Yesu ka̱mba̱to ta̱ za vu ubanakun gbaga
14
O urana wa Ashibi u ro,
a̱vu Yesu uwa o uꞌwa wu zagbain ro va Afarishi adama u lyuwa ilyalya.
Reve ama a varaa yi esu,
Luka 14:1-24
2 adama a na vuma ro shi ta̱ lo za na da̱na̱i na̱ mɓa̱la̱ ma atsutsa.
3 Reve Yesu yuwan adanshi na̱ a̱za̱ o urevu u Wila̱ lon na Afarishi,
u damma,
“U lobono ta̱ a yuwan opocino o urana wa Ashibi,
ko u lobono shi?”
4 Reve a̱ rungwa̱ kpaku-kpaku.
Ɗaɗa u tara niyi,
reve u ka̱mbuwa̱ yi gbaga,
a̱vu u zuwa yi u ka̱ra̱.
5 A̱vu u damma le,
“Zane ɗa a̱tsuma̱ a̱ ɗu nu u ri na̱ mawun ko nan,a
a̱vu u riya̱ o ookoꞌo,
waa papushi niyi o urana wa Ashibi shi?”
6 Agba a gura usu yi waru shi.
Nda̱na̱ta̱ ma azagbain
7 Ana Yesu enei ununa aza a na a banuyi a cigai nda̱na̱ta̱ ma azagbain,
a̱vu u yuwaan le iroci i nda,
u damma,
8 “A mantsa ma na nanza banu nuwu a̱buki o lolo,
she vu da̱nu a̱ nda̱na̱ta̱ ma azagbain wan.
Ta̱wa̱ wo oꞌwo u banu ta̱ za na laꞌa nuwu,
9 a̱vu za na banu nɗu ra u ta̱wa̱ u damma wu,
‘Vu ca vuma nda ure.’
Reve vu da̱nu na̱ wono a̱ nda̱na̱ta̱ ma̱ a̱ca̱pa̱.
10 “Amma a mantsa ma na a banu nuwu,
vu ꞌya̱wa̱ vu da̱nu a̱ nda̱na̱ta̱ ma̱ a̱ca̱pa̱ suru suru.
Adama na̱ za na banu nuwu u ta̱wa̱,
u ta gura damma wu,
‘Iꞌutsa̱,
katsa zuva.’
A̱vu vu tsura̱ ica e ekere a aza a na i ri alya oɓolo.
11 Za na tarai aciya̱yi ili i ro suru,
aa tara yi ili i ro shi.
Za na gba tarai aciya̱yi ili shi,
a ta tara yi ili i ro.”
12 Reve waru u damma za na banu niyi,
“Na̱ vaa banu ama alya ko vaa yuwan a̱buki,
she vu banu nꞌutsa̱ ma̱ wu,
ko a̱za̱ a̱ wu,
ko nron ma̱ wu,
ko aza a na a̱ ri zuzu na̱ a̱vu a̱za̱ o utsuru wan.
Adama ele fo a tsupa wu ili i na vu yuwain wan.
13 Amma na̱ vaa banu ama alya ko a̱buki,
vu banu a̱za̱ e iliyali,
ama o osowi lipu,
a̱kutsuma̱,
na̱ nrumba̱.
14 A̱vu fo vu ta̱ tsura̱ abaꞌun;
adama a na a̱ ri ni ili i na aa tsupaa wu shi.
O urana u na a̱za̱ a̱ a̱ɓula̱ a̱a̱ ꞌyon,
a ta tsupa wu.”
Iroci ya̱ a̱buki a gbain
15 Ana vuma ta̱ a̱tsuma̱ a aza a na a̱ ri a alya na̱ a̱yi wu uwwai ne,
a̱vu u damma yi,
“Za va abaꞌun a ɗa za na aa lyuwa ilyalya o tsugono tsa̱ A̱sula̱.”
16 A̱vu gba u damma yi,
“Vuma ro yuwan ta̱ a̱ba̱jini a̱ a̱buki.
A̱vu u banu ama na̱ a̱bunda̱.
17 Ana mantsa ma̱ a̱buki ma rawai,
reve u lyungu aagbashi a̱ yi adama u damma aza a na a banuyi,
‘Ta̱wa̱i adama a na ili biti i tu ufoɓu!’
18 “Suru nle gba,
reve a uwa a̱ ta̱wusa̱a̱ na adanshi a̱ ma̱bula̱a̱ kokoꞌo.
