Iꞌya kuvi nuu isakitaꞌan Ndyoo tuꞌun chiꞌin Noé
9
Yukuan ta ikaꞌan Ndyoo tyi koo vaꞌa Noé ta seꞌe‑ra,
ta katyi‑ra:
—Nakuña‑ndo,
ta ndukuaꞌa‑ndo tyi koo‑ndo tandɨꞌɨ ñayɨ́vɨ́.
2 Ta kuayuꞌu loko tandɨꞌɨ kɨtɨ xaan iyo nuu ñuꞌu ñayɨ́vɨ́ chii‑ndo,
kɨtɨ ndava ñayɨ́vɨ́,
kɨtɨ chika chiꞌin tichi nuu ñuꞌu,
ta tyaka yɨꞌɨ tichi ndutyañuꞌu;
ta chaꞌí chii‑tɨ chii‑ndo.
3 Ta kuvi kachi‑ndo tandɨꞌɨ kɨtɨ xaan tañi ichaꞌí kachi‑ndo tandɨꞌɨ nuu yuva.
4 Soko makachi‑ndo kuñu inakoꞌo nɨñɨ tyi cha‑ichityaku chiꞌin‑tɨ kuvi.
5 Ta kuenda nɨñɨ‑ndo cha‑ndaa kaꞌín chii‑ndo tyi tatu kaꞌñi kɨtɨ xaan chii ñayɨvɨ kuakoo kuatyi‑tɨ nuí,
ta takuan tuku ñayɨvɨ tatu kaꞌñi‑chi chii taꞌan‑chi kuakoo kuatyi‑chi nuí.
6 Ta ñayɨvɨ kuakaꞌñi chii ñayɨvɨ,
ta inka ñayɨvɨ kuakaꞌñi chii‑chi,
tyi Ndyoo isavaꞌa‑ra chii ñayɨvɨ tañi kuꞌva iyo‑ra.
7 Soko ndyoꞌo nakuña‑ndo,
ta ndukuaꞌa‑ndo;
ta koo‑ndo tandɨꞌɨ nuu ñuꞌu ñayɨ́vɨ́.
8 Yukuan ta ikaꞌan tuku Ndyoo chii Noé ta chii seꞌe‑ra,
ta katyi‑ra:
9 —Vityin sakitaꞌín tuꞌun chiꞌin‑ndo ta chiꞌin tata‑ndo kuakoo nuu kuaꞌan‑ka kɨvɨ.
10 Ta sakitaꞌan tukí tuꞌun chiꞌin tandɨꞌɨ kɨtɨ tyaku ndyaa chiꞌin‑ndo,
kɨtɨ ndava nuu tatyi,
ta kɨtɨ iyo tichi kuꞌu,
ta kɨtɨ kuvi sana ñayɨvɨ,
ta tandɨꞌɨ kɨtɨ iketa nuu varku chiꞌin‑ndo,
ta tandɨꞌɨ kɨtɨ iyo nuu ñuꞌu ñayɨ́vɨ́.
11 Ta iꞌya kuvi tuꞌun sakitaꞌín chiꞌin‑ndo,
ta ña‑kuandaa‑ka ndutya nuu ñuꞌu ñayɨ́vɨ́,
ta kaꞌñi‑chi tandɨꞌɨ ñayɨvɨ ta kɨtɨ xaan,
ta ña‑kuasatanu‑ka‑chi cha‑iyo ñayɨ́vɨ́.
12 Ta ikaꞌan tuku Ndyoo,
ta katyi‑ra:
—Iꞌya kuvi cha‑kuakuꞌva kuꞌva tyi isakitaꞌín tuꞌun chiꞌin‑ndo iso kuaꞌan ñayɨ́vɨ́ ta chiꞌin tandɨꞌɨ kɨtɨ tyaku ndyaa chiꞌin‑ndo:
13 Ta kuakutyaí koyaꞌndyi nuu viko,
ta yukuan kuakuvi kuꞌva tyi isakitaꞌín tuꞌun chiꞌin ñuꞌu ñayɨ́vɨ́.
