Isaíkan chiní baken apo ixon jakonshaman itan atikeskabiakin jato ikinti
11
Ibonra yoia iki:“Isaí Davidkan papara jiwi tapon keská iki, ja taponhainoax
xoxo pikotai keskatira jawen chiní bake pikóti iki.
2 Ibon shinanra, jenéyamai já betan iti iki,
jatianra meniti iki onan shinan, ishton jawéki onanti shinan,
jakon katóti onan shinan, koshi shinan, jan onanti shinan,
itan Iboki rakéti shinan.
3 Pontekin jaton akábo yoixonkinra
jaton jisáres oinxon atima iki,
jaskara ninkakaatai kopíresa,
jakonma aká riki ixon yoitima iki.
4 Jaki koshitiomabora, atikeskabiakin
jakonhakin jato joi benxoaxonti iki,
ja mainmea jawebiomabo jakonhakanon ikaxa, jaton paranna iti iki.
Jawen joinresa, ja sináxon ishtonbires jakonma
akaibo jato masá tenemati iki,
itan jawen kexakan xoon aka
niwenra, jakonmabo reteti iki.
5 Jatíbitianra, atikeskabiakin jakonhakin atin, itan
ja ikon jawékinin raota iti iki.
6 Jatianra pimis yoina, itan ja carnero,
jawe iamai jakonshaman jabékonti iki,
ja ino betan cabra bakera,
jainbicho tantiti iki,
waka bake betan león bakera,
potaananyamai anibekonti iki,
jatianra bake maxkon jato nikinti iki.
7 Waka awinra oso awin betan
raenanti iki, jatianra jaton bakebo
jainbicho tantiti iki.
Waka benen akai keskáakinra,
leónman pasto piti iki.
8 Kamox kininkora bake tsiniti iki,
ja ronon naa ikainra jawen
meken niati iki, ikaxbira ja ronon
jaweatima iki.
9 Jawenbi jato ramiatira ja nokon manan ikain moa yamati iki,
jenen ja aniparo bochoai keskáakin,
Ibon onan shinanman jatíbi mai moa bochoaa iken”, ikira iká iki.