Tsini ainbo paranmisti onan
7
Nokon joiki yoiti iwé, nokon baké;ja ati en mia yoia nokon joibo ichabires shinanwe.
2 Yoiti iwé, ja en mia ati yoia joibo akí,
itan en mia axea keskáakinbo awé;
min bero wiso koirannai keskáakin,
ja en mia axea akíra mia jati iki.
3 Min mekenhainbo nexawe,
itan mia shinanbenotimaakin biwé.
4 Ja onan shinan itan jan ishton onanti shinanra, min poi itan
mia jabé raenanai ainbo akai keskáakin, min noia iti iki.
5 Ja esébaonra mia tsini ainboibakea xabaati iki,
ja wetsa joibaon jakonma amanoxon parankin, mia jakonhakinbo yoyo akainbi.
6 Westíora netera nokon xobo ventana
joyókainainxon, en oinna iki,
7 jaweti bakeranon jawebi winotama ixon shinan biamapari,
jainoara ja wetsabo winoa bebon shinan maxkata en oinna iki.
8 Jára esquinain nokotax calle shitabaini,
ja ainbaon xobobi pontebaini kaa iki.
9 Jatian moa yantanaitianra,
yametiribi peokoota iki.
10 Jatian ja bechii kaira ainbo, ishtonbires pikókaina iki,
jatíbi jawen ikábora westíora tsini ainbo ikai keskata iká iki,
11 westíora ainbo ishtonresai ikax itan areskin jawéki akai,
jawen xobon iti onanma,
12 jainoax callenkobo, plazainbo itan esquinainbo niresa,
jaweratopariki reken winotai ixon, yatanoxon manai.
13 Ja ainbaonra bakeranon paoxon betsó axon,
itan rabinyamakin yoia iki:
14 “Enra nokon diosbo betan jakiribi raeananoxon, jato yoinabo meninoxon yoia iki,
itan nato netera ja meninoxon yoinibo en moa senenhake.
15 Jakopíra mia nokoi ea pikóke;
¡mia ointinin keenhirai iikinra, en mia nokoke!
16 Nokon oxatiainra Egiptonkonia,
westíora metsá colcha lino en kakaake,
17 jara en aroma mirra inintinin, jainoax
áloe inintinin itan chitari inintininribi en ininhaa iki.
18 Noa noianana ikax, nete xabatai kaman,
noa ikonbiresi raronon jowé,
19 nokon benera xobon yamake:
ochó kaa riki;
20 kakinra westíora bolsa koríki boá iki,
ja moa oxe minkoai netenbira banéyamai”, akin.
21 Jaskáakin jawen metsá join yoikin teaboxonra,
ja bakeranon moa jen imaa iki,
22 moa jawe iamaira já pekáo kaa iki:
westíora waka bene jainxon retetiain bokanai keskati,
itan westíora chaxo trampain paketi kaai keskati,
23 ja basimabira westíora pian, jawen jointiain bebankin tsakati iki;
westíora isá trampain paketax ikai keskati,
jainoax mawati kaira onanyamaa iki.
24 Jaskara iken ea ninkáxonwe, nokon baké,
netékainxon nokon joibo ea ninkáxonwe.
25 Ja ainboori min shinan akáx jao kayamawe,
já chibani kaxon jakonma ayamawe,
26 jaskáxonra moa jan jato icha mawámake;
¡Jan mawámabora moa bebon ichaira iki!
27 Jawen xobonko kati jawékira,
mawáin kati jawéki iki.