I Fiyowe Uret
2
Atin do dumo gu,
amun énggégumahu dob begome,
nuret guy Fiyowe Uret i Tuluse.
Endob énda ménfurungu émbéréh taloo no muret loo bé ségétéwe wén i kégétiga no.
2 Non ménuyotu saén muret dob begome fantag bé Jesu Kristowe brab fantag bé kéléhu ne dob kruse.
3 Mélaw amun énggumahu dob begome,
toowu fo ménggilak brab léménukub,
non gétiga ku énda furungu muret.
4 Atin amun nureto ku begom,
énda ménusaru bé furunge kébéréh taloo no kégétigan.
Yamula i Rémogor i Tuluse diyo dob begéney ménféunure begom bé barakat ne,
5 inok i kéunur gome békén sabaf bé kégétigay étéwe.
Yamula munur gom saén sabaf bé barakat i Tuluse.
I kégétigay Tuluse
6 Endob i toowe,
toroé kuy tintuwe ménalém kégétigan dob de étéw méégét i kéunur ruwe.
Endob i ni kégétigan békén tidéw dob kéilawane taloo no tidéw dob de méguléw dob duniyae bé ni do gai.
Non mékédan i kéféguléw ruwe.
7 Yamula toroé kuy ménaléme kégétigay Tuluse,
sani ménbunéye non énda fénggitoy Tuluse de bé do gétah.
Non amun énda séna lénimbag i Tulusey duniyae ni,
énggétiga non i atiy rigoné nuwe bé fukasé no betom inok méuyag tom taman sa taman dob lawayo.
8 Enda i ségétéw méguléw dob duniyae ni énggésobuto noy ni ménalém kégétigan.
Non amuk énggésobuto ro,
énda damén fénléhu roy barakatane Kadnan dob kruse.
9 Non wén i Ménsulate Kébéréh i Tuluse mano,
“Enda i ségétéw énggégito taloo no énggégélingo taloo no énggéfégitung bé de fiyo do languntaman ténafay i Tuluse kay de étéw méimu de.”
10 Atin i de ménbunéy bé do gétah,
fénggésobut i Rémogor i Tuluse dob betome.
Non gétigay Rémogor i Tulusey kéluhanane,
fiyon i de ménalém kéfégitung i Tuluse.
11 Enda i gétigan bé atiy dob kéfégitung i ségétéwe étéw saliyu bé beene so.
Ségiléw so bé Tuluse.
I Rémogor i Tuluse saén i gétigane bé atiy dob kéfégitung i Tuluse.
12 Atin énggédot tom i Rémogor i Tuluse bati dob de fédéw tom.
Békén rémogor tidéw dob duniyae ni,
éndob Rémogor i Tuluse.
Fégétiga no betom i kéluhanay niray i Tuluse betom.
13 Mélaw toroé tom i ténoro i Rémogor i Tuluse betom,
békén tidéw saén dob kégétigay étéwe.
Toroé tom i toowe tidéw dob Rémogor i Tuluse dob de étéw bati i Rémogor i Tuluse diyo dob de fédéw ro.
14 Endob i étéwe énda diyo i Rémogor i Tuluse dob fédéw ne,
énda gétayakufo noy de éntingayén tidéw dob Rémogor i Tuluse non énda gésobuto no de.
Atin karangé noy énda i lagaén non i Rémogor i Tuluse saén i émfégésobute de.
15 I étéwe batioy Rémogor i Tulusey fédéw ne,
gésobuto noy kéluhanane.
Endob i étéwe énda diyo i Rémogor i Tuluse dob beene,
énda gésobuto noy kéfégitung i de étéw diyo i Rémogor i Tuluse dob berowe.
16 Non wén i Ménsulate Kébéréh i Tuluse mano,
“Enda i gétigan bé atiy dob itungay Tuluse brab,
énda i gétoro bé Tuluse.”
Endob i betome do munur,
fénggito Kristowe betom i kéfégitung ne.