Onan shinan yoyo ika
8
Diosbi onan shinan ikaxa koshín saí ikai;jabi ishton jawéki onanti, shinan ixonra jawen joi jato ninkámai.
2 Mai matoainbora chankatai,
ja shitakanai bainkoboribira ikai,
3 xepótiainxonbora jato ninkámai,
ja jeman kaai jikitiainkoxonbo:
4 “En mato yoiai joibo ninkakanwe jonibó.
5 Bakeranonbó, shinan onanti maxkatabo itan onan shinanhomabó,
¡Jakon katóti onan ikanwe, itan ichabires jaskatax jati onan ikanwe!
6 En mato yoinon ninkakanwe,
kikin jawékibo betan ja jakonma yoixonti yama.
7 En mato yoiaira ikon iki;
ea jansoi yoyo itira nokon keenma iki.
8 Jatíbi nokon joibora atikeskabiakin ati yoiabo iki;
jainra ikonma joibo yamake.
9 Ja ishton jawéki onanaitoninna itan ja ninkataitoninnara,
nokon joibo onantishaman iki itan jawe jakonmabi yointi yama iki.
10 Ja plata betan jakon oro bititianbi,
jaskáakin jawéki ati betan onan shinan bikanwe”.
11 Ja onan shinanra metsá makanbobi winoa kopí iki;
¡Kikinbires non keen jawéki betanbira senenyamake!
12 “Ea ja Onan shinanra, ja ishton axeti
onan shinan betan jake,
jawéki anoxonra akamatianbi en shinanshamanpariai.
13 Ja Ibo jakon ixonaitoninra, jakonma omisai.
Enra omisai rabí jawéki betan ja kikinman shinanmeeti,
jainoax jakonmai jati betan jansoribi.
14 Ea riki jaskara ati shinanxon akai,
ea riki jan aká jakon ikai itan koshi.
15 Ea kopí riki, apobaon koshi jikixon jato ikinnai,
itan jaskara iti esébo akanai.
16 Ea kopí riki, koshibaon iboaxon jato ikinnai,
itan koshibo jakonmain kati jato yoiai.
17 Ja ea noiaboribira en jato noike,
itan ea benaibaonra ea nokoai.
18 Enra meniai icha jakon jawékibo itan jan rabítibo,
anibires jan jakon ninkakatibo, itan en jawekia imaboresti iki.
19 Ja en meniaira jakonhakin oro charáakanabi winoa bebon jakon iki;
itan ja en menikasaira, platabi winoa bebon jakon iki.
20 Eara pontéres akai ikai,
ja atikeskabiakinra en jakon akai.
21 Ja ea noiabora en jatonabiribi meniai:
jaton xobobora jakon jawékibaon bochoati iki.
22 Ea Ibobi riki onan shinan: Ja tee peonontianra ea moa jaa iká iki,
en jatíbi joniakin peoamatianbira ea moa jaa iká iki.
23 Ja mai en joniamatianbira,
ja nete peoi ea moa jaa iká iki.
24 Aniparobo yamatianbira, ea moa jaa iká iki,
parobo yamatianbi itan jene jokonaibo yamatianbi.
25 Ja itinkobiribi koshiakin mananbo akamatianbi
itan ja ani manánbo akamatianbira, ea moa Ibon jamaa iká iki;
26 enra mai itan jain iká xabábo joniamapari iká iki,
nato neten jaa mai potobira en akáma iká iki.
27 Ja aniparo jenebo manaon iká nai xabá,
ja itinkobiribi en imanontianra, ea jain iká iki.
28 Jainoax ja koinbo, ja itinkobiribi naikan imanontian,
itan ja aniparo chichokea jainoax jene jokonti koshi meninontian,
29 jatian ja aniparo jenebo ja senenainbiribi
iti yoinontian,
jainoax jan mai koshiatibo anontianra,
30 ea jain iká iki.
Eara jatíbitian jainoax raro jokonai iká iki,
jaskatira jatíbitianbires ea raroa iki;
31 ja nete joniax jan raroira ea tsinia iki,
¡Joni joniatoninra en raro shinanna iki!
32 Jatian rama, ea ninkáxonkanwe, nokon bakebó;
nokon ikábo chibanira, mato raroshaman ikanti iki.
33 Ja maton jaskáakin jawéki atibo ninkakanwe;
ea omisyamakanwe.
34 Jan ea ninkataira raro iki,
itan nokon xobo xepotiainbo nete bibokin koiranaibo.
35 Jaskara iken jaweratobaonki ea nokoai,
jabaonra jati nete nokoai, itan ea keena keská iti nokoai;
36 tsoaki eibakeax ochótai, jara janbix ramitai;
¡Tsonki ea omisai jara mawá noia iki!”