1 Wetsa netera filisteobaon, Israelbo betan reteanannoxon jaton sontárobo tsinkia iki, jatianra apo Aquísnin David yoia iki: —Minra moa kikinhakin onanke, mia itan min jonibora ebé reteanantiain kati iki —akin.

2 Jaskáketianra Davidkan yoia iki: —Kikin jakon riki. Ramara min onannai, nato min yonotininki atipana ixon —akin. Jatianra Aquísnin David yoia iki: —Ea retekanaketian jatíbitian eabiribi koiranai iti sontárora en mia imai —akin.

3 Samuel mawánontianra, jatíbi Israelainoabo winikana iki, itan japekáora ja pikoniain jawen jemanbiribi Ramáin miinkana iki. Jatianra Saúlnin shinanmanres onanmisbo, itan ja mawábaon akinnon ixon yokataibo, ja mainmea jato potaa iká iki.

4 Jatianra filisteo sontárobo tsinkibaini boxon, Sunemhain jain iti carpabo peotaakana iki, jatianra Saúlninbiribi jatíbi Israelbo tsinkixon, Gilboa mananman jato ikinna iki.

5 Ikaxbi filisteobaon carpa peotabo oinnaxa Saúl raketa iki, jatianra moa raké shinanman jaaresa iki.

6 Jaskara ikenra onannoxon Ibo yokákin tanaa iki, ikaxbira Ibon jawebi yoiamaa iki, namá meranbi, Urim makamanbi, profetabaonbi, jawebi yoiamaa iki.

7 Jakopíra jawen sontárobaon koshibo yoia iki: —Benakanwe westíora ainbo, ja mawánibaon akinnon ixon yokataibo, jaiba kaxon en onanoxon yokánon —akin. Jatianra jawen sontárobaon yoia iki: —Endorhainra westíora ainbo jake, ja mawánibaon akinnon ixon yokatai —akin.

8 Jatianra Saúlnin onankanaketian, wetsa chopa sawea iki, jaskáax yamébi ja ainbo oinni kaitianra; rabé jonin chibana iki. Jawen xobon nokoxonra Saúlnin ja ainbo yoia iki: —En mia yokatai riki, mawataton kaya min ea kenaxontin en ja ati ea yoinon ixon, enra mia yoiti iki ja jonin kaya min ea kenaxonti —akin.

9 Jatianra ainbaon yoia iki: —Minra onanke, ja Saúlnin aká jawéki, ja shinanmanres onanmisbo betan ja mawánibaon akinnon ixon yokataibo ja mainmea jato potaa. ¿Jaweatiki en mia akinketian, ea retekanon ixon ea min jaskaai? —akin.

10 Ikaxbi Saúlninra Ibon janenko yoia iki: —Akonkin shinanxonra Ibon janenko en mia yoiai, nato kopira jawe jakonmabi mia winótima iki —akin.

11 Jatianra ainbaon yoia iki: —¿En tsoa joti kenaxontinki mia keenai? —akin. Jatianra Saúlnin yoia iki: —Ea Samuel kenaxonwe —akin. Jatianra ja ainbaon kenaa iki.

12 Ja shinanamainbi Samuel oinnaxa, ainbo westíorai koshin saí ika iki; japekáora Saúl yoia iki: —¿Jaweatiki ea min parana? ¡Miara Saúl iki! —akin.

13 Ikaxbira Saúlnin yoia iki: —Rakéyamawe ¿Jaweki min oinna? —akin. Jatianra ainbaon yoia iki: —Westíora dios mainmeax keyataira en oinke —akin.

14 Jatianra Saúlnin yokata iki: —¿Jawekeska jisárin? —akin. Jatian ainbaon neskaa iki: —Westíora joni yosi perakooti saweyara ike —akin. Jatianbira Saúlnin, Samuel riki ixon onanna iki, jaskatira mainbi bekepinon kaman beota iki.

15 Jatianra Samuelnin yoia iki: —¿Jaweati ea teareskin, min ea jomaarin? —akin. Jatianra Saúlnin yoia iki: —Ea riki, kikinbiresi onitsaa filisteobo nobé reteanani bekanaitian, itan ea moa Diossen jenea kopí. Profeta meranxonbira ea yoiamai itan namá meranbi. Ja kopí riki en mia kenaa, ja en atibo min ea yoinon ixon —akin.

16 Jatianra Samuelnin yoia iki: —¿Jaweatiki ea min yokatai, moa Ibon jenea jawen rawí banéxonbi?

17 Ja en moa mia yoikatitaira, moa Ibon mibé aká iki. Ja mia apo pikotaananra, ja mibé iká David apo imaa iki,

18 ja amalecitabo keyoti Ibon yoiabi mia yoitimaa iketian, itan min senenhayamaa iketian.

19 Jaskáribaxonbira Ibon, israelita sontárobo itan mia filisteoboki menikaamati iki, jaskáara filisteobaon reteanankin jatoareskanti iki, jainoax bakisha mia itan min bakebo mawatax moa ebé iti iki. Jainxonribira Ibon amaa filisteobaon israelitabaon peotabo biti iki —akinra aka iki.

20 Jatianbira Saúl ishtonbires paketax nenkekaini rakata iki. Samuelnin joi ninkáxon, itan westíora nete itan westíora yaméribi jawebi piama ixonbobira maxkaa iki.

21 Ja ainbaonra Saúl, jawen shinan tsokas iketian oinxon pataxon yoia iki: —Ninkáwe. Ea min yonoti ainbaonra, ja min yokata jawéki moa mia axonke. Nokon jati nete onsá meebainxonra, min yoiabo en mia axonke.

22 Jaskara iketian, rama en mia yokatai riki, ea min ninkáxonti: Ichama pitira en mia pimakasai, jakiribi mia koshinon ixon, itan jakiribi baneti min peotain mia katánon ixon —akin.

23 Jabira Saúl pikáshama iki, ikaxbira jawen sontárobaon koshibo betan ja ainbaon teaboxon, ja senenainbi moa jeen imakana iki. Jatianbi wenitaxa oxatiain yakata iki.

24 Jaskatai kamanra ja ainbaon jawen xobomea, westíora waka bene xoashaman retea iki, axonra harina meinxon, levaduraomabi bata pan aká iki.

25 Japekáora, pikánon ixon Saúl betan jawen sontárobaon koshibo jato boxona iki, jabora moa pikín senenhaa pekáo, itan moa jato kaai abaini ja yamébi jaton peotain bokana iki.