Nim sulat ni, laen dù tau temngón du yóm tehe smulat du. Són olo tngón me yóm gónón e hemwit du, duhen ebè yó kem Ju deng hemtahu bè Jisas. Bè gnan kdaw, yó boluy yó kem Ju, kem tau Hibru.

Lemwót bè yóm deng kehtahu le bè Jisas, yó gónó le kmutó kul nawa yó kem dumu le Ju là hemtahuhen. Gel hensidek le lu anì là bud lolò le ke Jisas, ne semfulék le ebè yóm tehe hentahu le. Ne tahu se, deng wen bélê le semfulék lemwót bè yóm là kegbala le du yóm kehsidek le kul. Yó gónóm mon, wen fen smulat ebélê le mò temgel nawa le bè yóm alì keglayam le lemwót bè yóm klolò le ke Jisas.

Yó hol tanay tulónen bè nim sulat ni, duhen Jisas yóm hol ngà Dwata. Du se yóm hol geta senta yó kem hógów Dwata nô bè longit. Dalang se yó kem tau tehe tmugod ke Dwata ekni, Jisas se yóm hol geta senta le.

Ne bud tulónen yóm katay Jisas mò kun dsù ebè Dwata, ne yóm tey ktueden hkó salà senta yóm gel dsù le. Ne bud tulónen snéen yóm klowilen, ne yóm kesfuléken ebè longit mò blóng tau ebè Dwata. Ne yóm keseblóngen yó, alì hyu senta yóm gna tehe snalig le. Ne bè hol sónen, gendufen lu anì là knogol le ke Jisas, ne hetgamahen kul snéen yóm ktafak Dwata du yóm tau kmogol du.