2 Ja esébo jawekeskáaxonbi tekiamakanwe, jainxonribi ja eseainoa jawebi tsekayamakanwe; ja ati en mato yoia Ibo Diossen esébo senenhakanwe.

3 Ja Baal-peorhainxon Ibon akára maton oinna iki, jainoa dios rabiaibora mato xaranmea, tsoabi texetimaakin jato keyoa iki;

4 ikaxbi jatíbi matobo, ja maton Ibo Diossen yoiabo jeneyamakin akonkin senenhabora, mato jiriapari ikanai.

5 Ja nokon Ibo Diossen ati yoiara, esébo itan ja senenhati joibo en mato onanmaa iki, ja iboakin maton mai biainko ixon, jaskara ati yoia esébo maton senenhanon ixon.

6 Ja esébo senenhakanwe, maton jaskáaitianra icha jemanxon, jonibaon onankanti iki mato onan shinanya, itan mato jaskáaxon jawéki ati onan shinanya jonibo, jatian ja esébo maton senenhaitianra wetsakeska shinanyamai: ‘¡Nato mainmea jonibora onan, itan jaskáaxon jawéki ati onan shinanyabo ikanai!’ iki ikantiki mato yoii.

7 Jaskara iketian, ¿Jawerato ani mainmea diosborin, jato betanbi ixon jato akinnaibo, nobébi iketian non yokatatiibi jan noa akinnai non Ibo Dios keska?

8 ¿Jawerato ani mainmea joniboki, rama nato en mato yoiai keská esébo, itan jaskaaxon atibi keskáakin ati ja senenhati joiboya iki?

9 Jaskara iketian, ja maton oinna jawékibo shinanbenonaketian kikinni koiramekanwe; jaskáyamakinkaya, maton bakeboyabi maton bababo onantishamanhakin jato yoikanwe.

10 Ja maton Ibo Dios bebon Horeb mananman mato inontianra, Ibon ea yoia iki: ‘Jonibo tsinkiwe, nokon joi ninkákanon ixon, jaskáaxon jaai kaman netetiibi ea kikin shinanti onankanon ixon, itan jaton akai keskáribi akanon ixon, jaton bakebo axeakanti kopí’, akin.

11 Jatian matora iká iki, ja mananmameax kikin keyá chii tiritax wiso koin kextó bochiki keyataitian, naman ja manan ochóma;

12 ja chii meranxonra Ibon mato yoyo aka iki. Jawen joira maton ninkata iki, jatianra ja yoyo ikai ninkákinbi, jawe otabi maton oinyamaa iki.

13 Ibonra ja senenhabekonti joi jato onanmaa iki, ja chonka esé, ja iká iki rabé makan tablanin wishaa, jainxonra ja esébo senenhati mato yoia iki.

14 Ja maton iboakin biti mainko ixon, maton senenhati esébo, itan maton ja senenhati joibo mato onanmatira ea yoia iki.

15 Ja Horeb mananmameax mato betan Ibo yoyo inontianra, jawekeska jawen jisábi maton oinyamaa iki. Jaskara iketian kikinni koiramekanwe,

16 jakon íikinbira jan jakonmain paketi maton anake, jawékibo joni jisáakin, ainbo jisáakin,

17 yoinabo jisá, noyai yoinabo jisá,

18 noréx ikai yoinabo jisá, iamaax yapabo jisábo ayamakanwe.

19 Jainoaxa naikanmea bari, oxe, wishtinbo oinxon rabiax mato jakonmain pakénake, jatíbi nato netemea jonibo axonkinra, Ibo Diossen wishtinbo jonia iki.

20 Jan yami charáati horno keská meran masá tenei mato Egiptonko iketianra, Ibon jainoa tsekaxon bia, rama mato jawen jonibo iki.

21 Ikaxbi maton jakonma aká kopira Ibo eki sináke, ja Dios ixon yoiara en Jordán paro shitatima iki, jan mato menia iboakin maton jakon mai bitinkoribi jikitimara ea yoike.

