Vu yuwan nden n saꞌani a̱ ma̱ka̱ka̱n ma̱ A̱sula̱
4
O ukosu,
ama a̱ va̱,
cine tsu damma nɗu a̱tsuma̱ a ala a Zagbain tsu Yesu Zamawawa,
tsu ta̱ fo e ipati i ɗu i yuwan nden n na woo yoꞌonoto A̱sula̱ o okolo.
Tsu rito ɗu ta̱ ɗe i yuwan ne waru i ta yuwusan ne.
Waru tsu ta patishi ɗu i lyuwa elime na̱ mayan ne,
2 adama a na i ta cuwusan ni ili i na tsu rito nɗu a ala a Zagbain Yesu.
3 A̱sula̱ a ciga ɗu ta̱ i da̱na̱ cece,
adama o ndolo i suma cuꞌun vu unusu u tsipere suru.
4 Reve za suru u goloɓo lipu va̱ yi,
a̱vu u yuwan nden n na n ri na akiza na ama a ca yi tsugbain.
5 Ne ɗa yaa yuwan nden a̱tsuma̱ e icigi i mayan ma̱ tsipere vadamma a̱za̱ a̱ a̱ma̱li shi.
E reve A̱sula̱ na̱ re va̱ yi shi.
6 She vu paala za va̱ wu vi Itoni a̱tsuma̱ e ili i nda,
vu zami ka va̱ yi wan,
adama a na A̱sula̱ a̱ ta̱ ta̱wa̱a̱ na̱ a̱tsuma̱lima̱ o una̱ wi icuꞌun vu nusu ndolo suru.
Tsu rono ɗu ta̱ atsuvu na̱ a̱bunda̱.
7 A̱sula̱ a̱ ɗe tsu ta̱ adama tso oꞌwo cece,
agba u ɗe tsu adama tsu yuwain nden mi idaba shi.
8 Za na kuɗa̱i a yuwan nden oo tono wila̱ u nda,
wila̱ u vuma u ɗa u ꞌyuwain a yuwan tsutoni na̱ a̱yi shi,
amma A̱sula̱ a ɗa waa ꞌyuwusan,
za na ca nɗu Ruhu va Akiza va̱ yi.
9 A̱sula̱ na aciya̱yi u rito ɗu ta̱ i cigalai,
adama o ndolo ili yi lo shi na yaa zuwa mu n ɗanaa ɗu adama e icigi ya̱ a̱za̱ e Itoni a na wu ntsayi e ene a̱tsuma̱ a ama a̱ A̱sula̱.
10 Amayun a ɗa,
gogo i ta̱ ni icigi ya̱ a̱bunda̱ a̱ tyo uba̱ta̱ a̱za̱ e Itoni a na a̱ ri e iɗa ya Makidoniya.
Ama a̱ va̱,
ko na wo oꞌwoi ne,
tsu te ipati i ɗu i da̱shi icigi a̱ tyo ya̱ꞌa̱ le lon.
11 Ili i na yaa laꞌa yuwan maluwa a̱yi ɗa nda:
I da̱nu sanyi,
i yuwan majiyan me ili i na yaa yuwusan goon,
waru i linga ne ekere a̱ ɗu,
cine tsu damma nɗu nu ufaru.
12 Ne ɗa ama a na a̱ ri a̱za̱ e Itoni shi a ca ɗu tsugbain adama a̱ nden n ɗu,
waru ya̱a̱ da̱na̱ a̱ ka̱lyuwusa̱ nanza ca ɗu ikebe shi.
Cine Zagbain a̱a̱ ka̱mba̱
13 Ama a̱ va̱,
n ciga ɗu ta̱ i reve ili i na yaa fara na̱ a̱za̱ e Itoni a na a̱ kuwa̱i,
adama i da̱na̱ tapu na̱ a̱tsumola̱ngu tsa ama a na a̱ ri nu uzuwu wo okolo shi wan.
14 Tsu usu ta̱ a na Yesu kuwa̱i,
waru a̱ ꞌya̱sa̱n yi ta̱ a̱vu u ka̱mba̱ wuma.
Waru tsu ca ta̱ okolo na A̱sula̱ a̱a̱ ta̱wa̱to Yesu waru,
u ta̱ ka̱mba̱ oɓolo na ama suru a na a cayi okolo ya̱ Yesu kafu a̱ kuwa̱.
15 Cine Zagbain Yesu yuwain adanshi na aciya̱yi a na,
a̱tsu na tsu ri wuma a mantsa ma na Zagbain a̱a̱ ka̱mba̱ tsaa wala elime a aza a na a̱ ri pe ason e le shi.
16 Zagbain na aciya̱yi u ta̱ cipa̱ diga zuva.
A mantsa ma ndolo ma ɗa ama a uwwa udammu wu ucira wu Zagbain,
reve waru a uwwa a̱ba̱jini a yisaali o una̱ wu zagbain vu nlingata ma̱ A̱sula̱,
reve a uwwa e ivulusa̱ aavana a̱ A̱sula̱.
Ne ɗa,
aza a na a̱ kuwa̱i a̱tsuma̱ a̱ Kristi Zamawawa a fara ꞌyon a̱ tyo zuva.
17 Reve a̱tsu na tsu buwai wuma a̱vu tsu buwa a̱tsuma̱ o uvaɗi reve a̱ fa̱la̱ tsu a̱ tyo a̱tsuma̱ e eleshe oɓolo ne ele,
a̱vu suru ntsu tsu gaꞌasan na̱ Zagbain zuva reve tsu da̱na̱ oɓolo na̱ a̱yi babu ukotu.
18 Adama o ndolo i vowontoloi okolo waru i gbamatoloi aciya̱ɗu ni idanshi i nda.