Jobninra Zofarnin yoia joi yoishokoa
14
[Elifaznin yoia pekáora Jobnin yoia iki. Jainxonra Bildadnin yoia iki, jatianra Jobnin yoia iki. Japekáora Zofarnin yoia iki, jatianra Jobnin yoia iki. Natora neskáakin yoikin keyoa iki.]1 Jobninra yoia iki: Ainbo meranoax pikota jonira,
jawen jati nete nenkema iki,
jainoax jawen masá tenetira kikin ani iki.
2 Westíora joa toetax basimashoko choshiai keská riki,
westíora ota winotai keskatira keyotai.
3 ¿Jaskara ikenbiki joni oinxon,
jaweati jawen jakonma ikabo min yoixonai?
4 Kerás meranoa kerásma jawéki
tsekati atipana jonira tsoabi yamake.
5 Jatio basires iti, itan jain senenres joni jati
min aká iketianra, ja wínoti atipanyamake,
6 ja joni moa oinyamawe,
jaskara iketian jenewe teayamawe
teexon kopí bii jakon jabanon.
7 Jiwi reraara jakiribi xoxoti japarike,
itan bená jiwira jawetianbi maxkáyamai,
8 jawen taponra tanoai, jawen yorara
mainmeax payotai.
9 Jene mechakan akára, ponyanbo xoxoai,
bená jiwi paxashamanra ikai.
10 Jaskara ikenbira, joni mawatai jan bechiteti rao yamake,
jatian joni mawataxki ¿Jawerano kaai?
11 Aniparo onpaxa koinnax boí keyóti atipanke,
parobora tsosinax manxanti atipanke;
12 ikaxbira nai japariketian,
joni mawatax jiriti yamake,
ja oxaara jishtentima iki.
13 ¡Min siná winotai kaman,
mawábo ikainko min ea joneara jakon iti iki,
jatio basi ea jain iti min shinanna,
senenketianra eaakin min shinanti iki!
14 Joni mawataki, ¿Jakiribi jati iki?
Masá tenetiainoax ea xabakaati nokotai kamanra,
jatio basi ea jaai kaman netetiibi ea manaresti iki.
15 Min ea jonia ikaxa,
mia ea oinkasti iki, min ea kenaara,
en mia jen ati iki.
16 Jatíbi en akaibora min koiranti iki,
ixonbira en ocha akábo min ea iboamatima iki;
17 en jakonma akábaonra mia shinanbenoti iki,
jaskáaxonra nokon ochabo min soati iki.
18 Mananbora reokoti keyotai,
makánbora tarametax boax wetsanko tipiai.
19 Jenenra makan keyoboai,
oi bexonra mai poto boai,
jaskáakinra joni jan manata min keyoai.
20 Jatíbitian jatoaresxon, jawen mainmea min potaara moa yamai,
itan já jisáma mechobires ikai.
21 Jawen bakebo jakonhain nokotax kikinkanara onanyamai;
jaskáribiakinra moa rabintiain pakékanabo jan onanyamai;
22 mawákin jawen yorabi chexakaakinresa onannai,
janbi masá tenekinra onannai, akinra aká iki.