Ja senenhabekonti joi jain iká ani bonanti Ibo rabiti xobonko bokana
(2 Crónicas 5.2-14)
8
Jaskáaxonra, Salomónman Jerusalénhain jato tsinkia iki, Israel joni koshibo, jatíbi ja tsamátiibi iká jonibaon joni koshibo, itan ja israelitabaon rarebobaon joni koshibo, jatíbi jabora já bebon jato tsinkia iki, ja senenhabekonti joi Ibon aká jain iká ani bonanti Jerusalénhainoa, Davidkan jemanko taxkekin bonoxon.2 Ja onantishamanhakin fiesta ati nete, Etanim oxe iketian, baritia jawen kanchis oxe itinra, jatíbi israelitabo apo Salomón betan tsinkita iki.
3 Moa nokóxonra joni koshibo betan, ja ikon sacerdotebaon, ja Diossen senenhabekonti joi jain iká ani bonanti bia iki,
4 jainxonra Dios betan nokoananti carpa xobo betanbi jainoa bokana iki, jain iká jatíbi iresama jawékibo, jan jawékiatiboribira ikon sacerdotebo betan Levitabaon boa iki.
5 Ja apo Salomón betan jatíbi israelitabo tsinkitabaonra, Diossen senenhabekonti joi jain iká ani bonanti bebonxon, carnerobo betan waka benebo topontimatibires menokana iki.
6 Japekáora, ja senenhabekonti joi jain iká Ibon ani bonanti, sacerdotebaon boá iki, boxonra ani xobo chichó jain Dios iká Chitéain, ja ángel querubínbaon pechibo iká namanbi akana iki,
7 jabaon pechi peatatonra ja senenhabekonti joi jain iká ani bonanti, itan jan keona jiwibo mapoa iki.
8 Ikaxbi ja jiwibo nenkeira iketianra, jain Dios iká Chité bekeiba iká, jainxon Dios rabiti Chitéainxonbi oinna, ja jiwi repikotabo jishtibires iká iki, ikaxbi jemaorixon oinnara jishtima iká iki; jatianra ramakamanbi jaskara baneta iki. Ja ramakamanbi iki ikára nato kirika wishanontian yoii iká iki.
9 Ja jain esé iká ani bonantiainra, Horeb mananhainxon Moiséssen jain naneni rabé makan tablares iká iki, ja israelitabo Egiptonkoniax pikónontian Ibon ja senenhabekonti joi aká wisháa tablabo.
10 Jainxon Dios rabiti Chitéainoax ikon sacerdotebo pikóketianra, Ibo rabiti xobo meran koin bochoa iki,
11 koin bochoketianra, ikon sacerdotebo jainxon rabii banéti atipanyamakana iki, Ibonra jawen penekan jawen xobo bochoa iki.
Já rabiti xobo Salomónman Dios iboamaa
(2 Crónicas 6.1-7, 10)
12 Jatianra Salomónman yoia iki:
“Ibó, minra yoia iki,
mia yamé meran jaa.
13 Ikaxbira mia jain jati en jato xobo amake,
jainra jatíbitian mia jati iki”, akin.
14 Jatianra jatíbi israelita jonibo bebon, apo kaa iki, jain charókanketianra, jato jakonhakin shinanxonkin,
15 neskáa iki: “Israel jonibaon Ibo Dios jakon ibanon, ja nokon papa David axonti yoinira moa senenhake, neskáakinra yoia iki:
16 ‘Egiptonkonia nokon joni Israelbo en pikoni netenbira, jawerato jemabi, jatíbi Israel jonibo xaranmea, jainxon ea rabiti xoboati en katotama iki. Ikaxbira nokon joni Israelbo apo ixon ikinti David en katota iki’ akin.
17 Jaskatira ja nokon papa David, Israelbaon Ibo Dios rabiti xoboaxontin keena iki.
18 Ibonra yoia iki: ‘Jaskara ikenra min xoboakasai jakon iki;
19 ikaxbi jan atira miama iki, ja min bakeatoninra ati iki. Janra ea xobo axonti iki’, akin.
20 Jaskara ixonra, ja ati yoini Ibon moa senenhake. Ja yoini keskatira nokon papa Davidkan toan, Israelbaon ani yakatinin ea yakáke, jainxonra Israelbaon Ibo Dios en jato xoboamaxonke.
21 Jainxonribira, Egiptonkonia non rekenbo jato pikonontian, Ibon jato betan ja senenhabekonti joi aká jain iká ani bonanti, jain ati chité xobo meran en jato amaa iki”, akin.
22 Jaskata pekaora jainxon yoina Ibo menoxonti bebon chirankoota iki, jatíbi israelita jonibo bebon, jainoaxa jawen meken naiori sanantaanan,
23 koshín neskata iki: “Ibó, Israelbaon Diossé, mia keska Diossa naikanbi itan mainbi yamake, ja senenhabekonti joi jato betan akára min senenhai, itan akonkin shinanxon mia yoiti ixonaibora, min jato kikinhakin jakonhai;
24 ja nokon papa David, min yonoti, axonti min yoinira, min senenhake, ja min akátoninra min yoini joi rama nete min senenhake.
