Feni neꞌia i dinaa aꞌamu Philemon, mena paꞌaa tafii haiꞌou, mena rarafii bigibigiꞌa. 2 Ma ana i dinaa aꞌa Apphia, mei agii oꞌou ma Archippus mei rarafii foꞌaa mawe fei losuu, fei naꞌaida figupui i humumu anaa:

3 Fei rawaniꞌa ma fei gutafarawania i dinaa aꞌa hamuꞌou, noramiaa guapaloei aꞌa mei Haidaa, mei hia Amaa oꞌou mawe mei Fasu, Jesus Christ.

4 Ranimai una ware ‘ta’ aꞌa mei Haidaniau ena una nonominio aꞌa ei lafulafuau, 5 uaa, unaꞌo guainaa fei narafaweꞌiamu aꞌa mei Fasu Jesus ma fei haguamu aꞌa minaa ei apunaiaa mei Haidaa. 6 Una lafulafu ba oneimina uꞌugaa fei narafaweꞌiamu ba oneimina apaꞌifarawaninaa minaa ei rawaniꞌa manumanu ona paꞌi aꞌa Christ. 7 Unamina niꞌeniꞌe ma unuwenuwe aꞌa fei haguamu, uaa yoi, mena lofuu, ona faꞌunuwenuweaa naranaraa ei apunaiaa mei Haidaa.

8 Ma siꞌei ba yau aꞌa Christ, na hawia ba a warefaweꞌi aꞌamu ba onei bigiꞌaa fei nunumiau, 9 maꞌuaa uꞌei iꞌiginio fininaa hagua. Yau, Paul, na bau ma ana hemea na boboꞌai hamatee Christ Jesus— 10 uꞌei iꞌiginio uaa mei naꞌuu, meni Onesimus,^a mei nawe oanaa naꞌuu ei a boboꞌai. 11 Mina, hia abaa hemea mau ramaꞌa aꞌamu, maꞌuaa eꞌeni, nawe bigipaꞌi aꞌa agua.

12 A aloiawau i aꞌamu, mei hia paꞌaa haꞌeu ba nei hadiweꞌiwau. 13 Nunumiau ba inei gutamai aꞌau ma tonaa fei gutanamu ba nei hadumau aꞌa fei bigiꞌa eni a boboꞌai uaa fei rawaniꞌa warea. 14 Maꞌuaa lomi ba a bigiꞌuaiaa hepalo manumanu nabaa atawe to wareamu, abaa onei uga ua uaa una iꞌigai maꞌuaa ba onei naramaꞌaia. 15 Woro ei idoꞌo diꞌininio ba nene, owe dugidinia ba i oaꞌualao aꞌamu— 16 ma abaa hia humuwadiai, maꞌuaa aleꞌei ba hia hemea rawaniꞌa lofu laraa fei ba hia humuwa. Unamina haguia, maꞌuaa narau ba fei haguamu na bauanadiai, fei ba hia paniaa panimu ma ana hemea lofu aꞌa mei Fasu.

17 Siꞌei, nabaa ona nara ba yau tafimu, te, taufaꞌugia ana aleꞌei ba yau. 18 Nabaa ina bigifatata o to ua aꞌamu, awe fawanewaneia. 19 Awe hodiꞌia. Yau, Paul, na neꞌinaa feni aꞌa feni paniu. Ma ana ona to ua aꞌau, hamatee ona to harenuamu uaa yau. 20 Nunumiau, mena lofuu ba onei farawaninau aꞌa mei Fasu; faꞌunuwenuweaa fei naranarau aꞌa Christ. 21 Napaꞌaa oꞌugio ba owe neneraa ei wareau, siꞌei, a neꞌinaa aꞌamu ma na aida ba fei bigiꞌamu i muadiai laraa ei iꞌigiau yoi.

22 Ma hepalodiai: Pagiꞌaugaa hepalo nopau, uaa woro a hadiweꞌiwau aꞌamu ana aleꞌei ei lafulafuamu.

23 Epaphras, mei rarafiu boboꞌaia aꞌa Christ Jesus na aloawii fei famafufuoiana aꞌamu. 24 Ma Mark, Aristarchus, Demas mawe Luke, ei rarafiu bigibigiꞌa, ana rona famafufuoinio.

25 Fei rawaniꞌaa mei Fasu Jesus Christ nei oafipui aꞌa fei spiritimu.