Nim Jud tehe smulat du nim sulat ni, twoli Jisas bè yéen. Hol le setwoli Jim, yóm tau gónó le galak yó kem tau hemtahu bè Jirusalim, yóm fen smulat du yóm bok Jim.

Là kóen mtukul tau hemtahu gónó Jud e hemwit du nim sulat ni, tódô sulaten ebè yóm kdê le. Yó hol tulónen kul, duhen yóm eles hol ketgama le yó kem tau tmolok sekban. Bè yóm gel ksut yó kem tau yó, gel mon le tau le hemtahu kun, okóm yó gónó le dmilô kul bè yó kem sidek gel nmò le. Gel le hegmón, hulung le mebel filak hlan le bè yóm ktolok le, ne són mò samuk nô bè nawa le. Ne ke wen bè yó kem tau hemtahu gmung bélê le, gotu le gbót mò sidek se kul.

Tey ketgel Jud nawa yó kem tau hemtahu deng btang anì bud le semfulék bè yóm tahu tolok deng tehe lolò le.