25 Jaskara iken, Israelbaon Ibo Diossé, nokon papa David, min yonoti yoiniribi senenhawe, jawen chiní bakebo maxkátima, min akinnaton, Israelnin ani yakátinin yakákanti, jawen bakebo jakon jaketian, itan mii bebonmeax já iní keskati ikanaitian.
26 Jaskara iken, Israelbaon Diossé, ja nokon papa, min yonoti David, axonti min yoini senenhawe.
27 Ikaxbi ¿Ikonmein iti iki, Dios nato main jati? Ja nai kikin ani ikenbira, mia jain iti senenma iki, ¡Jaskara ikaxa nato en mia jato xoboamaxona mia jain iti senenmabobi iki!
28 Jaskara ikenbi, nokon Ibo Diossé, akinnon ixon teakin en mia yokatai ninkáwe; nato min yonoti mia yokákin rama orani koshin saí ikai ninkáwe.
29 Netén itan yamé inonbi nato xobo oinkin jeneyamawe, jainra ea iti iki ixonra min yoia iki. Nato min yonotinin mia yokákin oranai ninkáwe.
30 En mia yokataibo ninkáwe, itan min joni Israelbaon nato min xobonko nokotiakin oranaitian ninkáwe. Naikanxonbi non akai ninkáwe, jain mia jaainxonbi ninkáwe, itan non jakonmabo noa shinanxonyamawe.
31 Tson inonbi jawen kaibo ramiaketian, nato xobonko iká mia jainxon yoina menoxonti bebonxon ikonrin ixon teaxon keshamakanaitian,
32 naikanxonbi min ninkáwe, itan awé; min yonotibo atikeskabiakin jato joi benxoaxonwe. Jan jakonma aká ramiawe, jawen jakonma akábo kopí masá tenemawe, jatian jakonma akáma joni, jaskarabo atin atikeskabiakin joi benxoaxonwe.
33 Min joni Israelbo miki ochaketian jaton rawibaon jatoaresa, jakiribi miki banéxon mia rabikanaitian, itan nato Dios rabiti xobooriakin oinxon orankin mia yokákanaitian,
34 naikanxonbi jato ninkáwe, ja ochakana ikenbi jato shinanxonyamawe, jaskáaxon non rekenbo min menini mainko jato banémawe.
35 Ja min jonibo miki ochaketian, oi beyamai yoabo choshiketian, nato nenonxon orankanketian itan min jane rabikanketian, itan jaton ocha kopí min jato masá tenemaa moa jaton shinan wetsaakanketian,
36 naikanxonbi min jato ninkáwe, min yonoti, min joni Israelbo jaton ocha kopi jato shinanxonyamawe, jaskáaxon jakon iti jato axeawe. Ja jatíbitian iboati mai min jonibo min jato menini mainko oi bemawe.
37 Nato main jawékiatinin iti iketian, jato abotanai isin jaketian, xanan aká banábo choshiaitian, kikin jakonma xoyabo jaketian, chanpobo iamax ikibo jaketian; non jemabo rawíbaon katexon noa akaitian, wetsa rabintibo inonbi noki nokóketian, iamax wetsa kikin jakonma jawéki inonbi noki nokóketian,
38 israelita jonibo wetsabires inonbi, iamax jatíbi min joni Israelbaon, mia yokákin orankanatian ninkáwe, jato rabintibo winotai oinxon itan chexakakin jaton meken sananxon nato xoboori bechixon orankanaitian ninkáwe.
39 Naikanxonbi, ja min jatinkoxonbi jato ninkáwe, jaton jakonmabo shinanxonyamawe; westíorabo jaton aká keskábo jato awé, jaskara ikenra ja akáskanaibo itan jaskara jonin shinanaibo minbichores onanke.
40 Jatianra non rekenbo min menini main jaai kaman mia rabikanti iki.
41 Wetsankonia joni inonbi, min jonima ikaxbi, mia Dios iketian onanna kopíres ochó mainmeax joxon,
42 nato ani xoboori bechixon oranketian (min jane ani ninkakatai itan koshibo min jato oinmaa ninkakatai yoikanaitian),
43 jain mia jaa naikanxonbi ninkáwe, jaskáaxon jatíbi mia yokákana jato meniwe, jatíbi maibotiibi ikábaon mia onankanon ixon, min joni Israelbaon akai keskáakin mia rabikanon ixon, jainxon nato xobo en jato amainxonra mia onankanon ixon min jane rabikanai.
44 Min sontárobo jaton rawibo betan reteanani bokanaitian, jawerano inonbi min jato raana bokin ja min katota jemaori bechixon, itan ja xobo en mia jato amaxonaori bechixon orankanaitian,
45 mia yokákin orankanai naikanxonbi ninkáwe, jaskáaxon jatoreskanon ixon jato akinwe.
