Samaria koiranmeeti keshana
28
¡Jawe ireskiai ja Samaria,ja Efraín jaon rabitai jawen pené maiti
keská, ja paenres jonibo;
jan raotara joa choshiax
tsorisa keská iki, jara banaa xoxoai mai
teshanpa maxkaten iká iki,
ja jemamea jonibora pae xeai cheatabo ikanai!
2 Ninkákanwe, Ibon mekea koshi jonira jake,
jara oi xewa keská koshi iki,
keyomis niweaba keská riki,
oi kexto koshi beai keská, itan
jenetia onsati beai keská riki.
Jawen mekenmanbi maiki potaxonra,
3 jawen taen pachoti iki, ja paenres jonibo,
ja metsá maiti keská iketian,
Efraín jaon rabitai jema.
4 Jatian jan metsati raokaatai,
ja teshanpain iká jakon mai ikainoa joabora,
reken iká higo bimibo keská iti iki:
jan moa joshina oinnaton, tsekaxon kokotires.
5 Ja netenra jatíbi atipana Ibo,
pené maiti keská iti iki, ja texea jawen jonibaonra,
jan raotai keskáakin jakonman rabikanti iti iki,
6 ja joni koshibo tsinkita ikainxon,
atikeskabiakin akanon ixonra,
ja joi benxoaibo jato shinan meniti iki,
itan sontárobora jemanparanan inon ixon
koshi jato meniti iki.
7 Jatian wetsabobiribira vino xeax tayákanai,
kikin pae xeatibo xeaxa tatí ikanai:
ja kikin pae xeatibo xeax tatí
ikaibo riki sacerdotebo, itan
profetabo, ja pae akáxa shinanhoma
ikanai; ja kikin moka xeatibo
xeaxa tatí ikanai,
paenxon meskóbo oinnira tayákanai,
paenna ixonbira jakonma aká kopí,
jato masá tenemati yoikanai.
8 Jatíbi jaton mesabaon kinan
bochoabora kerás iki, jainra
jaweranobi kerásma yamake.
9 Ea yoiira neskati yoyo ikanai ikira Isaías iká iki:
“¡Noa axeaimein joti iki, ja
Diossen oinnamein noa axeati iki!
¡Bake maxkoshokobo
10 ramakaya kirika yoyo atin axeaitian
amakin:
ba be bi bo bu amati keskáakin!” ikira ikanai.
11 Jaskati, yoitimakanaitianra,
onantima join, wetsa join, jaskáaxon
nato jonibo Ibon jato yoyo akai iti iki.
12 Janra moabi jato yoia iki:
“Nenora jawe iamai
moa jakon iti iki,
nenora jain tantiti iki;
ja paxkinnabo tantibakannon”, akin.
Ikaxbi ja akáshamaira mato yoitimaa iki.
13 Jaskákinra bakeshokobo atin
Ibon mato yoyo ati iki,
ramashoko kirika yoyo ati onannai
ati keskáakinra mato ati iki.
Jaskatira, moa kaibi mato pakéti iki,
pekatenbira mato pakéti iki,
matora xatéyonti iki,
trampain pakéketianra,
jainbi itiakin mato yatanti iki.
14 Ninkakanwe, Ibon joi,
tsoabi onsatanyamakin jakonmanin yoinmis jonibó
Jerusalén jemankoxon jato ikinnai koshibó.
15 Matora ikai:
“Mawá betanra ja senenhati joi moa non aká iki,
jara mawatabo betan
non joi benxoa yoii iká iki,
onsá jakonmabires jawéki joxon
noa nokonaketian;
onsá jakonmanin anaketian jain jonéti
benakinra janso meran jonéti non nokoa iki,
non paranketianra, jakonmanin noa
atima iki”, ikira mato ikai.
16 Jakopíra Ibon yoiai:
“Jerusalénhainra ja en katota westíora kikin
kopí makan en akai, jara moa en tanayona ikáx,
jaki xobo koshiti makan iki.
Ja makanki koshiabora
jakonshamanres jati iki.
17 Ja xoboakinra atikeskabiakin jakon anoxiki,
jan ponté nia onanti plomoya risbikan atikeskaakin,
jan besenen pontérin ixon onanti keskaratonribira ponteti iki”.
Onsá jakonmanin anaketian jain jonéti maton benaa jansora,
oi xewakan keyoti iki,
mato jain jonetaira jenen keyokin boti iki.