Pichika itin Jobnin yoia
19
[Elifaznin rabé itin joi yoia pekáora, Jobnin yoishokoa iki. Japekáora Bildadnin rabé itin iká joi yoiketian, Jobnin yoishokoa iki.]1 Jatianra Jobnin yoia iki:
2 ¿Jawetian kamanki,
ramiakin masá tenemakin,
itan join akin ea xateyonkin maton jeneai?
3 Ichaakinra jakonmanin yoinkin maton ea jeneyamai;
¿Ea jaskáaiki mato rabinyamai?
4 jakonma en akona iketianra,
eabiribi jan jakonma imati iki.
5 Ea xewina jakonmanra mato shinanmeetai,
ea rabintiona oinxon ea jan yointira maton shinannai.
6 Jaskara ixon kikinhakin onankanwe, Diossen masá tenetiain ea pakea riki,
jain pakéti jan ea axona masá tenetiain ea paketa riki.
7 Eara saí ikai: “¡Eara retekanai!” iki, jabira tsonbi ea ninkáyamai;
ea akinnon ixon en jato yokatabira,
tsonbi atikeskabiakin ea joi benxoaxonyamai.
8 Winónaketianra Diossen ea bai xeponaana iki;
jan ea kaai baira ea yaméaxona iki.
9 Icha nokon jakon jawékibora ea potamaa iki,
nokon maiti ea bichinai keskáakinra,
rabinhaxon ea jan namanbires imaa iki.
10 Kikinbires jawebiomara ea baneta iki;
¡Jaki manátioma ikaxa,
jiwi tapónyabi xatea keská ea baneta iki!
11 Ekira iorai sinata iki,
jawen rawí atinra ea aká iki.
12 Jatíbi jawen reteananai jonibora ea akí eki bekana iki;
nokon xobo katemaira tsamákana iki,
itan ea anóxa benxokakana iki.
13 Diossen imaara, nokon wetsabo itan ea jabé raenanaibo,
eibakeax ochókana iki,
jaskáaxonra wetsankoniax joá joni keskáakin,
ea akantiakin jato amaa iki.
14 Nokon rarebobaonra ea potabaina iki, itan ea jabé raenanaibora eon shinanbenokana iki;
15 nokon xobon ebé jaabo betan nokon yonotibora,
moa eon shinanbenokana ki;
wetsankonia joni keskáakinra ea oinkanai.
16 Westíora nokon yonoti en kenaara ea jen ayamai,
ea akinnon ixon kikinhakin en teaabira jawe iamai.
17 Nokon awin en pataxara ea omisai;
kikin nokon wetsabobira eki kerasai.
18 Bakebobira eki shiroai;
ea weníketianra,
eki jakonmai yoyo ikanai.
19 Kikin nokon ebé raenanaibaonra ea omisai;
bebonbires ea jaton ratetaibora eki bechiakekanke.
20 Nokon bichira nokon xaoki taxnake,
ea mawátira moa basima iki.
21 Ea noibakanwe, ebé raenanaibó,
Diossen jawen mekenman tii axon ea masá tenema riki.
22 ¿Jaweatiki Diossen akai keskáribiakin
maton ea jakonmakin jeneyamai?
¿Moa ea bebonbires ramiaxbiki, mato tantiamai? akin aká iki.