Profeta joti yoii iká
18
14 Ja jato bichinax mato jain jaai kaai mainkonia jonibaonra, ja rama jaskara iti yoiaibo, itan shinanmanres jaskara iti onanxon yoiaibo ikonhakanai, ikaxbi matora maton Ibo Diossen jaskara jawéki amayamai.15 Maton Ibo Diossenra, mato xarameabi westiora profeta ea keskaribi imati jake, jara maton joi ninkáxonti iki.
16 Horeb mananmaxon ja Ibo Dios maton yokáni kopí nato jawéki ikára ikon iki, jain jatíbi mato tsinkita netenra maton yoia iki: ‘Non Ibo Diossen joira non jakiribi ninkakashamai, nato ani tiritairibira mawánaketian non oinkashamai’, akin.
17 Jatianra Ibon ea yoia iki: ‘Ja yoikanara jakon iki.
18 Enra mia keskaribi iti westiora profeta jato xaranmea imai, ja jonira jaton kaibo iti iki, janra jaskara yoiti en yoiabo jato yoiti iki, jaskara akannon ixon en yoiketianra, jashamanribi jan jato yoiti iki.
19 Ja Profetanin nokon janenko rama iti yoiaibi, jawen joi ninkáxonyamaibora, enbi jato masá tenemati iki.
20 Ikaxbi jaskara yoiti en yoiamabi, jawen shinanmanbi rama iti nokon janenko yoiai Profeta, jainoax jawebi jaskara jato yoiwe akin en akamabi yoiai, iamax wetsa diosbaon janenko yoiaibora, moa retekanti iki’.
21 Jatian atiki maton shinankin: ‘¿Ja yoiara Ibon joima iki ixonki jawekeskáaxon non onanti iki?’ ixon. Neskáaxonra maton onanti iki:
22 Ja profetanin Ibon janenko yoiabi ja yoia keská senenyamaketianra, Ibon yoiama moa onanti iti iki, ja profetara jawen rabí shinanman imaa yoyo iresa iti iki; jaskara iketian jaki rakéyamakanwe.