Nim sulat ni, bud kun snulat Jan, yóm sotu bè yó kem gel hógów Jisas. Bè yóm ksulaten du nô bè yóm sotu hungul te mohin boluyen Patmus. Yó gónó le htólóng du bè yó mò henged gónó le bmanggù du, abay se kenbê le yóm gel toloken. Móyónen matay ne bè yóm ksulaten ni.

Bè yóm kdaw yó, wen udin lemwót bè yóm tau hol geta bè Rom. Yó udinen, sok fes tau hemtahu bè Jisas Krays, gotu hensidek lu. Wen se mowil bélê le, okóm tey dê matay. Yó gónó Jan smulat ebè yó kem tau hemtahu mò gónón gemduf kul anì là tebel le du yóm kehtahu le balù nô yóm keglayam le.

Tulónen kul yóm deng hegfan Jisas Krays béléen, ne hono hningón yóm kmò kmoen du yóm angat kesfuléken dalang se bè yóm hol són benwu. Yó hegfanen bè Jan, duhen yóm tey kegeta yóm gónó tekuy mogot ne yóm tey kfasangen. Hegfanen snéen yóm angat kegbaen yóm klamangen benwu, ne yóm keglaen ke Seitan dalang se yó kem gel dóken. Ne bud hegfanen snéen yóm lomi longit ne yóm lomi benwu nmò Dwata, yóm benwu knamal Jisas Krays, yóm gónó tekuy mogot.

Bè yó kem dê tulón Jan ni, yó boluyen ke Jisas Ngà Ubiha, abay se bè yóm tehe katay Jisas du se henged ubiha dsù Dwata mò mkó salà kdéen tau.