Bulu ɗana ta̱ mepepelime ma nda a̱ tyo a̱za̱ e Itoni a na a̱ ri pe a̱tsuma̱ a̱ Kolosi a̱yi a̱tsuma̱ o uꞌwa wa ali. Bulu ɗa farai a̱a̱ꞌisa̱ a̱za̱ e Itoni a nda na aciya̱yi shi. Koto shi u bura uba̱ta̱ꞌa̱ shi ko keꞌen. U reve ta̱ adama a̱za̱ e Itoni o uba̱ta̱ꞌa̱ adama e ili i na Abafara damma niyi. Abafara za vi Itoni ɗa za na da̱na̱i oɓolo na̱ Bulu a̱tsuma̱ o uꞌwa wa ali.

A̱za̱ e Itoni a̱ Kolosi a fara ta̱ itoni yu uritosu i na i ri mejege shi. A̱ shi ta̱ a ciga a putsaa aciyele ili i ro i na lipu cigai, waru a̱ shi ta̱ a ciga a yuwaan nlingata ma̱ A̱sula̱ a̱ga̱nda̱ na akapi e ili i vama i ro. Bulu ɗana ta̱ adama u damma le ili i ndolo suru amayun a ɗa shi. U ciga ta̱ u damma le e reve Yesu Zamawawa ca ta̱ vuma ili i na vuma cigai suru. U cuɗuwa ta̱ ulobonu lon cine A̱sula̱ na̱ Yesu Zamawawa kambai a̱za̱ e Itoni.

Anaꞌan fo, Yesu Zamawawa ca ta̱ ili suru i na vuma cigai adama tsu yuwaan A̱sula̱ a̱ga̱nda̱ o ure u saꞌani. Aatagada a nda a cuɗuwa ta̱ adama a nda ulobonu lon a alanga e eteshe.