Morono ma atsuvu adama a̱ munlu me epen
4
Agba Ruhu va Akiza damma ta̱ a alanga eteshe,
a mantsa mo ukosu ozo o ro a ta lyawa ucasu wo okolo e ili ya amayun.
Reve o toni nan ruhu vu upusa̱sun wu ugbozu ni ili i na otoni a̱ lima̱ o rocosu.
2 Aza a na o tsu roco ili i ro reve a̱ ꞌya̱wa̱ a yuwan ili i ro koꞌo a̱ ta̱ ta̱wa̱a̱ nu uritosu wo otoni a̱ lima̱.
Asuvu e le a̱ kuwa̱ ta̱ ɗe,
ununa lipu na rumu vu usuɗuwu kukula̱toi.
3 Munlu n nda n ta dansa,
u ri ulobonu a yuwan lolo shi,
waru u ri ulobonu a lyuwa ilyalya i ro shi.
Agba A̱sula̱ a yuwan ta̱ ilyalya i ndolo adama aza a na e revei amayun waru a̱ usuyi amayuꞌun,
a lyuwa reve a yuwaan A̱sula̱ ma̱za̱nga̱.
4 Ana wo oꞌwoi ili i na A̱sula̱ a yuwain suru a̱ tu ulobonu,
she tsu ꞌyuwan ili i ro pe wan.
Tsu ushi nle na̱ ma̱za̱nga̱ no okolo o ugodyusho.
5 Tsu reve ta̱ adanshi a̱ A̱sula̱ na avasa a̱ ka̱mba̱to le ta̱ akiza.
6 Vu roco a̱za̱ e Itoni ili i nda.
Na̱ vu yuwan ne,
vu to oꞌwo aagbashi a̱ a̱ɓula̱ e Yesu Zamawawa.
Waru ne ɗa a̱vu aciya̱wu vaa yuwan ucira a̱tsuma̱ e ikaka ya amayun e ili i na vu usuyi nu uritosu u saꞌani u na yoo tono.
7 She vu zuwa atsuvu e yitele i na e icinai na̱ A̱sula̱,
ko adanshi o tsulo wan.
Apa nda ili i na vaa yuwan:
Vu yuwan ukadu tsa̱ra̱ vu tsura̱ ucira a̱tsuma̱ e isaꞌani cine A̱sula̱ a̱ ri.
8 U tu ulobonu vu suɗato lipu va̱ wu tsa̱ra̱ vu tsura̱ ucira,
amma na̱ vu yuwan wuma adama vu yoꞌonoto A̱sula̱ okolo,
u tsu ta̱wa̱a̱ ta̱ ni isaꞌani a̱tsuma̱ e ili suru.
U tu ulobonu ya̱ꞌa̱ wu gogo,
waru ne ɗa wa̱a̱ da̱na̱ a wuma wa̱ wu we elime.
9 Ikaka i nda suru amayun a ɗa,
waru u tu ulobonu a̱ usu le suru.
10 A̱tsu tsu ta yuwusan a̱ba̱jini o ulinga na̱ a̱tsuma̱lima̱ tsa̱ra̱ ama a̱ usu amayuꞌun.
Tsu yuwan ta̱ ne adama a na uzuwu wo okolo a̱ tsu e ekere a̱ A̱sula̱ a ɗa u ri,
za na ri wuma,
a̱yi ɗa u ta̱wa̱i na̱ mawawa ma ama suru,
waru mawawa ma̱ A̱sula̱ u te e ekere a aza a na a̱ usuyi suru.
11 Vu rito ili i nda,
reve vu zuwa za suru u reve le.
12 She vu lyawa ama o rono wu e iɗa adama a na vu buwai mawun wan.
Ciga ꞌyuwan vo oꞌwo iroci i na a̱za̱ e Itoni a̱a̱ kuru.
Voo oꞌwo iroci a̱tsuma̱ a adanshi a saꞌani na̱ nden n saꞌani.
A̱tsuma̱ e icigi voo oꞌwo iroci.
Ciga ꞌyuwan voo oꞌwo iroci a̱tsuma̱ o ucawu wo okolo o ugbamu.
Voo oꞌwo za vi izami ya̱ a̱ma̱ci wan.
13 Vu ɗeshe nu una̱ ama Adanshi a̱ A̱sula̱ waru vu cuɗuwusa le,
reve waru vu ritosu le.
Vu yuwusan ili i nda hali n ta̱wa̱.
14 She vu ꞌyuwan uneꞌe u saꞌani u na A̱sula̱ a ca nuwu wan,
a mantsa ma na azagbain a̱ a̱a̱ꞌisa̱ a̱ a̱za̱ e Itoni a̱ kuruwa̱ nuwu ekere,
reve a yuwan adanshi a̱ A̱sula̱ a aci a̱ wu.