2 Jatianra Ibon Moisés yoia iki: “Ja min wetsa Aarón yoiwe, ja chopan nachitea pekáo chichó iká kikinshaman iresama chité meran wetsatianbires jikiamanon, nin ja ani bonanti mapóti bebonribi kayamanon, jain kaaxa mawáti iki, ja mapóti manaon nai koin meran ea jishtibiresi pikóketian.

3 Ja ocha kopi reteti waka bake ranon, itan westíora carnero já menikin keyokin menotira, ja Diossen xobonko jikikin Aarónman boti iki.

4 Lino aká iresama tari sawéya, itan lino aká calzoncillo chichó sawéyara kati jake, jainoaxa lino cinturónman chinexetax, lino cintanribi bonexeeti iki. Ja chopara iresama iki, jaskara iketianra, ja saweamatianbipari Aarón onpaxen chokiti iki.

5 Israelitaboibakeara, ochabo kopí reteti rabé chivo, itan westíora carnero ocha kopi keyokin menoti, Aarónman biti iki.

6 Ocha kopí janbiribi menikinra, waka bake ranon reteti iki, jawen ochabo itan jawen rarebobaon ochaboribi Diossen shinanxonyamanon ixon.

7 Japekáora chivo rabé bixon, ja Dios betan nokoananti xobo jikitiainxon, Ibo menikin reteti iki;

8 jainxonra ja rabé chivoki suerte ati iki: wetsa suerte Ibona, itan wetsa Azazelna.^a

9 Ja Iboki suerte paketa chivora, ocha kopí menikin Aarónman reteti iki;

10 ikaxbi Azazelki suerte paketa chivora, ocha shinanxonyamanon ixon, jiriabi Ibo bebon boti iki, japekáora tsoa jonibi jain jaama mananman jain Azazel ikain ranti iki.

11 Aarónmanra ocha kopí menikin, janbiribi waka bake ranon reteti iki, jawen ochabo itan jawen rarebobaon ochaboribi moa jato shinanxontima kopí.

12 Japekáora biti iki, ja Ibo bebon iká makan tsamanainoa, jain incienso ati tsiste bochóya, itan rabé mesó incienso ininti renéribi, jara chopa panaa pekáo chichó boti iki;

13 ja incienso inintira Ibo bebonxon, chii tiritainko bepota menóti iki, ja incienso koimanra ja senenhabekonti joi jain iká ani bonanti pekanten iká jawen mapóti mápoti iki. Jaskáaxa Aarón mawátima iki.

14 Jainxonribira ja waka bake ranon jimi ichama bixon, ja ani bonanti mapóti peká bari pikotaiori jawen metotinin kachax ati iki. Japekáora ja mapóti rebonko, jawen metotinin kanchis akin jimin kachaxti iki,

15 jaskáa pekáora jonibaon ocha kopí chivo reteti iki, jaskáaxonra ja jimi, ja chopa pana pekáo chichó boti iki; jain chichóxonra, ani bonanti mapóti peká itan resenenain, jimin kachaxti iki, ja waka bake ranonman jimin aká keskáribiakin.

16 Jaskáaxonra ja Diossen chité ikainkonia, israelitabaon jatíbi kerásbo itan yoitimata ochabo soati iki. Itan jato xaran iká Diossen xobonkonia jaton ocha kerásboribi soati iki.

17 Ja ochabo moa jato shinanxonyamanon ixon akí, Diossen chité meran Aarón jikiketianra, jainoax pikotaikaman, tsoabi Dios nokoti xobonko itima iki. Jatian moa jawen ocha, jawen rarebobaon ocha, itan jatíbi israelitabaon ochabo moa jato Diossen shinanxontimaakin, akín senenhaxa, moa pikóti iki.

