Si Ikarwan Surat na ni
JUAN
1
Komo busat a babayi nin piniliꞌ nan Dios,Siꞌko si Juan a si pangulo ran mammempera. Surat koyayti komo tan konran uaꞌnak mo.
Peteg a mabli kamo kongko, tan amboꞌ tamoꞌ kongko no kai pati anamaet konran sarba ran mampangalilbiꞌ sa katutuꞌwan a nangibwat konan Dios. 2 Mabli kamo komi ta say katutuꞌwan ket mampisyon ana kontamo sawanin tan anggaynan-angga. 3 Si Dios nin Ama tamo tan si Jesu-Cristo nin Anak na, bindisyunan ratamo, ingangaꞌdwen ra, tan byan ratamon mabistan kapapaꞌsar. Wanti a gawꞌen ra kontamo nin mampisyon sa katutuꞌwan nin nangibwat konan Dios tan mangkawaꞌnanen tamoy saya tan saya.
Pangipapanemtem nin say Maipaꞌkaꞌ sa Pangangadoꞌ
4 Pinasyan ririket ko nin makaꞌkit a saray raruma konra nin uaꞌnak mo ket mampagkabyay sara nin kumpruntado sa katutuꞌwan a syay nigan-gan nan Ama tamon si Dios nin gawꞌen tamo.
5 Ket sawanin, busat, main yayti e nin ipapanemtem ko komo:
kawaꞌnanen moyo a saya tan saya.
Amboꞌ yayti nin baꞌyon gan-gan a manꞌibaritaꞌ ko komoyo banaꞌ ta mangkarnge-karngeꞌ tamoyaynayti nangibwat et sin nuꞌna. 6 Ket say pakatandaan a peteg a mampangawaꞌnan atamo, ket si mantumulok atamon pirmi sa nigan-gan nan Dios. Siti a nigan-gan nayna kontamo nangibwat et sin nuꞌna a matkap a magkabyay atamon kumpruntado konan siti, si kawaꞌnanen tamoy saya tan saya.
Pakatalad nin Kai nin Malingo
7 Manꞌipapanemtem ko komoyo a maipaꞌkaꞌ konan siin ta, abaw sara anaod sawanin a mampangibarang sa tutawo sa sarban lugar. Say manꞌiyakay ra ket bulaꞌ ta kai ra nin manꞌalilbien a si Jesu-Cristo ket nagꞌin yan tawo sin nako yadti sa lutaꞌ. Sitin manꞌiyakay ra ket panglilingo tan kuntra kona ni Cristo. 8 Edet, pakatalad kamo lawas ta pigaw nin kai kamo kumon malingo. Ket, say niyakay mi komoyo, kai magꞌin nin kasan kakanaan no kai edet, say gun-guna nin gaꞌmuran moyo liꞌ mangibwat konan Dios ket kai nin makurangan.
9 Si sayay tawo a kai nin mandumaer nin tumumbok sa niyakay na ni Cristo ket lamuꞌnan nayti et nin akay, sitin tawo, kai ya mampisyon a Dios kona. Baleꞌ si mandumaer nin tumumbok sa niyakay na ni Cristo, si Dios nin Ama tan si Anak na, mampisyon sara kona. 10 Kanyaꞌ nin no main nin mako komoyo nin say iyakay ra ket sakalako, andiꞌ moyo sara nin akuen sa pammali moyo, ni andiꞌ moyo sara nin abrasawen. 11 Wanin ta no abrasawen moyo sara, mangkiranod kamoyna sa dukaꞌ a man-gawꞌen ra.
Pammakumusta
12 Abaw et a rabay kon ibaritaꞌ komoyo baleꞌ kai ko nin rabay nin ibaritaꞌ sa surat, no kai edet, rabay koy makodsen komoyo tan makairgo katamon pirsunal ta pigaw nin magꞌin nin liso a ririket tamo.
13 Saray uaꞌnak nan busat mon babayi nin piniliꞌ na anamaet nin Dios, mampakumustawen raka.