2 “Neskáakin israelita jonibo yoiwe: mato ochaomabo ikanwe, ea maton Ibo Diossa ochaoma iki.

3 Mato westíorabaonra, maton papa betan maton tita jakonhakin joi ninkáxonti iki. Nokon tantiti neteboribira^a maton akonkin senenhati iki. Eara maton Ibo Dios iki.

4 Ja rabiti aká jawékibo mato akinnon ixon yokáyamakanwe, itan matonbi yami charaaxon dios ayamakanwe. Eara maton Ibo Dios iki.

5 Jawetianki jakon inoxon, Ibo menikin maton yoinabo menoxonai, Diossen mato bixontishamanbo akanwe.

6 Ja menia yoinara ja netenbi maton piti iki, wetsa nete xabatatonribira maton piti atipanke, ikaxbi jawen kimisha nete itin ati texeara maton menoti iki.

7 Jawen kimisha iti neten ja Dios menia nami piara, moa jakonma iketian Diossen bitima iki;

8 jan piatoninra ja jakonma iboati iki, itan jawen kaibobo xaranmea pikokanti iki, ja Ibo iboamaa ikax iresama ikenbi jakonma imaa iketian.

9 Baná tsekati senenketianra, min wainkonia ja moa senentiain iká berobi yamatiakin min tsekatima iki, ja texea texkanbora min keyokin tsekatima iki.

10 Min wainkonia uvabo keyokin biamawe, ja uva maanaboribi biamawe, abánon jawebiomabaon bikin, itan wetsankoniax joá jonibaonribi bibanon. Eara min Ibo Dios iki.

11 Yometsoyamakanwe. Jansoyamakanwe, paranananyamakanwe.

12 Senenhanoxmabi enra mia axonti iki ixon, nokon janenko jato yoiamawe, jaskáxonra jaskáatima ikenbi min Diossen jane min jakonma imai. Eara min Ibo Dios iki.

13 Mibé joni masá tenemayamawe, jawen jawékibo bichinyamawe. Bakishparira en mia kopíakai akin ja teeta ayamawe.

14 Ja pabe joni itan wetsa isinaibo jakonmaakin yoiyamawe. Ja benche bain kaai jaki tatí iti axonyamawe. Mia Dioski raketai oinmawe. Eara min Ibo iki.

15 Jakonma akábo jato yoixonkin, ja atima keskáakin ayamawe: Wetsares akinxon wetsa akinyamai iamawe, jawebiomabo itan icha jawekiabo inonbi, jaton akábo yoixonkin, atibi keskáakinres awé.

16 Min kaibobo xaran ixon, janso joibo yoiatanyamawe. Joni retekanketian mibé joni iboamai jaki jansoyamawe. Eara min Ibo iki.

17 Min wetsa omiskin jakonma shinan min jointiain benxoayamawe. Notsinti iketian mibé joni notsinwe, minribi jawen ocha iboayamawe.

18 Min kikin kaibaon mia aká kopíyamawe, jainoax sináyamawe. Minbix mia noikaata keskáakin mibé joni noiwe. Eara min Ibo iki.

19 Nokon esébaon yoiai jeneyamakin akanwe. Min yoinabo, meskó yoinabo betan bakeamayamawe. Min wainko, wetsa berobo betan meskoxon banayamawe. Meskó yomaman aká chopabo saweyamawe.

20 Ja yanka yonoti ainbo, jonin binoxon onantiaa ixonbi, jaon maroamapari ikax, xabakatamapari ikenbi, wetsa joni jabé oxaketianra, ja joni kopíamati iki, jaskara ikenra jato retetima iki, ja ainbo xabakatamapari iká iketian.

21 Ja joninra jakonma aká kopí Ibo menikin westíora carnero reteti iki, ja anoxonra Diossen xobo xepotiain boti iki.

22 Jawen jakonma aká kopí carnero reteketianra, sacerdotenin ja jonin ocha aká kopí, Ibon moa shinanxonyamanon ixon yokáxonti iki, jatianra ja ocha moa shinanxontima iki.

23 Ja main jikixon yobin jiwibo banaxonra maton reratima iki, kimisha baritia senenra jawen bimibo maton kokotima iki.

24 Jawen chosko baritia itinra, fiesta axon ja yobin bimibo jatíbi onantiakin maton Ibo iboamati iki,

25 jatian jawen pichika baritia itinparira ja yobin bimibo maton kokoti iki. Jatianra ja yobin jiwibo benbonbires bimiti iki. Eara maton Ibo Dios iki.

26 Jawekeskaxonbi jimiya piamakanwe. Yobéxon shinanmanres onannaibo iamakanwe, rama iti jawékibo shinanmanres onankasi iamakanwe.

27 Tentoni maxkoroyamakanwe, jainxon keni oroyamakanwe.

28 Mawákanketian maton yora xateyamakanwe, jawekeskataxbi yora tsaiai chexebaon iamakanwe. Eara maton Ibo iki.

29 Teakaakin jawen yoran maroai imaxon min bake ainbo jakonma ninkakaamayamawe. Ja main jakonma tsini shinan bochoaxonra min jakonma imanake.

30 Nokon tantiti nete esébo senenhakanwe, nokon xobo mekekanwe. Eara maton Ibo iki.

31 Onanmisbo itan koshonmisboiba boyamakanwe. Jato onanmaaxa jaton jakonmanin tsaia mato kerásnake. Eara maton Ibo Dios iki.

32 Ja koshibo bebon ixon, chankáxon jato oinmawe iresamaakin min jato shinanai. Dioski raketai kopí iresamaakin min já shinanai jato onanmawe. Eara maton Ibo iki.

33 Wetsankoniax joax mato xaran jaa jonibo masá tenemayamakanwe.

34 Ja joni mato keskábiakin akanwe, noikanwe, jabora mato keskaribi iki. Jaskara wetsankoniax boaboribira mato ikana iki ja Egiptonko inontian. Eara maton Ibo Dios iki.

35 Jan nenké topontibo, jan iwe topontibo, jain napóti itan jain nachíti topobo, jan jato paranti senenma topobo ayamakanwe.

36 Balanzabo, jan iwe topontibo, itan ja toponti topobora senenshamanbo maton ati iki. Eara maton Ibo Dios iki, Egiptonkoniara en mato tsekáa iki.

37 Jaskara ixon nokon esébo itan en ati yoia joibo akanwe, senenhakanwe. Eara maton Ibo Dios iki”, akin.