22 Jaskara iketianra, nato mainmeax mawáti ixon, Jordán paro en shitayamai, matonresa shitanoxiki, jatianra ja jakon mai maton iboakin binoxiki.

23 Ikaxbi koiramekanwe, ja maton Ibo Diossen mato betan aká ja senenhabekonti joinra mato shinanbenonake. Maton Ibo Diossen atima yoia iketian, jawekeskaxonbi ja rabiti jawéki matonbi ayamakanwe,

24 maton Ibo Diossa washimis Dios iki, ¡Jara jatíbi keyokin menoai chii iki!

25 Bakebo betan bababoya ikax ja mainmeax moa yosia ixonbi, maton Ibo Dios bebonxon yoitimataanan ja rabitibo akin, wetsa jawékibires inonbi jisáboakin akáx ochaxon, maton Ibo Dios sinámaketianra,

26 nai betan maikan onanke, ja Jordán keibakea mai biax mato jain ikí kaainko, mato basima keyóti iki. Ja main basi jayamaira, mato jatikaxbi keyóti.

27 Ibonra jatíbi mainko mato janbisanoxiki, jatianra ichamashoko mato inoxiki.

28 Jainxonra, jonibaon aká diosbo maton rabinoxiki, ja rabiti jiwi akanabo, makan akanabo, jabaonra oinyamai, ninkáyamai, piamai, itan joinyamai.

29 Ikaxbi jain ixon, jatíbi maton shinanyaxonbi, itan jatíbi maton kayayaxonbi maton Ibo Dios benakinra, maton nokoti iki.

30 Jaskara masá meeti onitsapiti meran nokotax, Iboki banetax mato yoitiketianra,

31 já noibamis ixon, mato potatima iki, itan mato keyotima iki, maton rekenbo betan aká ja senenhabekonti joinra shinanbenotima iki, akonkin senenhati yoia ikáx.

32 Benakanwe maton onannon, ja mato yamaatian ikábo, ja Diossen nato neten joni anontian ikábo; jatíbiain nato main kaxon jato yokákanwe, ja ramatian winota keskáki moabo iká iki ixon, iamax ja rama iká keska wetsa ani jawéki winotaki onankana ixon, onanoxon.

33 ¿Jakia wetsa mainmea jonibo, maton aká keskáakin chii meranoax Dios yoyo ikai ninkataxbi mawáyamaabo?

34 Jawerato diossenbira akáma iki, wetsa maibo xaranmea westíora mainmea jonibo jawenabo iti jato katókin, ichabires ikon jawékibo, ja oinxon onanti jawékibo, jaskara iosma jawékibo itan jato reteananmaxon, jawen ani atipana koshi jishtiakin pikotaanan, jaki rakétibires jawekibo imakin, ja Egiptonkoxon maton oinnabi, itan mato kopi jaskarabo maton Diossen aní keska.

35 Ja jaskara ikábo mato oinmaara iká iki, ja Ibo riki ikon Dios, itan wetsara já pekáo yamake ixon maton onannon ixon aká.

36 Janra jakon anon ixon notsinkin, naikanxonbi mato yoyo aka iki, nato mainxonra jawen ani chii tiritai mato oinmaa iki, jatianra ja chii tiritai meranoa jawen joibo maton ninkata iki.

37 Janra maton rekenbo jato noia iki, jaskákinra jaton chiníbakebo katota iki, jawen ani atipana koshinra Egiptonkonia jato xabaa iki.

38 Mato bebon icha, itan mato xewina koshibo ikanaibira, maton jishnonbi ja maibo ikainoa jato pikoa iki, jaton main jikixon ja maibo iboakin maton binon ixon.

39 Jaskara iken, já riki Ibo Dios ixon kikinhakin maton shinan meran bikanwe, naikan itan mainra já xewina wetsa já keska yamake.

40 Ja rama nete en mato meniai jawen esébo, itan jan ati yoia joibo senenhakanwe, jatianra maton chiníbaqueboyabi mato jakon jati iki, jainoaxa ja maton Ibo Diossen jatíbitian jayáti mai mato meniainko, icha baritia mato jati iki”, akin.