Jawen yoitima jonibo Diossen noia
11
“Israel jonibo bake keskápari inontianbira, moa en jato noia iki;jabo nokon bakebi iketianra, Egiptoainoa en jato pikoa iki.
2 Jaskara iketian, ebetan iti en jato kenaabira,
jatiankaya eibakeax ochóreskana iki.
Ja nokon jonibaonra iresa diosbores jawéki menikana iki,
jainxonra ja rabiti aká jawékiboribi incienso ininti menoxonkana iki.
3 Jaskákanainbira, Israel jonibo ikinboreskin en jato jeneyamaa iki,
jainxonra jaskati jakanon ixon en jato onanmaa iki;
ikaxbira en jato koirannai jabaon onanyamaresa iki.
4 Nokon jakon shinanman itan nokon noi shinanmanra,
eiba itiakin bexon,
xoma akai bake ati keskáakin,
ea beibantiakin en jato imaa iki, itan
jato patax kaxonra en jato jawékiati menia iki,
5 ikaxbira jabo eiba betin kenyamaa iki.
Jaskatira Egiptonko banéribikanketian,
Asiria apo jaton koshi iti iki.
6 Jaton jemabo betan reteanankinra,
jaton kikin koshi xobobo keyokanti iki,
jato jaskara ati shinanmanbira jatobi ati iki.
7 Nokon jonibora eibakeax ochota ikax,
jatonbiribi itin keeni jenekashamakanai;
naioriti saí ikanaibira tsonbi jato akinhamai.
8 ¿Jawekeskakinki en mato jeneti iki, israelitabo?
¿Jawekeskakinki Israel jonibo en jeneti iki?
¿Adma jemamea jonibo aní keskáribiakinki, en mato keyoti iki,
iamax ja Siboim jemamea jonibo aní keskáribiakin en mato ati iki?
¡Akonbireskin noixon en mato shinankin noibai kopíra,
en mato jaweayamai!
9 Sináxonbira en moa mato jaweatima iki:
Israel jonibora en moa jakonma imawetsatima iki,
ea riki Dios, eara jonima iki.
Eara Jakon iki, eara mato betan iki, eara mato keyoi joama iki”, iki.