Jobnin senentiainbi joi yoikin senenhaa
31
Jainxonra yoiboresa iki:Enra akonkin ja senenhati nokon bero betan aká iki,
tsoa ainbobi oinnax jaon keentima.
2 ¿Jatian jawereski en bia iki, ja jatíbi Atipanatonin,
naikanxon ea menia?
3 ¿Jakonma ikai, itan ocha akaiboresmarin,
ja ani rabintiain nokótibo?
4 ¿Jatíbi ja en akaiki Diossen oinyamai,
jatíbi ea jain kaaiboki oinyamai?
5 Akonkinra en yoiai, jawetianbira en jakonma akáma iki,
tsoabira en parankashamaa iki.
6 ¡Onanoxon atikeskabiakin Diossen ea tanabanon,
jatianra en jakonma akáma onanti iti iki!
7 Jawetianbira jakonma jawéki akí ea ikáma iki,
jawetianbira nokon keena keskábores akí ea ikáma iki.
Jatian ja ea yometsoa jawékibo eiba jaketian,
8 en yoá banaabo wetsabaon pibanon,
itan ja en banaabo keyokin mexabakanon.
9 Jatian wetsa ainbo teakasi ea iká iketian, iamax
ja epatax iká joni pikoketian, jawen awin teanoxon en koirana iketian,
10 ja nokon awin wetsabaon yonoti ibánon,
itan wetsabo já betan oxabanon.
11 Ja jawékibo en akára rabin iti iki;
jaskara aká kopira atinkobi ea masá tenemakanti iki.
12 Janra chiikan akai keskáakin,
jatíbi ea jayata nokon jawékibo ea keyonanti iki.
13 Nokon yonotibaon jato jawéki axonti ea yokáketianra,
jatíbitian jakonhakin en jato axona iki.
14 ¿Jaskáakin nokon yonotibo ramiaxki, jawekeskatax ea Dios bebon jakon iti iki?
¿En akábo yoiti ea jan yokataki,
en jawe yoiti iki?
15 Jan ea chixanainoabi jonia Diossenribira jato jonia iki,
ea jamaa keskáribiakinra jatoribi jamaa iki.
16 Jawebioma jonira jatíbitian en akinna iki,
benomatabora jawetianbi en pitin imaama iki.
17 Jawetianbira kachianabo pimayamakin enbicho piama iki.
18 Jatíbitianra jaton papa keskaxon
kachianabo en akinna iki;
benomatabora eki chipóketian,
jatíbitian en jato koirana iki.
19 Chopaoma ikax matsin mawataibo, itan
onitsapishoko ikax ja sawetiomabo oinxonra,
en jato akinna iki,
20 nokon carnerobaon rani
xopokanra en xanamaa iki,
jatianra ea irake akana iki.
21 Jawetianbira, joi benxonhai joni koshibo onanna ixon,
kachianabo jakonma akasi ea ikáma iki.
22 Jatian nato en yoiaibo ikonma iketian,
nokon ponyanbo ea sekenbakanon;
nokon baxkáinoax, poyan tsekébanon.
23 Diossen masá tenematinra ea raketa iki;
¡Jawen koshira en tenetima iká iki!
24 Jawetianbira oroki koshiax, itan jaki chipota ea ikáma iki.
25 Jawetianbira icha jawékia ikax,
iamax icha koriki biax, ea raroama iki.
26 Bari penetaira en oinna iki,
itan oxe kawankin, kikinhakin
tenaaribira en oinna iki,
27 ikaxbira jawetianbi en jabo joné rabiamaa iki,
jawetianbira ochóxonbi betsó akin, en meken sananxonama iki.
28 Jaskara en akára, atixonbi en masá teneti iká iki,
¡Jabo rabiara Diossa yamake ixon non akai iti iki!
29 Jawetianbira nokon rawí jakonmaaketian ea jan raroama iki,
já jakonmain pakéketianribira ea jan raroama iki.
30 Jawetianbira jakonma itiakin en shinanxonama iki,
jawetianbira já mawátinin ea keenamaa iki.
31 Ebé jaabaon wetsankoniax joá joni,
jakonmaakanaitianra en jato amayamaa iki,
32 jemanbira en oxamayamaa iki.
Jatíbitianra ochokeax joai jonibo,
nokon xobo xepóti en kepenxona iki.
33 Jawetianbira wetsabaon akai keskáakin,
nokon ochabo en joneama iki,
jawetianbira jakonmabo akáx,
34 jakonmaakin yoikanaketian joniboki rakékin en joneama iki.
Jawetianbira, omiskanaketian nokon rareboki raketi,
xobonko xepotax ea netetama iki.
35 ¡Ea ninkápainonra ikanai!
Ja en yoia ikon inon ixonra nokon jane en wishai;
rama, ¡Jatíbi Atipanatonin ea yoibanon!
jakonma akábo ea yoixonkin, kirikain wishabanon,
36 jara en jakonhaxonres boti iki, maiti akai keskáakin.
37 Jatíbi en akábora en Dios yoiti iki,
jakonshamanra já bebon ea kati iki.
38 Nokon maibora, eki jakonmaati, nai akí saí iamakanai,
ja mai taeshokobora jakonma teneibo winiamakanai.
39 Enra ikon yoiai, jaton yoabora ea yometsoama iki,
itan ja waín teetaibo jato kopíakashamaira ea ikáma iki.
40 Jatian jaskarabo en aká iketian, ¡Nokon maibaon trigo iamai moxa xoxobanon,
cebada iamai jakonma xobi xoxobanon! ikira iká iki.
Jaskáxonra Jobnin, já jaki koshia jawékibo jato yoikin senenhaa iki.