I da̱na̱ tsa̱ Yesu
2
I ta̱ nu ugbamu wa asuvu adama a na i ri uɓoluloi na̱ Zamawawa?
I ta̱ nu uvotowun wo okolo adama e icigi ya̱ yi?
I ta muwwulai oɓolo a̱tsuma̱ a̱ Ruhu va Akiza?
I te inda iliyali ya̱ a̱za̱ a̱ ɗu,
reve i ri a̱ kurusu ben ne ele?
2 Adama a na n revei ne ɗa u ri,
n ciga ɗu ta̱ i zuwa mu mu uwwa uyoꞌo lon.
Apa ili i na yaa yuwan:
i sa̱la̱la̱i va̱ni ɗu ulobonu,
i cigalai,
reve waru i yuwan ulinga oɓolo na̱ majiyan ma̱ ta̱ a yuwusan ili i ta̱.
3 She i yuwan ili adama a̱ tsushuꞌun wan,
waru she i yuwan ili adama o uꞌya̱sa̱sa̱n wa avangaci wan.
Amma vu tara aciya̱wu ili i ro wan na̱ vaa yuwusan ili,
reve vu da̱na̱ a majiyan vuma ro laꞌa wu ta̱.
4 She i da̱na̱ adama e ili i na i bura nɗu goon wan,
amma i da̱na̱ aɗa ama o ro fo.
5 A̱tsuma̱ a wuma a̱ ɗu ni i ciga i ꞌyuwan i yuwan majiyan waru i da̱na̱ aza a mayan ununa Yesu Zamawawa yuwain majiyan reve waru u yuwan.
6 Yesu ili i ta̱ i ɗa na̱ A̱sula̱ foyi,
agba u yuwusan majiyan ma na waa uwwa uyoꞌo u na A̱sula̱ a uwwusa shi.
7 O una̱ u ndolo reve u ka̱mba̱to aciya̱yi ili i ro i ɗa shi,
a̱vu wo oꞌwo una̱ta̱ ana aagbashi.
A matsan yi ta̱ vaɗilima̱.
8 Reve u da̱na̱ cine vu revei vuma.
A̱vu u yuwan tsutoni na̱ A̱sula̱,
agba u ka̱mba̱to aciya̱yi ili i ro shi suru suru,
hali u kuwa̱ a akpata.
9 Adama o ndolo,
A̱sula̱ a̱ ꞌya̱sa̱n yi ta̱,
reve u rawato yi uba̱ta̱ u na u laꞌai suru suru.
Reve A̱sula̱ a ca yi ala a na a laꞌai ala biti.
10 Ne ɗa vuma suru a̱a̱ kingyo na̱ wu uwwa ala e Yesu.
a
Koyan ɗa a̱tsuma̱ a zuva na̱ o uvaɗi u ta yuwan ne.
11 Waru ne ɗa una̱ biti waa damma a alanga eteshe
a na Yesu Zamawawa Zagbain ɗa,
waru ili i nda i ta̱ ta̱wa̱a̱ A̱sula̱ Dada na̱ tsugbain.
Yi ikana tsi italyoꞌo
12 Nꞌutsa̱ n va̱,
i kurusu ta̱ A̱sula̱ kuci a mantsa ma na n da̱na̱i oɓolo na̱ a̱ɗu.
Gogo gba a na n ri oɓolo na̱ a̱ɗu shi,
i kuru hali u laꞌa cine i yuwusain.
I lyuwa elime nu ulinga u na woo roco a wawa ɗu ta̱,
agba i yuwan ne nu ucasu u tsugbain na̱ wovon.
13 A̱sula̱ a̱ to ulinga a̱tsuma̱ a̱ ɗu,
a zuwusa ɗu i ciga i yuwan tsutoni,
waru a casu ɗu ucira u na yaa yuwan ili i na i yoꞌonoto niyi okolo.
14 She i yuwan mokoɗo ko nwasanlai a̱tsuma̱ e ili i na yaa yuwusan wan.
15 Na̱ ne ko za oo goro ɗu adama e ili i ro shi,
ko keꞌen.
I yuwan nden n cece,
wuma u na u ri nu unusu shi,
a̱ɗu muwun ma̱ A̱sula̱ n ɗa a̱tsuma̱ o uvaɗi wi irumbu za na ri tapu na ama a na a̱ ri a̱za̱ e iwuya waru aza a na aa yuwusan unusu kuci.
