‑Tɛ Nyɩsʋa tɔɔ Jona 'a 'mʋnʋɛlɛ
4
‑Tɛ Jona 'ye, ‑ɛ mɔ, Kʋkɔnyɔ ‑yrɩ nɩ, 'ke ɔ 'dɩɛ bɔ ‑wɔ Ninifʋkʋɛ gbo, ‑ye dɛ a ‑gbɛ, ɛ 'de 'a plɔ blee gbe, 'ɔ bi yrʋ 'mʋ.
2 Kɛ ɔɔ 'klɛɛ po, 'ɔɔ Kʋkɔnyɔ da, ɔ nɔ:
Kʋkɔnyɔ o, ‑tɛ 'n 'kɩɛ nɩɛ o 'le 'na 'bri, ‑tɩ ‑gbo, 'n ꞊tu o, nɩ‑ɩ 'klɛɛ 'lu ‑wɔn mue.
Dɛ a ‑gbɛ, nɛ‑ 'n 'ye o 'le ye 'mʋ.
Nɛ‑ nue, 'nɩ 'gba o ci lɛ, 'nɩ po o Ninifʋdɩɔ ke ye, 'nɩɩ o Tasɩdɩɔ 'mʋ mu.
'N yie o nɩ, ‑ɛ mɔ, ‑mɔ mɔ Nyɩsʋa'a nɩ, ‑ɔɔ nahuin ꞊hapʋ‑tɔplɩ 'yi ꞊hlɔn lɛ nu, 'ke 'le ‑gbʋgbɛkɔ 'kwli 'mʋ, 'plɩɩ ꞊nɩ kɔ nahuin a wɔlɩ.
꞊Nɩ po ꞊le yrʋ 'tata, 'plɩɩ ‑na ꞊wlʋ a 'yilɛnɩnɔ 'bʋa nɩ 'dɔ.
'Bɩa ꞊nɩ pue 'le, 'ke ‑bo ‑wɔ nahuin gbo, ‑na gbo‑jihielɛ 'de wlɔn kla.
3 'A ‑tɩ o, Kʋkɔnyɔ o, ‑ha 'mʋ ‑hʋnhlʋn 'mɩa ye.
Ɛ nu ‑tɛɛ, 'ke ꞊bo 'kʋ, 'ɛ ‑hi 'o ꞊bo po ‑hʋnhlʋn.
4 ‑Ye Kʋkɔnyɔ nɔ:
Dɛ‑ nue, ꞊nɩ bi yrʋ 'mʋ 'le?
5 Bɔ po 'klɛɛ lɛ, ‑ye Jona 'hrɩ 'le 'dɩɔ a ‑gbɛ 'kwli 'mʋ nɩ, 'ɔ mu 'le 'a 'pɩa ꞊nʋ ke, ‑ɔ ꞊gbɛɛ 'yrʋ a 'hrɩɩlɛ ye.
'Ke ɔ poo 'le 'a dɩɔnʋ blɔ lɛ.
'Ke 'le blɔ a ‑gbɛ gbo, 'ke ɔ nɩ 'le gbo, 'ɔɔ ‑pre, ‑ɛ die nu, dɛ ꞊nʋ, ‑ɛ di 'dɩɔ ꞊nʋ nue, ɔ 'mue 'ye,
6 Kʋkɔnyɔ Nyɩsʋa 'ɔ nue, tugbɛ ꞊de 'ɛ ꞊ga 'o ‑tɛgbi a ‑gbɛ, 'a ‑buo a hai 'ɩ ka 'yrʋ ye, 'yrʋ 'ʋ 'nɩnɩ nu Jona.
Dɛ a ‑gbɛ, ɛ nue, Jona 'ɔ 'kee yrʋ a pupue.
Ɔ kɔ plɔ a bleelɛ, tugbɛ a ‑gbɛ a ‑tɩ.
7 Kɛɛ, ‑tɛ ‑nyrɛ cɛ lɛ, ‑ye Nyɩsʋa tɛ gbo nyɛ, nyɛ a ‑gbɛ, 'ɛ di tugbɛ ‑nɩ ‑wɛn a bʋɩ, tugbɛ a ‑gbɛ, 'ɛ ma.
8 ‑Tɛ 'yrʋ 'wʋ 'le lɛ, ‑ye Nyɩsʋa nue nɩ, pepe, ‑ɛ hren 'dɔ, 'ɛ ‑hɔn 'le 'yrʋ a 'hrɩɩlɛ 'mʋ, 'ɛ bi Jona lɛ, 'yrʋ ‑mɛ ‑ye, 'ʋ hien Jona a 'lu lɛ ‑hienhien, 'ɔ dʋa 'ku‑wɛ a 'mʋ‑hihie, 'ɔ ꞊mʋɛ lɛ, 'ke bɔ 'kʋ, ɔ nɔ:
Ɛ nu ‑tɛɛ, 'ke ꞊bo 'kʋ, 'ɛ ‑hi 'o ꞊bo po ‑hʋnhlʋn.
9 ‑Ye kɛ Nyɩsʋaa Jona ye po, ɔ nɔ:
Dɛ‑ nue, ꞊nɩ bi yrʋ 'mʋ, tugbɛ ‑gbo, ‑ɛ 'kʋ a ‑tɩ?
‑Ye Jona nɔ:
Ɛ kɔ 'o ꞊o, 'ke ꞊bo po yrʋ ‑popoo, ꞊bo 'kʋ.
10 ‑Ye Kʋkɔnyɔ nɔ:
Tugbɛ ‑gbo, ‑n 'die 'dɔ, mɔ, ‑n 'de 'a ꞊sʋɛ 'ye.
Ɛ ꞊ga 'tata, 'ɛ 'kʋ 'tata.
Kɛɛ ‑ye, nɛ‑ kɔ wɔlɩ ‑nɩɩ 'ye.
11 'Ke 'le Ninifʋdɩɔ ‑mɛ ‑ye 'kwli 'mʋ, nahuin a (120'000) 'milowɩ a ‑wlɩɩ ‑huonɔ, ‑ʋ 'de ꞊hapʋdɛ kɔ dɛ 'klan a 'yi'mʋlɛ‑hɩhɩalɛ yi, nʋ‑ nɩ 'le, 'wlugba‑tɔplɩ 'plɔplɔ 'ɩ nɩ ‑wɛ 'le.
Kɛɛ ‑ye, ꞊nɩ ‑hʋɛ ꞊le, 'ke ꞊bo 'ye 'dɩɔ gblakadʋ a ‑gbɛ a wɔlɩ.