2 “Israelitabo yoiwe: Natobo riki ja jatianshamanbo Ibobiribi shinankin fiesta axonti netebo, jara jakonshaman jan tsinkitibo akin maton janeti iki.

3 Sokota nete senenra mia teeti iki, ikaxbi jawen kanchis iti netenra jawe teebi min atima iki; jara iti jake jatian tantiti neteshamanbiribi. Jatianra jakonshman tsinkiti maton ati iki. Jawerano mia janonbira, Ibo kikin shinanni ja neten mia tantiti iki.

4 Natobo riki jatianshamanbo Ibo kikin shinankin jakonshaman tsinkiti maton atibo, jatianbora mato tsinkiti iki:

5 Ja reken oxe chonka chosko neteya iketianra, moa yantanaitian, Ibo kikin shinankin Pascua fiesta ati iki.

6 Ja oxeribi moa chonka pichika neteya iketianra, Ibo kikin shinankin levaduraoma aká panman fiesta ati iki. Ja levaduraoma aká pan pitira, kanchis nete senenres iti jake.

7 Ja reken netera westíora jakonshaman tsinkiti maton ati iki. Jawe keská koshi teebi ayamakanwe.

8 Kanchis nete senenra ja maton Ibo meniaibo maton menoti iki, jatian jawen kanchis iti netenra westíora jakonshaman tsinkiti maton ati iki. Ja netera jawekeska teebi maton atima iki”, akin.

9 Ibonra Moisés yoia iki:

10 “Israelitabo jato yoiwe: Ja en mato meniai mainko jikixon, maton trigo banaxon tsekáara, ja reken iká bimi maton tsekáa sembó sacerdote maton boxonti iki.

11 Ja tantiti nete iibata pekáo wetsa nete xabatatonra, ja sacerdotenin, ja bimi sembó jakonshamanbo boxon Ibo meniti iki, Ibon jato bixonon ixon.

12 Ja trigo bimi senbo menia netenribira, westíora baritiaya carnero bake bene jawe jakonma neoma, maton keyokin menoti iki Ibo axonkin.

13 Chosko kilo wetsa naponbekon iti, itan jakonshaman harina xeni meskoxon meínnaribira maton beti iki, ja Ibo menikin menoa jawen keenshaman inin iti kopi. Jainxon ja menikin chikoti westíora litro uva jeneribi maton beti iki.

14 Ibo jawéki menikin maton bokin senenhai nete kamanra, pan, trigo toban iamax trigo bená kobintanibi maton pitima iki. Nato eséra jatíbitian iti iki, papaboibakeara bakebaon tekiti iki, jainoax jaweranobires janonbira maton senenhati iki.

15 Ja tantiti nete iibata pekáo wetsa nete xabataton, ja trigo sembó jakonshamanbo Ibo maton meniai nete peoxonra, kanchis semana senenshaman maton toponti iki.

16 Jatianra ja kanchis itin iká ja tantiti nete iibata pekáo wetsa nete ikátonin, moa pichika chonka nete senenti iki. Jatianra ja bená trigo maton Ibo meniti iki,

17 jainxonra jakonshaman harina, levaduraya axon xoia rabé pan maton xobonkonia boti iki, jabora iti iki chosko kiloyabo, ja reken jakon bimibo Ibo menikin maton aká.

18 Ja panbo betanra, kanchis carnero bake bene westíora baritiayabo jawe jakonmabi neoma maton boti iki, westíora waka bake ranon itan rabé carnerora ja Ibo axonkin keyokin menoti iti iki, ja menikin menoara jawen keenshaman inin iti iki, bero jawékibo itan uva xeati meniribixonbi maton jaboribi meniti iki.

19 Jabo aríbaxonbira westíora chivo ocha kopí maton reteti iki, jainxonra rabé carnero bake bene westíora baritiayabo jakonax Ibo betan raeananoxon maton reteti iki.

20 Ja sacerdoteninra ja yoinabo, ja reken iká yoabo tsekaxon aká panbo, itan ja rabé carnero Ibobiribi menikin já bebon boti iki. Jabora Ibo iboamati iki sacerdotena inon ixon.

21 Ja netebira jakonshaman tsinkíti maton atiki, jainxonra jawekeska koshi teebi maton atima iki. Nato eséra jatíbitian iti iki, papaboibakeara bakebaon tekiti iki, jawerano mato janonbira maton ati iki.

22 Baná bimibo tsekati senenketian, min wainkonia bimi keyokin tsekayamawe, jainxon ja texea texkanbo keyokin biamawe. Jawebiomabaon itan ja wetsankoniax joabaon binon ixon jenexonwe. Eara min Ibo Dios iki”, akin.