14 Ta kuꞌva kuatyandaꞌí viko nuu ñuꞌu ñayɨ́vɨ́,
ta kuatuu koyaꞌndyi nuu viko,
15 ta kuakaka iñí tuꞌun isakitaꞌín chiꞌin‑ndo,
ta chiꞌin tandɨꞌɨ nuu kɨtɨ tyaku.
Ta ña‑kuandaa‑ka ndutya nuu ñuꞌu ñayɨ́vɨ́,
ta sanaa‑chi tandɨꞌɨ ñayɨvɨ ta kɨtɨ xaan.
16 Ta kuꞌva kuatuu koyaꞌndyi nuu viko,
ta kuandyeꞌí chii‑tɨ,
ta kuanakaka iñí tuꞌun isakitaꞌín chiꞌin‑ndo,
ta chiꞌin tandɨꞌɨ kɨtɨ tyaku nuu ñuꞌu ñayɨ́vɨ́.
17 Ta ikaꞌan Ndyoo chii Noé,
ta katyi‑ra:
—Yukuan kuvi cha‑chaꞌa kuꞌva tyi isakitaꞌín tuꞌun chiꞌin‑ndo,
ta chiꞌin tandɨꞌɨ ñayɨvɨ ta kɨtɨ xaan iyo nuu ñuꞌu ñayɨ́vɨ́.
Iꞌya vachi tuꞌun seꞌe Noé
18 Ta Sem,
Cam ta Jafet kuvi seꞌe Noé cha‑iketa nuu varku.
Ta Cam kuvi sutu Canaán.
19 Ta nduꞌuñi taꞌan‑chi kuvi seꞌe Noé,
ta chakatyi‑chi ta indukuaꞌa ñayɨvɨ tandɨꞌɨ nuu ñuꞌu ñayɨ́vɨ́.
20 Yukuan ta ikichaꞌa Noé satyiñu‑ra nuu ñuꞌu,
ta itachi‑ra yutun chaꞌa uva.
21 Ta minuu chaꞌa ichiꞌi‑ra vinu,
ta ichiñi loko‑ra,
ta tɨlaꞌa‑ra kandyaa‑ra tichi veꞌe lona‑ra.
22 Ta indyeꞌe Cam sutu Canaán tyi tɨlaꞌa Noé,
yukuan ta ichakaꞌan‑ra chii nduꞌuvi taꞌan ñañi‑ra ndyaa chata veꞌe.
23 Yukuan ta ikiꞌin Sem ta Jafet nuu soo,
ta itɨɨn‑ra chiꞌin nusoko‑ra,
ta ikichaꞌa chika chata‑ra,
ta isaꞌvi‑ra chii sutu‑ra.
Ta takuan isaꞌa‑ra,
ta ña‑indyeꞌe‑ra nuu tɨlaꞌa‑ra.
24 Yukuan ta indukuꞌun iñi Noé cha‑ichiñi‑ra,
ta ichito‑ra cha‑isaꞌa Cam seꞌe‑ra,
ra‑loꞌo‑ka.
25 Yukuan ta ityiñaꞌa‑ra chii Canaán,
ta katyi‑ra:
Ña‑vaꞌa kuataꞌan Canaán,
tyi kuakuu‑ra musu kueꞌe‑ñi
nuu nduꞌuvi taꞌan ñañi‑ra.
26 Ta ikaꞌan tuku‑ra:
Ndyoo vaꞌa loko iñi kuvi Sutumañi‑yo,
cha‑chinu iñi Sem.
Ta nakuu Canaán musu Sem.
27 Ta Ndyoo nasandukuaꞌa chii tata Jafet,
ta ñuꞌu nuu kundyaa‑chi.
Ta nakoo vaꞌa iñi Jafet chiꞌin Sem.
Ta nakuu tuku Canaán musu Jafet.