2 Jatianra Josadacnin bake, Josué, itan jabé iká ikon sacerdotebo, ja Salatielnin bake, Zorobabel, itan jawen rarebobo, jabora jainxon yoinabo jatiobi keyokin menoti Israelnin Dios axoni teekana iki, Diossen joni Moiséssen esekan yoiai senenhakin axoni.

3 Jainxon yoina menoti makan tsamankanara iká iki ja ikátiainkoribi akana, ja mainmea joniboki rakéananbira akátikanai, yamékiritiibi itan yantántii, Ibo axonkin jain axon yoinabo jatiobi keyokin menokin.

4 Ja esé wishakan yoiai senenhakinra Peotabaon fiestaribi akana iki, jaskati axea ixonra, Dios axonkin netetiibi yoinabo jatiobi keyokin menokana iki, jatí icha ati yoiatiibo.

5 Ja netetiibi akai keskáribiakin itan oxe bená iketian akai keskáribiakinra, Ibobiribi axonkin fiesta ati iketian yoinabo jatiobi keyokin menoxonkana iki, itan jaton shinanmanbi Ibo jawéki menikanaboribi menokana iki.

6 Ja kanchis oxe itin reken nete iketian peoxonra, Ibo menikin yoinabo jatiobi keyokin menoxonkana iki, ja Ibon xoboakin peokanamapari ikenbira akana iki.

7 Japekáora ja makan xoboaibo, itan jiwi xoboaibo jato koriki menikana iki, jatian ja konxán Líbanoainoa Jope kaman boti kopira, Tiro betan Sidón jonibo piti, xeati, xeni jabo jato menikana iki, Ciro, Persia apo ixon jain senenres boti jato yoia iketian.

8 Ja Salatielnin bake, Zorobabel itan Josadacnin bake Josué, jainoax wetsa ikon sacerdotebo, itan Levitabo, itan jato yatanxon bokana jakiribi Jerusalénhain joabo, jatíbi jabaonra Diossen xobo jakiribi akin peokana iki, ja Jerusalénhain moa jakiribi bekana rabé baritia itin rabé oxeya iketian. Ja rabé chonka bebon baritiaya levitabora, ja tee akanaibo ointi jato imakana iki.

9 Josué, jawen bakebo, itan jawen wetsabo, jainoax Cadmiel, itan jawen bakebo, jabaonra Judakan chiní bakebobires ixon, ja Henadadnin chiní bakebo, itan jawen bakebo, jainoax jawen wetsa levitabo betan, westíora tsamábicho akana iki, ja Dios xoboaxoni teetaibo jaskaaxon jato ointi kopí.

10 Ja Ibo xoboaxoni teetaibaon jan peoti makan rakankanaitianra, sacerdotebo jain charókana iká iki, jaton chopa sawéyabo, itan trompetayabo. Ja Asafnin chiní bakebo levitabaonra jan Ibo rabiti platillobo bokana iká iki, Israel apo ixon, Davidkan jaskara akanti yoia iketian.

11 Jatíribibo Ibo rabii bewaitianra, wetsabaon ikinna iki: “Ibo irake akanwe, jara jakon iki, janra Israelbo jatíbitianbires noike”, akinbo. Jatíbi jonibora raroi saí ikana iki Ibo rabii, jakiribi Ibo xoboaxonkin tee peokanketian.

12 Ikaxbi icha sacerdotebo, Levitabo, jainoax ja rarebotiibi iká jaton koshibo, jabora moa yosibo ikana iki, jaskara ixonra japari akana Diossen xobo oinkana iká iki, jaskatira jakiribi ja Diossen xobo benaakin akin peokana oinnax winii saa ikana iki. Jaskakanaitianra icharibi jatíribibo raroi saí ikana iki.

13 Ja raroi saí ikaibo betan ja onisi winikanaira, tsonbi onantikoma iká iki, kikin ochóxonbi ninkatira saa ikana iki.