3 A̱za̱ e Itoni a kamba ma̱runa̱ ma na ma̱ ri na̱ za na aa kamba yi shi.

4 Amma nnu u ri na̱ mawun ko muwun n tsukaya,

na a ciga a ꞌyuwan o rito ure u saꞌani u na a̱ usuyi tsa̱ra̱ o roco isaꞌani ya̱ A̱sula̱ a̱tsuma̱ o uꞌwa u le nna̱ a̱a̱ ka̱lyuwusa̱ aza a na a matsan nle.

A̱yi nda a̱yi ɗa ure u na aa tsupa aza a na a matsan nle adama a na a kungwato nle.

Waru A̱sula̱ a tsu uwwa ta̱ uyoꞌo wi ili i ndolo lon.

5 Ma̱runa̱ ma amayun,

za na ri na̱ za vi ikambi shi,

za na ri a̱ nden ma̱ yi e ekere a̱ A̱sula̱ ɗa u gbasatoi.

U tsu patishi ta̱ A̱sula̱ kuci,

a yuwusan avasa urana nu usana suru.

6 Ma̱runa̱ ma na gba ma̱ ri a̱ nden adama a mawwa mo uyoꞌo goon,

a̱a̱kwa̱kwa̱ a ɗa o okolo,

ko na u ri wuma.

7 Vu rito a̱za̱ e Itoni ili i nda suru,

adama ama a̱ tsura̱ ili i vanvama i na a damma aci e le wan.

8 Aza a na gba a ꞌyuwain a̱ ka̱lyuwa̱ mmaci n le,

hali na̱ mmaci n na a̱ ri mpasa n ta̱,

a ꞌyuwan ta̱ a̱ usu ili i na tsu ushiyi.

Icuꞌun ya ama o ndolo a laꞌa ta̱ aza a na a̱ ri a̱za̱ e Itoni shi ulambu wa̱ a̱ɓula̱.

9 Ma̱runa̱ ma na ma ntsayi ma̱ ushi ikambi,

a̱yi ɗa za na rawai aꞌwan kupota̱li waru u ɓa̱na̱ ta̱ vali va̱ yi ulobonu.

10 U da̱na̱ ni ica e ekere a ama adama a wuma u saꞌani u na u yuwain.

Vu yuwan yeci i nda:

U kungwato ta̱ muwun ma̱ yi ulobonu?

U gura ta̱ ɓa̱na̱ omocin?

U gura ta̱ yuwaan a̱za̱ e Itoni tsugbashi nu uka̱ɗa̱tosu wa aci?

U kamba ta̱ aza a na a̱ ri a̱tsuma̱lima̱?

U da̱na̱ ta̱ ufoɓu u na waa yuwan isaꞌani kuci?

11 She a̱za̱ e Itoni a kamba nruna̱ n na m buwai wawaꞌa ne tsunda wan.

Adama a na ucira wi icigi u lipu u le u ta laꞌa ucawu wo okolo e le ya Zamawawa,

reve a̱ ta̱wa̱ a yuwan lolo ro.

12 Ne ɗa aa yuwan,

reve a kuɗa nzuwulai n le na̱ Zamawawa.^a

13 Waru a ta gura oꞌwo orogo,

reve a uwa o tonishi ꞌwa ꞌwa a yuwusan idami.

A̱ ta̱ ka̱mba̱to ugbozu u le a linga va ama,

reve a̱ ka̱ra̱ a yuwusan adanshi a na a ntsayi shi.

14 Adama o ndolo n ta casu nruna̱ n kekeꞌen a̱sa̱la̱ a yuwisan lolo ro.

A yuwan limatan,

reve a̱ ka̱lyuwa̱ ꞌwa le ulobonu.

Ne ɗa maꞌyuwatan ma̱ tsu maa gura damma ili i ro a aci e le shi.

15 Ozo o ro e le ɓatsa ta̱ ɗe,

reve o toni Male.

16 Na̱ ka vi Itoni ri ne edenge aza a na a̱ ri nruna̱,

nu u ciga u ꞌyuwan u kamba le waru waa lyawaa a̱a̱ꞌisa̱ a̱ a̱za̱ e Itoni nu ume u le shi.

Tsa̱ra̱ a̱a̱ꞌisa̱ꞌa̱ u gura kamba nruna̱ ma amayun aza a na a̱ ri na̱ za shi.

17 Azagbain a na aa yuwusan ulinga u saꞌani a rawa ta̱ a ca le tsugbain na atsupu a saꞌani.

Ne ɗa wu ntsayi a̱ tyo aza a na a yuwusan ulinga wa̱ A̱sula̱ na aza a na oo ritosu ili i mejege ya̱ A̱sula̱.

18 Apa ili i na i ri uɗanu a̱tsuma̱ a Adanshi a̱ A̱sula̱,

“She vu pala una̱ wu nan wan,

a mantsa ma na waa yuwusan ulinga a̱tsuma̱ e ishina,”

waru a ɗana ta̱,

“Lingi rawa ta̱ u ushi atsupu a̱ yi.”

19 She vu zuwa atsuvu a adanshi a vama a na a̱ ta̱wa̱yi adama a zagbain wan.

She na ama a na e revei ili i na i farai a rawa ama e re ko ama a taꞌatsu.

20 Vu yuwaan zagbain za na yuwain unusu adanshi a̱ ma̱ka̱ka̱n ma̱ a̱za̱ e Itoni.

Vu yuwan ne adama akapi e ene,

tsa̱ra̱ a uwwa wovon u na aa yuwan unusu. ^b

21 A̱ ma̱ka̱ka̱n ma̱ A̱sula̱ ma ɗa n yuwaan nuwu adanshi a nda,

waru a̱ ma̱ka̱ka̱n ma̱ Yesu Zamawawa,

waru a̱ ma̱ka̱ka̱n ma nlingata ma̱ A̱sula̱,

aza a na A̱sula̱ a ɗangwai.

Vu zuwa ikaka i nda o ookolo a̱ wu,

she vu laꞌa ciga nanza a aci a nanza wan.

Ko vu yuwan aɗangulu wan.

22 She vu yuwan mejeꞌen wan a mantsa ma na vaa ɗangula azagbain nu ukurusu we ekere a aci e le.

Adama vu zuwa ekere a̱ wu a̱tsuma̱ o unusu wo ozo o ro wan,

agba vu da̱na̱ cece.

23 N reve ta̱ vu ta̱ na̱ mɓa̱la̱.

Adama o ndolo she vu sowo mini goon wan,

amma vu ɓolo yi na̱ masayan ma inabi keꞌen.

U ta kamba wu.

24 Vu cuwan ozo o ro o to tono unusu,

ama suru e reve ta̱ nu unusuꞌu kafu a yuwaan le ugeꞌetosu.

Ozo o ro o ta̱ lo aza a na aa yuwusan unusu,

agba a̱ tsu kpa̱tuꞌwa̱ unusu u le shi,

she na a jima lon.

25 Ne ɗa waru ozo o ro o ta̱ lo na aa yuwusan isaꞌani,

waru ama suru e reve ta̱ na̱ ne,

waru ozo o ro o ta̱ lo a yuwusan isaꞌani agba ama a̱ tsu reve ne ele shi,

she na a jima.