46 Tsoabira ochayamai yamake, jaskara ikenra israelitabo miki ochakanketian, jatoki kikinni sináxon, jaton rawikan yanka yonoti ikanon ixon min meniketian, ochó iamax ochóma jaton main jato bokana,
47 yatanxon jain jato bokana mainxonbi mia rabikanaitian, itan min akinnon ixon mia yokákanaitian, jainoax ochaxonra non jakonma ake ikax shinanmeetax keshakanketian,
48 jaton yanka yonoti iti jaton rawikan mainko jato bokanainkoxonbi, jatíbi jaton shinanyaxonbi itan jatíbi jaton kayayaxonbi, jakiribi mia rabiti shinanxon, jaton rekenbo min jato menini maiori bechixon itan min katota jemaori bechixon jainoax en mia jato amaxona xoboori bechixon mia orankanketian,
49 jan miki oranaibo itan akinnon ixon mia yokákanabo jain mia jaa naikanxonbi ninkáwe, jaskáaxon jato akinwe.
50 Min jonibo miki ochaabo jato shinanxonyamawe itan jatíbi ja miki yoitimaboribi jato shinanxonyamawe. Jato boabaon noibaxon jakonhakanon ixon jato akinwe.
51 Min jonibora minabo iki; yami charaati hornon tiritai keskáinoara Egiptonkonia min jato pikoa iki.
52 Ea min yonotinin oranaitian kikinhakin ninkáwe, min joni Israelbaon mia yokata ninkáwe. ¡Diossé, mia non saí aka noa ninkáwe!
53 Ibó, minra jatíbi nato maibotiibi iká jonibo xaranmea minabiribi iti bixon nonbiribi iti min noa aká iki, non rekenbo Egiptonkonia min jato pikonontianra ja min yonoti Moisés meranxon min jaskara yoia iki”, iki.
54 Jatian ja yoina menoti bebon chirankooxon, Ibon akinnon ixon yokákin meken sananxon orankin senenhax,
55 wenitax nixonra, jatíbi israelita jonibo, jakonhakin shinanxoni koshinshaman neskata iki:
56 “¡Ibo jakon ibanon, jawen joni Isrealbo moa jakon jamaa kopí, jaskáati yoia ixonra jatíbi ake! Jawen yonoti Moisés meranxon ja axontibo jakonhakin yoia ixonra, jawebi senenhayama yamake.
57 Jaskara iketian rama, non Ibo Dios non rekenbo akinni jato betan iní keskaribii nobé ibanon. Nobé iamakinra noa potabaintima iki,
58 jaskáribiakinra en yokatai, yoiti iti noa jan kenmanon ixon, jatíbi jawen shinanbo non senenhanon ixon, koshi joibo, ani esébo, ja senenhati esébo, ja non rekenbo senenhati yoinibo.
59 Nato jawékibo en non Ibo Dios yokata, yamé itan neten jatíbitian shinanbanon, ea jawen yonoti betan jawen joni Israelbo ja maxkatainbo atikeskabiakin noa akinoxon,
60 jatian jatíbi maibotiibi iká jonibaon anon onankin nato mainmea Ibora Dios iki ixon, jainxon wetsara yamake iki ixon.
61 Jaskara iken non Ibo Dios betan ikon ikanwe, jainxon jawen esébo, itan ja ati yoia joibo akí yoiti ikanwe, rama nete maton akai keskáakin jatíbitian senenhakanwe”, iki.
62 Nato jaskarabo iká pekáora, apon itan jatíbi Israel jonibaon Ibo yoina menoxonkana iki.
63 Jatianra Salomónman, Ibo, rabé chonka rabé waranka waka bene itan pacha rabé chonka waranka carnerobo, jabé raeananti kopí menia iki. Jaskáxonra apon itan jatíbi israelitabaon, Ibo Dios xobo iboamakana iki.
64 Ja neteribira Ibon xobo bebon iká chichokea jemaribi iboamaa iki, jainxonra yoinabo keyokin menoxonkana iki, meskó bimi berobo itan ja raeanankin yoinabo menoa xenira menoxonkana iki, yoina menoti bronce akana jainxon ati senenma iketianra jemanxon akana iki.
65 Jaskara inontianra, Salomón itan jatíbi Israel jonibo, jainoax kikin icha joni Hamat jikitiainoax Egipto wean ikainoax beabaonra, Ibo Dios axonkin Peotabaon fiesta aká iki, jainxon wetsa fiestaribi akanara kanchis nete iká iki; jatian jatíbi fiesta akanara chonka chosko nete iká iki.
66 Ja iibata wetsa netenra, Salomónman ja jonibo moa jato raana iki, jatianra jabo apo jakonhakin shinanxonbaini, jawen yonoti David itan jawen jonibo Ibon, jatíbi jato jakonha iketian, raroshaman itan jakon shinanbaini jaton xobonko bokana iki.