23 Ibonra Moisés yoia iki:

24 “Israelitabo yoiwe: Ja kanchis oxe itin jawen reken nete iketianra, tantiti nete iketian maton fiesta ati iki, ja moatian iní shinankinra, trompetabo xoon ayanan jakonshaman tsinkíti maton ati iki.

25 Ja meniai jawékira maton Ibo kikin shinankin menoxonti iki, jainxonra jawekeska koshi teebi maton atima iki”, akin.

26 Ibonra Moisés yoia iki:

27 “Ja kanchis oxebi moa chonka neteya iketianra, maton jakonma akábo moa Shinanxontima Nete iti iki. Jakonshaman tsinkitira maton ati iki, jainxonra ja neten maton ayunanti iki, jainxonribira ja meniai jawéki Ibo kikin shinankin axonkin maton menoti iki.

28 Ja neteribi jawe teebi ayamakanwe, maton jakonma aká moa Shinanxontima Nete riki, jatian riki ja maton Ibo Dios bebon jakon ikax, ja shinanxonti yamashamanbo mato iti nete.

29 Jaweratonki ja nete jawékiati teneyamai, tsoabires inonbira, jawen jemamea moa pikoti iki.

30 Jainoax wetsa tee inonbi ja nete mekeyamakin jan akára, tsoabires inonbi jawen jemamea en moa reteti iki.

31 Jawe teebi ayamakanwe. Natora jatíbitian iti esé iki, papaboibakeara bakebaon tekiti iki, jawerano mato janonbira maton jaskara ati iki.

32 Jara iti iki westíora nete jatian mato tantiti, jatianra maton ayunanti jake, ja oxe jawen iskon nete yantanaitian peoxonra, wetsa nete xabata yantan kaman maton ja nete toponti iki”, akin.

33 Ibonra Moisés yoia iki:

34 “Israelitabo yoiwe: Ja kanchis oxebi chonka pichika neteya iketianra, kanchis nete senen, Ibo kikin shinankin axonkin ja Peotabaon fiesta maton ati iki,

35 ja reken netera jakonshaman tsinkitinin maton peoti iki. Ja nete jawe teebi ayamakanwe.

36 Ja kanchis nete senenra, ja maton meniai jawékibo Ibo kikin shinankin maton menoxonti iki, jatian ja posaka nete itinra, jakonshaman tsinkíti maton aríbati iki, itan ja Ibo meniai jawékibko maton menoxonti iki. Jara fiesta nete iki, jawekeska koshi teebira maton atima iki.

37 Natobo riki jatianshamanbo Ibo axonti netebo, jara iti jake Ibo shinanni mato jatian tsinkíti nete, ja tsinkíainxonra Ibo maton neniti iki, já meninoxon bea jawekibo, yoinabo keyokin menoabo, já bexona bero yoabo, yoina reteabo itan já bexona vinobo, ja maton jaskaaira iti jake, ja jaskarabo meniti netebaonbiribi.

38 Natobo riki ja tantiti netebo Ibo mékexonribakinbi, jainxon ja maton meniti yoia ixon, iamax yoiama ixonbi jawekibo meniribikinbi, maton akaibo.

39 Ja kanchis oxe moa chonka pichika neteya iketianra, maton yoa bimibo tsekakin senenhaxon, Ibo kikin shinankin axonkin kanchis nete maton fiesta ati iki. Ja reken itan jawen posaka iti netenra mato tantiti iki.

40 Ja reken netenra jakonshaman jiwinkoniabo yobin bimi maton tsinkiti iki, xebon peibo, jiwi pei sembóshamanbo itan paromea álamo jiwi peibo, jatianra kanchis nete kaman, maton Ibo Dios bebonmeax mato raroti iki.

41 Jawen kanchis iti oxenra baritiatiibi kanchis nete senen maton Ibo kikin shinankin fiesta axonti iki. Jara jatíbitian esé iki, papaboibakeara bakebaon tekiti iki.

42 Ja netera ea shinankin maton akai fiesta peokooti iki. Ja kanchis nete kamanra, ja mato kikinshaman israelitabo peotanin jati iki,

43 abánon jatíbi maton chiní bakebaon onankin, ja Egiptonkonia israelitabo en pikonontian peota meran en jato jamani. Eara maton Ibo Dios iki”, akin.

44 Jaskáaxonra Moiséssen israelitabo ja nete shamabaon Ibo fiesta axonti onantishamanhakin jato yoia iki.