Amorreobo jatoareskana
10
Adonisedec Jerusalénhainoa apora, Josuénin jatoarestaanan Hai jema iboaxon jainoa jonibo jato keyoa ninkatax, ikonbiresi raketa iki, jara jaskáa iki ja moatian jaton apoyabi Jericó jema aní keskaribiakin, ikaxbi gabaonitabora moa israelitabo betan jakonhakin joi benxoataanan, moa jato betan jakana iká iki,2 jaskáketian ninkataxa ikonbiresi jatoki rakékana iki, ja Gabaón jema kikin itan koshi shinanya jonibo ikax, Hai jema winoa ani itan ikon onanbo ikanaitian.
3 Jaskara iketianra, Adonisedecnin, apoboki neskara joi raana iki, Hebrónhainoa apo Hohanki, Jarmuthainoa apo Piramki, Laquissainoa apo Jafíaki, jainoax Eglónhainoa apo Debirki:
4 “Neno bexonpari ea akini bekanon, Gabaón betan ea reteananaitian, jabaonra Josué itan israelitabo betan jaskara ati joi moa senenhakana iki”, iki iká.
5 Jaskara ikaxa ja pichika amorreo apobo, jabo iki ja Jerusalénhainoa apobo, ja iki Hebrónhainoa, Jarmuthainoa, Laquissainoa jainoax Eglónhainoa, jabora jainbicho tsinkitax jawen sontároboya, moa reteananox Gabaón bebon bokana iki.
6 Jatian ja Gabaónhain jabaonra, jatonribi neskara joi Josuéki raankana iki, jatian já iká iki Gilgalhain jaton carpa peotabo ikainko: “Mia akinnaibo noa iketian, matora en akinyamai iki iamawe. Ishton joxon noa akinhanan jato kopíkiniwe, jatíbi ja mananman iká amorreo apobora, nobé reteananox moa tsinkíkana iki” iki iká.
7 Jatianra Josué jatíbi jawen kikin koshi shinanya sontároboya, Gilgalhainoax pikota iki,
8 jainxonra Ibon yoia iki: “Jawekeskataxbi rakéyamakanwe, jabaonra mato jaweati atipanyamake, en matoki menikaamara maton jabo jatoaresti iki”, akin.
9 Josuékanra Gilgalhainoax pikotax yamé kakashini kaxon, amorreobo betan reteanankin jato ratereskin peoa iki.
10 Ibonbira akonbireskin israelitabo bebon jabo ratémaa iki, jaskákanketianra Josuénin Gabaónhainxon ichabires jato retea iki. Japekáora, Bet-horón bainmea jato chibana iki, Azecá betan Maceda jemanko kamanra amorreobo jato reteboa iki.
11 Ja israelitabaon jabámaa, amorreobo Bet-horón mai naxankenin bokanaitianra, Ibon anibires oi xewa jatoki bemaa iki, janra Israelbaon jato retea winobainbires amorreobo jato keyoa iki.
12 Moa Ibon amorreobo israelitaboki menikaamaketianra, Josuénin jato bebonxon Ibo yoyo akin neskáa iki: “Gabaónhain bari tsasimawe; Ajalón teshanpain oxe tsasimawe akin”, akin.
13 Jatian, jonibaon jaton rawíbo kopitai kamanra bari betan oxe tsasia iki. Atikeskabiakin ikon yoiai kirikaninra jaskara yoiai. Westíora netetanishamanra, bari jikiamaa iki, itan nai naponbekonshamanra bari tsasia iki.
14 Moatian itan ja winota pekáobira wetsa netebi jaskáyosma iki, jaskara inontianra westíora jonin joi Ibo ninkáxona iki, jaskataxa Ibo Israelbaon paranan iki reteanana iki.
15 Japekáora Josué itan israelitabo, jaton carpa peotainko Gilgalhain moa baneti bokana iki.