18 Jainoaxa pontékainti iki, ja Ibo bebon iká yoina menoti makan tsamana kerásma inon ixon atibo akí. Ichátama waka bake ranon jimi betan chivo jimi bixonra, ja jiwi aká machanbo raskiti iki, ja makánbo tsamana katemakinribira jimín sikati iti iki,

19 jainxonra ja makan tsamana pekaten kanchis akin jawen metotinin jimin kachax ati iki. Jaskáaxonra ja israelitabaon kerásbo soati iki, jainxonra Diossenabiribi ikantiakin meniti iki.

20 Jatianra ja Diossen chité, ja Dios nokoti xobo itan ja yoina menoti makan tsamana, moa kerásma itiakin senenhaxon, chivo jiriabi beti jato Aarónman yoiti iki;

21 jatianra, jawen meken rabébi ja yoinanin maponko akáx, israelitabaon jatíbi jakonmabo, jato yoitimatabo, itan jaton ochabo jaki potai keshati iki. Jaskáaxonra ja ochabo chivoki tsamanti iki, jainxonra wetsa joni yoiti iki, ja tsoa jonibi jain jaama mananman boxon ja chivo raanti.

22 Jaskati, tsoa jonibi jain jayamainko kaax manóxonra, ja chivon jatíbi jaton jakonmabo, jain tsoa jonibi jayamainkobo boti iki.

23 Jaskáa pekáora Dios nokoti xobo meran Aarón jikiti iki, ja Diossen chité meran jikikin sawea lino chopa jopéxonra jain tsamanti iki.

24 Jainoaxibira onpaxen chokiti iki, jaskata pekáora jawen chopabi saweax pikóxon, janwenabi itan ja jonibaon ochabo kopí, yoina menikin keyokin menoti iki, jaskáaxonra jawen ocha itan ja jonibaon ochaboribi, moa Diossen shinanxontimaakin imati iki.

25 Ja ocha kopí retea yoina xenira ja makan tsamanaton axon menoti iki;

26 jatianra ja Azazelhiba katanon ixon chivo boí katana jonin jawen chopa patsatax jaribi onpaxen chokiti iki, jaskata pekáoparira ja jain ikana chopa peotabo ikainko jikiti iki.

27 Ja ocha kopí retea waka ranon betan chivo, ja ochabo moa shinanxontima kopí jawen jimi Diossen chitéain botanara, jain peotabo ikainoa pikoxon wetsanko boti iki. Ja bichi itan jawen nami, jainoax jawen poibora menoti iki.

28 Jan menoa joninra jawen chopa patsáti iki, jainoaxa jaribi onpaxen chokiti iki, jaskata pekáoparira jain ikana peotabo ikainko jikiti iki.

29 Ja maton jatíbitian senenhati eséra neskara iki: Ja kanchis oxe^b moa chonka neteya iketianra maton ayunanti iki, jainxonra jatíbi tee maton jenepariti iki, wetsankoniax joax mato xaran jaa jonibaonra, mato israelitabaon akai keskáribi akanti iki,

30 ja netera ocha maton akábo, moa Ibon mato jawebi shinanxontima iki, jatianra jatíbi maton ochabo moa soakaata iti iki.

31 Ja eséra jatíbitian maton senenhati iki: ja netera mato kikinni tantiti iki, ja netera itiki ayunanti netebiribi.

32 Jawen papan toan sacerdote iti katóxon, jatíbi koshi menia sacerdoteninra, ja ochabo moa Diossen jato shinanxonyamanon ixon jaskara atibo akin senenhati iki; ja akinra jaskara akin atibiribi lino chopa janbiribi saweti iki,

33 jainxonra ja Diossen chité, ja Diossen xobo itan ja yoina menoti makan tsamanaboribi, Dios bebon jakon imati iki, jaskáaketianra ja sacerdotebaon ocha itan jatíbi israelitabaon ochaboribi moa Diossen jato shinanxontima iki.

34 Jara maton jatíbitian esé iti iki: Israelitabo ocha akana ikenbi, Diossen jato shinanxonyamanon ixonra, westíoraakin baritiatíibi ja esekan yoiai senenhakanti iki”, akin. Jaskákinra ja Ibon Moisés ati yoia keská akana iki.