noramiaa roꞌou aꞌa mei Haidaa, mei hia Ama mawe Jesus Christ, mei Naꞌuu mei Ama. Eꞌei na oafipui aꞌa oꞌou fininaa fei faꞌuaia ma fei hagua.

4 Unamina niꞌeniꞌe, uaa hefiꞌa losuia aꞌa hamuꞌou, rona tatalai wagii fei faꞌuaia ana aleꞌei fei wareaa mei Ama ba onei bigiꞌia. 5 Ma eꞌeni, ena losuia, aꞌa ba uꞌei neꞌinaa hefaa manufau warea aꞌa hamuꞌou, maꞌuaa ana fena ona todigia famaꞌa. Fei iꞌigaiau sifei ba onei fihagui. 6 Ma sifeni feni hagua, ba oꞌaa talaineneraa ei wareana. Ana aleꞌei guaiaa hamuꞌou famaꞌa ba hamonei tatalai wagii fei hagua.

7 Yeni malagufu na nodigimai watauda sifisifiꞌa, ei rona ware ba Jesus Christ lomi na paꞌi pigiona ei i nomai. Mei ramaꞌa aleꞌei, hia sifisifi ma ana hemea fadugeaa Christ. 8 Omaꞌaa hamuꞌou. Apuna fapaꞌaiaa maꞌida ponoꞌa wagii tamanu hamona bigidigia, maꞌuaa ba hamoꞌaa topedugia. 9 Mei i auꞌualao naranarana ma lomi na feroilao aꞌa Christ, mei Haidaa lomi aꞌana. Mei na oafaweꞌi aꞌa fei feroia, ana na oafipui aꞌa mei Ama ma mei Naꞌu. 10 Nabaa nemea i nomai ma fadugeaa feni feroia, apuna duginaa hia humuu hamuꞌou o taufagutania. 11 Mei i taufagutania, ana na fapanapana aꞌa ei hafeloꞌa bigiꞌana.

12 Watauda eni ba a neꞌifanaa hamuꞌou, maꞌuaa lomi na nunuminia ba a neꞌi. Agia, nunumiau ba oꞌaa fifanunui ma fiwarewarei ba fei niꞌeniꞌeaa oꞌou neimina bauanai.

13 Eni losuia yeni, eni rafeiaa mei Haidaa, rona famafufuoinaa hamuꞌou.