Jonibo Jerusalénhain moa boribakana
35
Jain jawebi xoxoyamai mai manxanra raroti iki;kikinnira raroti iki, jaínoa icha yoá tsekatira iti iki,
2 jain xoxobanon lirio joa keská joabo,
kikinni benebakanon itan kikinni rarobakanon.
Líbano manan keská kikin metsára Diossen imati iki,
Carmelo manan keská itan Sarón mai
teshanpa keskáshaman jakon jain yoá xoxoaira imati iki.
Jatíxonbira Ibo kikin pené oinkanti iki,
bebonbires ani koshira non Dios oinkanti iki.
3 Mato jan ea ninkataibaon, moa koshiomabo jato koshi bimakanwe,
paxkinnabo jato koshi shinanmakanwe,
4 ja rakébo yoikanwe:
“¡Rakéyamakin, koshi shinankanwe!
¡Ninkakanwe, noa xabáira non Dios neno iki,
itan atibira non rawíbo jato masá tenemati iki!” akinbo.
5 Jatianra benchebaon ointi iki,
pabebaonra ninkáti iki;
6 chaxo ikai keskatira chantobo choronti iki,
yoyo iosmabora saí iti iki.
Jain jawebi xoxoyamai mainko itan mai manxan
ikainbora jene jokonax bai koshibo iti iki.
7 Jain jawebi xoxoyamai mai ikainra ian iti iki,
ja mai manxan ikainra jainoax jene jokonaibo tsamábires iti iki.
Rama jain chacal yoinabo jaainra tawa itan neshan tawa xoxoti iki.
8 Jainra westíora kikin jakon bai jati iki, jawen
janera iti iki, “Iresama Ibon bai”.
Ja kerásbora jain winótima iki;
shinan onanmabora jain nitima iki.
9 Jainra leónbo yamati iki,
siná yoinaboribira jain nokotima iki.
Wetsanko boxon xepokanabora moa xabakaatax,
jaton itinko jakiribi ja bain bokanti iki,
10 Ibon jato kopíaxon jakiribi bia moa xabakaatabora;
Jerusalénhain jikii raroshaman bewábo
bewakanti iki, jonibora jatíbitian
raroshaman jakanti iki.
Raroshaman iti itan jakonshamanra jain nokokanti iki,
jainra jawetianbi moa winikantima iki,
jawetianbira chexakakin moa masá tenekantima iki.