Lyawai wuma u ɗu wi ikana lon tsi italyoꞌo uba̱ta̱ wa ama a nda.
16 I guza̱ adanshi a wuma ulobonu,
adama ko na̱ Yesu ta̱wa̱,
n gura damma n riya̱ alaꞌanlai e ilaɗiꞌi shi,
waru ulinga u va̱ wo oꞌwo ulinga we pere shi.
17 Ucawu wo okolo a̱ ɗu a̱ tyo yi Zagbain na̱ cine yaa yuwusaan yi a̱ga̱nda̱ wo oꞌwo ta̱ kucci e ekere a̱ yi.
Waru u to oꞌwo she damma a̱ tsun ta̱ mpasa n va̱ a̱tsuma̱ a̱ kucci ɗu.
Ne ɗa maa yuwan ma̱za̱nga̱,
waru n ta yuwan mere oɓolo na̱ a̱ɗu.
18 I yuwan mere adama o ndolo,
reve waru i yuwan ma̱za̱nga̱ oɓolo na̱ a̱mu.
Bulu lyunguyi ni ikambi
19 Na̱ Yesu Zagbain usu aa jima shi,
n te ifoɓi i na ma̱a̱ lyunguwa̱ ɗu Timoti.
Reve nu u ka̱mba̱ uba̱ta̱ u va̱ n ta yuwan ma̱za̱nga̱ adama a alabari a na wa̱a̱ ta̱wa̱a̱ mu adama a̱ ɗu.
20 N ri na̱ za ro tsa̱ yi shi.
U te inda iliyali i ɗu i na u laꞌai koyan pa.
21 N ta dansa ne adama a na koyan ɗa ta majiyan me ili i na u cigai goon,
o una̱ u majiyan me ili i na Yesu Zamawawa cigai.
22 Agba i reve ta̱ cine Timoti rocoi aciya̱yi gashi mawun ma na ma̱ ri oɓolo na̱ dada va̱ yi ɗa.
U kamba mu ta̱ a̱tsuma̱ a alajiya a Alabari a Saꞌani.
23 Na̱ n reve ili i na aa yuwan na̱ a̱mu,
n ta̱ lyungu yi ya̱ꞌa̱ ɗu.
24 Waru n zuwa ta̱ okolo waa jima shi Zagbain ta zuwa mu n ta̱wa̱ ya̱ꞌa̱ ɗu.
25 I lyungu ta̱ Abafaroditu ana malingata ma̱ ɗu,
reve gba u yuwan ili i na n cigai suru.
Za va̱ ɗa a̱tsuma̱ e Itoni,
u yuwan ta̱ ulinga oɓolo na̱ a̱mu,
waru soja ɗa oɓolo na̱ a̱mu.
Gogo,
n yuwan ta̱ majiyan u lobono ta̱ n lyawa yi u ka̱mba̱ uba̱ta̱ u ɗu.
26 Adama a na u ciga ta̱ u da̱nu na̱ a̱ɗu lon.
U dama ta̱ ana yu uwwai u shi ta̱ ubanakun.
27 Amayun a ɗa u shi ta̱ u banakan,
u shi ta̱ u yuwan gashi u ta̱ kuwa̱.
Amma A̱sula̱ e ene ta̱ iliyali ya̱ yi,
reve ana u wawai wuma wa̱ yi,
a̱vu u putsa mu na̱ mesun adama a̱ a̱tsumola̱ngu a̱ a̱bunda̱.
28 A̱yi ɗa i zuwai n laꞌa cigai n lyungu yi uba̱ta̱ u ɗu.
Na̱ ye enishe yi i ta yuwan ma̱za̱nga̱,
ne ɗa a̱tsumola̱ngu a̱ va̱ ee jebe.
29 I raba yi ulobonu a̱tsuma̱ a Zagbain reve i yuwan ma̱za̱nga̱ lon.
Icuꞌun ya ama o ndolo i ca le tsugbain.
30 I yuwan ne adama a na u shi ta̱ a̱kuwa̱ adama o ulinga wa̱ Yesu Zamawawa,
adama a na u ta̱wa̱ ta̱ u shiton ikambi i na a̱ɗu na aciya̱ɗu yaa yuwan shi.