I Sunguwe Sulat Pablowe dob de Munur bé Kristowe dob Korinto
1
Begéney Pablowe,
fénémili i Tuluse ménwaléy apostol Jesu Kristowe sabaf bé kétayay Tuluse.
I Sostenese dumo tom munur bé Jesuse brab begéne,
sulata key begom
2 do munur bé Tuluse bati dob Korinto.
Fénémili i Tuluse begom inok waléy mélinis dob adafa nuwe sabaf bé Jesu Kristowe.
Ménwaléy gom do étéw i Tuluse beroy kéluhanay de étéw dob kéluhanay de ingéd munur bé Jesu Kristowe,
sani Kadna ruwe brab Kadna tome so.
3 I Abay tome Tuluse brab Kadna tome Jesu Kristo toow fo mégédaw damén begom brab iray ro damén i métanéke do fédéw.
I kéfiyonone sabaf bé Kristowe
4 Toow fo démoyunu fésalamat bé Tuluse non bé kégédaw ne begom fénagéw dob Jesu Kristowe.
5 Non toow fo fénfiyoy Tuluse begom bé kéwaléy gome do dumo Jesu Kristowe.
Mélaw tintu fo énggésobuto kom i toowe kétoro brab gétigan gom so témoro de.
6 Ménwaléy toow fo méégét i kéunur gome bé ténoro geye begom fantag bé Kristowe.
7 Mélaw i Tuluse nirayén begom i kéluhanay kéfurunge kailanga kom tidéw dob Rémogor ne,
bé lala gome ongot-ongot bé késéfule i Kadna tome Jesu Kristo.
8 Beeney émféégéte bé kéunur gome taman dob tamfaday duniyae,
inok énda i sala gom dob gaiy késéfule ne.
9 Toow fo gésarig tom bé Tuluse,
sani ménémilie betom inok waléy tom do dumoy Nga ne Jesu Kristo,
sani Kadna tome.
Ménsébaad ro
10 Do dumo gu,
sabaf bé kéféguléw i Kadna tome Jesus betom ongoté ku begom kagom sébaad-baad.
Yamula séfagayun gom inok waléy ségiléw i de fédéw gom brab de kéfégitung gom.
11 Non do dumo gu,
bénréh i de étéw do dumo Kloewe démoyun gom kun séédél.
12 Wén kun i do dumo begom émbéréh maro,
“Kuyug Pablo gey i begeye.”
Atin i de dumo de kun émbéréh maro,
“Kuyug Apolos gey i begeye.”
Brab i de dumo begom émbéréh ro maro,
“Kuyug Pedro gey i begeye.”
Atin i de dumo do émbéréh maro,
“Kuyug Kristo gey i begeye.”
13 Toow fo tete i nan.
Maak sénufak-ufak gom i Kristowe.
Békén begén i ménléhue dob kruse inok méfukas gom bé de sala gom.
Brab énda ménbautis gom inok waléy gom do kagén kuyug.
14 Fésalamatu dob Tuluse non békén begén i ménautise begom saliyu bé Krispowe brab Gayowe.
15 Mélaw énda i gébéréh de ké ménbautis gom dob dawét guwe.
16 (Bénautis guy Estabanase brab kéluhana ro ségélawi.
Endob éndaén i ségiyo énggétédémo ku bénautis gu.)
17 I funa Kristowe begén séménugu békén ké mautisu.
Yamula sénuguén begén muret bé Fiyowe Uret.
Atin énda fénfurungén begén muret loo bé de étéw dob duniyae ni,
inok i de étéw mégélingo,
énda munur ro saén sabaf bé kéfurung guwe émbéréh.
Yamula munur ro sabaf bé barakat i Tuluse.
Mélaw énda émbunéy i barakat Kristowe mémukas bé de étéw sabaf bé kéléhu ne dob kruse.
I kégétigay Tuluse
18 I de étéw mékukum ro,
marok énda i laga i kéurete fantag bé kéléhu Jesuse dob kruse.
Endob i betome do ménfukasén dob de sala tom,
gétiga tom toow i Fiyowe Uret brab fégito noy barakat i Tuluse.
19 Wén i Ménsulate Kébéréh i Tuluse fantag bé ni mano,
“Binasané kuy kégétigay de méngganad.
Atin fégito gu énda i laga i kéfégitung i de étéw marok do métilédtéd ro.”
20 Mélaw gétiga tom énda i laga i kégétigay de énggéféganad taloo no de métilédtéd taloo no de furung émbéréh dob ni duniya.
Non fénggitoy Tuluse énda i lanték i kégétigay kéilawane.
21 Toow fo gétigan i Tuluse.
Bénantakén bé énda gésobutoy de étéw de sabaf bé de kégétiga ro saén.
Yamula ménsuwat i Tuluse mémukas saén bé de étéw munur bé Fiyowe Uret ureté key,
fiyon fo ké béréh i de étéw énda i laga i Fiyowe Uret.
22 I de Judio méuyot ro gégito do mékégaif inok géunur ro de.
Atin i de étéw tidéw Akaya méuyot ro mégélingo bé de gétigan muret inok géunur ro de.
23 Endob ureté tom i fantage bé Kristowe ménléhu dob kruse.
Endob i de Judio mika ro de.
Atin i de étéw békén Judio fégitungé ro énda i lagaén.
24 Endob i de étéw do fénémili i Tuluse munur ro,
do Judio brab do békén Judio,
gétiga roy barakat i Tuluse brab kégétiga nuwe fénggito no dob kéléhu Jesu Kristowe.
25 Non i kégétigay Tuluse toow na fo gérotor bé kégétigay de étéw,
fiyon fo ké fégitungé ro énda i lagaén.
Atin i barakat i Tuluse toow na fo émbagér tidéw bé kébagér i de étéw,
fiyon fo ké wén i do étéw fégitungé ro énda i bagér i Tuluse.
26 Do dumo gu,
fégétédém gom i ni.
Amun fénwaléy i Tuluse begom do munur,
énda sénay médoo begom do gétigan,
brab énda sénay médoo begom do odoron,
taloo no do gérotor étéw.
27 Endob i Tuluse fénémilién i de étéw léngléngén ro dob adafay kéilawane inok kémalanan i de étéw marok toow ro fo gétigan.
Atin fénémilién i de étéw do gérifantad dob adafay kéilawane inok kémalanan i de étéw do téfégérotor.
28 I Tuluse fénémilién i de étéw diyangkaén brab ikaan brab énda i laga ro kun dob duniyae ni inok fégito no énda i laga i de éntingayén karangéy de étéw toow fo mélaga.
29 Mélaw énda i étéw géfélangka-langka dob Tuluse.
30 Gido loo,
fénwaléyéy Tuluse betom dumo Jesuse.
Atin i kéluhanay de kégétiga tom tidéw dob Tuluse fén-angéyén bé Kristowe.
Atin sabaf so bé Kristowe,
ménwaléy tom do métintu brab malinis dob adafay Tuluse brab méfukas tom bé de sala tom.
31 Mélaw toow i Ménsulate Kébéréh i Tuluse mano,
“Amuk wén i méuyot fébantug-bantug,
fatut fébantug-bantug saén bé atiy rénigoy Kadnane.”