Jaskáakinshaman ayunanti
58
Ibonra ea yoia iki:“Rakéyamai kikin koshín saí iwe,
trompeta ati keskáakin
kikin koshín min joi pikowe;
jakonma aká kopí nokon jonibo notsinwe,
Israel jonibo jaton ocha kopí jato notsinwe.
2 Netetiibira ea benakanai,
nokon esé onanaxa raroshaman ikanai,
jakon akai jonibo keskáshamanra ikanai,
jainxonra nokon esébo jeneyamakanai;
jakon esébora ea yokákanai,
epatax ikáxa raroshaman ikanai,
3 jaskara ikaxbira, neskati yoyo ikanai:
‘¿Jaweatiki Diossen oinnamabi non ayunanai iki?
¿Jaweatiki jan noa shinannaimabi,
nonbi masá teneti iki?’
Ja ayunanti netenra jawékinin mato maroai,
maton teemai jonibora maton masá tenemai;
4 ja ayunanti netenra join iananani,
itan reteananibores mato ikai,
reteti keskáakinbores maton jato timai.
Ayunanibi mato jaskataitianra,
maton oranaibo en ninkati atipanyamake.
5 ¿Maton shinanaki ayunankin maton masá teneai,
itan tawa ikai keskati mato beotai,
jainoax xaxa chopa saweax
chiimapon mato rakataibo, nokon keen iki?
¿Jarin ja maton ‘ayunon’, akin akai,
itan ‘Ibon keenshaman nete’? iki mato ikai.
6 Jaskarama riki.
Jaskara ayunonin ea keenai riki neskara:
Cadena ati keskáakin, jaskara atimabo moa ras ati,
jiwi teomaxon jan waka manexa risbí choroti keskáakin;
jakonmabo moa choroti,
jakonmakinbires yonokanaibo, xabaaxon,
jatíbi jan jato nexaa keská jawekibo moa ras ati;
7 ja pikasaibo jato jawékiamati,
ja xobooma onitsapi joni min xobon imati;
ja chopaoma joni chopa sawemati, itan ja
mibé jonibo akinkin jeneyamawe.
8 Jatianra moa nete xabákin
penekan tenaa keskáshaman mia iti iki,
itan min xatébora ishton benxoti iki.
Matora ponté iti iki,
itan koshi ixonra mia koirankin en jenetima iki.
9 Jatianra min ea kenaa, en mia jen ati iki;
en akinnon ikax ea yokati saí ikaitianra,
en mia yoiti iki:
‘Eara neno iki’ akin.
Jato ramiaxon yonoti shinanbo maton keyoketian,
wetsaboki mia jakonmai yoyo iamaketian,
jato jakonma imai mia jaki
jansoi yoyo iamaketian,
10 pikasaibo pimai miabi teeketian,
jawékinin maxkáxon masá
teneaibo min akinketianra,
min ikábo, joekan tenai keská iti iki,
min otabora bariapan barin tenaa keská iti iki.
11 Enra jeneyamakin mia jan kati yoiti iki,
jain jawebi xoxoyamai mananman
iketianra, icha piti en mia meniti iki,
en mia meniara min yora koshi ikáx,
joa wai jakonhakin onpax
tachita keská mia iti iki,
jene jokonainko jawetianbi jene
maxkáyamai keskára mia iti iki.
12 Min jonibaonra, moatian xobo
moa payotabo jakiribi akanti iki,
jan xobo tewanti akáni moa pacha
baritiayabora jan tewantibo akanti iki.
‘Chiké paketa weninaibo’,
‘xobo payo benáaibo’,
akinra min jonibo janekanti iki.
Tantiti nete yoii iká
13 Tantiti nete mekekanwe;
nokon jakon neten, kopí biti teebo ayamakanwe.
Ja netera atibi jan Ibo rabiti
jakon nete iki,
ja netera iti jake raroanan Ibo shinanti netebiribi;
min jawékibiribi ayamakin jabichobiribi rabiwe,
min keena jawékibobiribi
benayamawe, itan ja axon kopí bitibo ayamawe.
14 Jaskáaxonra, eibakea
jan raroti min nokoti iki,
itan en imaara ja main jatoaresax joni koshi mia iti iki,
jatianra en imaa min reken papa Jacobnin
jawékibo jawen bake ixon biti tekikin biax mia raroti iki”.
Ibonbira jaskara iti yoia iki.