‑Tɛ Nyɩsʋa lee 'le Jona Ninifʋdɩɔ a nahuin ‑wɔn, do 'hɔn a kɔ
3
‑Tɛ Jona nɩ 'klɛɛ 'o 'yru nʋa 'mʋ, ‑ye Kʋkɔnyɔ dɔ lele nɩ, 'ɔ 'prɔɔ 'le ‑wɔn, do 'hɔn a kɔ, ɔ nɔ:
2 'Du ye 'mʋ, mu 'le 'dɩɔ gblaka ꞊nʋ 'mʋ, ʋʋ Ninifʋ daa, pue 'dɩɔ a ‑gbɛ a nahuin 'na titie ꞊nʋ, 'n di ‑mʋ pue.
3 'A dɛ ‑gbo 'klɛɛ, Jona ꞊tuu 'o Kʋkɔnyɔ a win nɩ, 'ɔ mu Ninifʋdɩɔ 'mʋ.
Ninifʋdɩɔ a ‑gbɛ, ɔ mɔ 'dɩɔ gblakaa nɩ.
'A 'bʋbʋa a ‑tɩ, 'bɩa ꞊nɩ kɔ ‑bo 'bɩɔ ꞊tɩɔ, ɛ di gba ‑nyrɔwɩɩ ta.
4 ‑Tɛ ɔ nyre 'le, ‑ye ɔɔ wlɔn lɛ na 'dɩɔ, 'ke 'le ‑nyrɔwɔ a ꞊gble 'kwli 'mʋ, 'ɔɔ 'le win 'yaa, 'ɔɔ 'le Ninifʋdɩɔ a nahuin ‑wɔn 'prɛɛ, ɔ nɔ :
Kʋɛ kɛ mɔ gbo, ɛ hie 'le ‑nyrɔwɩ a ‑wlɩɩ 'hɔn, Kʋkɔnyɔ 'mʋ 'dɩɔ ‑gbo 'wla.
5 ‑Tɛ Ninifʋ a nahuin 'wɔn ‑tɩ a ‑gbɛ, ‑ye ʋ pui ‑tɛɛ, 'ʋ ‑yrɩ, ‑ɛ mɔ, ʋ di 'nɩ ꞊ci, 'plɩɩ nahuin 'bii, kʋɛ 'le 'waa nyɩgblaka ‑wɔn gbo, ‑bo mu ‑mumu, ‑bo yɛ 'yuo 'cicrɛi, 'ʋ pue blɛ ‑wɔn lɛ, ‑ɛ die nu, ʋ 'mue Nyɩsʋa tɔɔ, ‑ɛ mɔ, 'waa plɔɔ 'le gbo 'nɩ 'nɛɛ, 'ʋʋ ‑hʋa bʋ hie 'o 'waa nunuklɔ ‑hʋan gbo.
6 ‑Tɩ ꞊nʋ, Jona ꞊tu, Ninifʋ a bodɩɔ, ɔ 'wɩn nɩ, 'ɔ ‑hɔn 'a gbata ke 'mʋ, 'ɔ ‑hɛ 'a bodɩɔwlawlɩ, 'ɔ pue blɔ ‑wɔn, 'plɩɩ 'ɔ wa 'o 'tɔpupu a du ke gbo.
7 'Ya 'o lele 'lu, ɔ po 'le tete, ɔ kɔ 'blʋgba a ye'mʋnaanyʋ 'hɛɛn, 'ʋ le Ninifʋdɩɔ a nahuin, ‑ɛ mɔ, ‑tʋnahuin bi 'le ye, kɔ 'waa 'wlugba‑tɔplɩ, bro, blablɔ, wlo, ʋ 'de kɔ bʋ di dɛ, kɔ bʋ 'na.
8 'Ɛ nɩ nahuon 'bɔ nɩ 'o, bɔ pue blɔ ‑wɔn, kɔ, 'wlugba‑tɔplɩ, bɔ pui ‑wɛ blɛ ‑wɔn lɛ, kɔ, bɔ da Nyɩsʋa, 'ke 'le ‑tɛɛkɔ 'kwli 'mʋ, bɔ hie 'o 'yilɛnyrehru ꞊nʋ gbo, ɔ nɩ 'o wlɔn, kɔ, bɔ nyra 'a ‑balʋklɔ gbo.
9 ‑A 'die yi, 'bɩa ꞊baa lɛ nu, bakla꞊de, Nyɩsʋa, ɔ 'dɩɛ‑ bɔ poo ‑a mʋ 'a yrʋ gblaka ꞊nʋ lɛ, ɔ po lɛ, ɔ di ‑a mʋ lɛ poo, bɔ ‑wɔ ‑a mʋ gbo.
10 ‑Tɛ Nyɩsʋa 'ye dɛ ꞊nʋ, ʋʋ nu, kɔ, ‑tɛ ɔ 'ye, ‑ɛ mɔ, ʋ hie 'o 'yilɛnyrehru ꞊nʋ gbo, ʋ nɩ 'o wlɔn, ‑ye ɔ ‑yrɩ nɩ, ‑ɛ mɔ, ‑tɛ ɔ po o, ‑ɛ mɔ, ɔ diu o gbo 'nɩ ‑wɔ, ɔ 'dɩɛ bɔ nu 'klɛɛ lele dɛ a ‑gbɛ.