Nim Jan smulat du nim sulat ni, du se sotu bè yó kem sfolò lewu tehe nélék Jisas mò gel hógówen na a hetngón yóm kun tulón. Bè yóm kdê tau néléken, Jan se yóm hol twoli bélê le. Bede deng tey tuha ne bè yóm ksulaten du nim ni. Laen dù mtukul tau hemtahu gónóhen e hemwit du, tódô hwiten ebè yó kem benwu deng wen tau hemtahu nô du.

Bè yóm kdaw yó, deng wen kem tau tmolok sekban lem blóng le. Yó kesekban le, mon le sundu Ngà Dwata du kun yóm Jisas, abay se là kóen na a hbaling tau yóm Ngà Dwata.

Yó hol bótóng tulón Jan bè nim sulaten ni, deng tahu baling tau yóm Ngà Dwata, duhen Jisas Krays. Hol tahu Dwata se yóm Jisas, bede hol tahu tau snéen bè yóm knóen te tonok. Yó hol sen-galu Jan bè yó kem tau hemtahu ke hol le sfulung bè Jisas Krays. Tulónen snéen yóm ilô yóm tau ke deng hemtahu, duhen yóm kbong nawahen kem dumuhen tau, ne sotuhen, ke wen gónón gemsalà, là kô henlósen du yóm kmoen du.