Za vu ufaru damma aagbashiꞌi,
‘N tsula ta̱ uɗuma̱,
agba n ciga ta̱ n ꞌya̱wa̱ n ka̱lyuwa̱ yi.
M pati wu ta̱,
vu yuwaan mu ankuri.’
19 “Reve za ro damma,
‘N tsula ta̱ inan yi iluma wunlu u ton.
N ta̱ ꞌya̱wa̱ n rito le.
M pati wu ta̱ vu yuwaan mu ankuri.’
20 “Reve za ro damma,
‘N yuwan ta̱ lolo adama o ndolo ma̱a̱ tsura̱ a̱ ꞌya̱wa̱ shi.’
21 “Reve aagbashiꞌi u ka̱mba̱ u ka̱mbuwa̱ zavuꞌwa va̱ yi ili i nda suru.
Reve zavuꞌwaꞌa a̱tsuma̱ o upan,
u damma aagbashiꞌi,
‘Jika̱ ꞌya̱wa̱ e re gbain na̱ murere n lyuci,
vu ta̱wa̱a̱ na alambi,
na ama o osowi a̱ lipu,
nrumba̱,
na̱ a̱kutsuma̱.’
22 “Reve aagbashiꞌi u damma,
‘Zagbain,
ili i na vu dammai a yuwan o koto ta̱,
agba ure u buwa ta̱.’
23 “Reve u damma aagbashiꞌi,
‘ꞌYa̱wa̱ e murere na̱ re gbain vu mɓa̱nga̱,
vu zuwa ama a̱ ta̱wa̱,
adama uꞌwa u va̱ u shiwan.
24 N ta dansaa wu a̱tsuma̱ aza a na a banuyi ko za ee peɗe ilyalya i va̱ shi.’ ”
Ili i na i ri pe a tsugbashi
25 Reve oɓolo a ama a̱ a̱bunda̱ a̱ kuru yi,
ɗaɗa u vadalai a̱vu u damma le,
Luka 14:25-35
26 “Aza a na a̱a̱ kuru mu o oꞌwo ojoro a̱ va̱,
she na a laꞌa ciga mu na̱ mbara,
na̱ mukuci,
na̱ a̱ma̱ci,
na̱ muwun,
na azakpakpara a̱ a̱ma̱ci,
na ali na azawawaꞌa e le,
hali na aciyele fo.
27 Aza a na a tarai akpata e le,
a̱vu a̱ kuru mu shi,
a rawa o oꞌwo ojoro a̱ va̱ shi.
28 “Zane ɗa a̱tsuma̱ a̱ ɗu waa ciga u suwa ugungu,
agba waa fara ka̱lyuwa̱ ili i na woo una,
ko u ta̱ nu ucira u na woo gono yi shi?
29 Ta̱wa̱ wo oꞌwo nu u fara vara ikyun,
reve u kuɗa̱ o ure.
Reve aza a na a̱ ka̱ra̱sa̱ lo a yuwaan yi ulamu.
30 A damma,
‘Vuma nda teme ta̱ usaa,
a̱vu u kuɗa̱ o ure.’
31 “Ko cuꞌun mogono ma ne ma ɗa na̱ wa̱a̱ ꞌya̱wa̱ u yuwan uvon,
agba wa̱a̱ da̱nu neꞌen u yuwan majiyan shi?
Ko nu u tara ama ukpakukupa kupa (10,000) u ta gura yuwan uvon na̱ mogono ma na ma̱ ri na ama ukpakukupa ushin (20,000).
32 Na̱ waa gura shi,
mogono ma̱ ndeɗe ubuwu alanga ɗaɗa wa̱a̱ lyungu nlingata ma̱ a̱sa̱la̱ a uwwulayi.
33 Ne ɗa fo suru nɗu,
za na kakasai ni ili i na u ri na̱ a̱yi shi,
waa gura oꞌwo ojoro a̱ va̱ shi.
Akpaɗi a na a̱ ri peme shi
34 “Akpaɗi a̱ tu ulobonu,
amma na a buwa peme shi,
na̱ nye wa̱a̱ ka̱mbuwisa̱ peme va̱ yi?
35 U ri nu ulinga wu umili e iɗa,
ko e edemu shi.
O tso oco yi ta̱.
“Za na ri na atsuvu,
lyawa wu uwwa.”